VOV4.Êđê - Yap truh hruê 25-3, Việt Nam mâo leh 6 hruê amâo mâo ôh mnuih ruă Covid-19 mrâo hlăm êpul êya. Truh ară anei, ala čar drei mâo jih jang 1601 čô mnuih ruă Covid-19 kyua tưp hlăm ala čar, hlăm anăn ênoh mnuih ruă mrâo yap mơ̆ng hruê 27/1 truh ară aneu mâo 908 čô. Ênoh mnuih bi tuôm giăm leh anăn hriê mơ̆ng krĭng mâo klei ruă tưp hlăk dôk bi ktlah hjăn mâo 36 êbâo 480 čô mnuih. Hlăm anăn phung ruă Covid-19 dôk mdrao mgŭn, ênoh mnuih amâo lŏ ƀuh kman Sars- Cov-2 jing 120 čô. Hluê si Hdră tlŏ mgang pŏk mlar ala čar, hlăm hruê 24-3, kluôm ala mâo thiăm 1.906 čô mnuih dưi tlŏ vaccin Covid-19.  Hruê mbruê, dŭm čar Quảng Ninh, Tây Ninh, Đồng Tháp mphŭn tlŏ mgang vaccine COVID-19. Snăn truh ară anei, vaccine COVID-19 dưi tlŏ leh hlăm 19 čar, ƀuôn prŏng hlăm wưng tal 1.

H’Zawut pô mblang