VOV4.Êđê- Čiăng mđĭ ktang ngă bruă vaccine hŏng tač êngao, khua lăn čar Nguyễn Xuân Phúc mâo leh hră mơĭt kơ Xác-lơ Mi-xen, khua kiă Êpul hgŭm Châu Âu čiăng akâo kơ EU đru lehanăn kah mbha vaccine kơ ala čar Việt Nam. Hlăm hră anăn, khua lăn čar Nguyễn Xuân Phúc mâo leh klei lač jăk kyua klei uêñ mĭn lehanăn klei đru mơ̆ng Êpul hgŭm Châu Âu kơ ala čar Việt Nam hlăm hruê mmông leh êgao, boh nik đru leh 2,4 êklăk hnơ̆ng vaccine kơ Việt Nam hlăm hdră COVAX. Khua lăn čar mnă klă, ala čar Việt Nam dôk tuôm hŏng lu klei dleh dlan čiăng dưi mâo ênŭm 100 êklăk hnơ̆ng Việt Nam kơ mnuih ƀuôn sang lehanăn kdrăp yua bruă mdrao mgŭn hlăm bruă gang mkhư̆ klei ruă tưp. Tui hluê anăn, kyuadah jing ƀĭng hgŭm lehanăn klei bi mguôp kluôm ênŭm dôk đĭ kyar jăk siam pla wah Việt Nam lehanăn Êpul hgŭm Châu Âu, khua lăn čar Nguyễn Xuân Phúc akâo kơ EU đru jih hnơ̆ng kơ ala čar Việt Nam hlăm dŭm bruă mkăp đru, kah mbha vaccine, kdrăp mrâo mrang, mkăp brei mnơ̆ng yua bruă mdrao mgŭn čiăng mdrao kơ mnuih mâo klei ruă tưp Covid-19, kah mbha klei thâo hlăm bruă gang mkhư̆ klei ruă tưp.

Pô mblang: Y-Ƀel Êban