VOV4.Êđê - Hlăm klei bi kƀĭn hŏng phung čih klei mrâo tlam 10-6, wĭt lač klei êmuh phung čih klei mrâo akâo blŭ kơ klei hâo hưn lač dah Mi mâo hdră mđup brei 500 êklăk hnơ̆ng vaccin gang mkhư̆ Covid-19 kơ dŭm ala čar, pô blŭ bi ala Phŭn bruă hŏng tač êngao Lê Thị Thu Hằng brei thâo, Việt Nam bi mni bruă Mi hưn mdah hdră kah mbha vaccin Covid-19 kñăm mbha 25 êklăk hnơ̆ng vaccin tal êlâo dlông rŏng lăn, hlăm anăn mâo dŭm ala čar Ngŏ dhŭng Asi, hlăm anăn mâo Việt Nam. Hlăm boh klei ruă tưp dleh ktuê dlăng msĕ si ară anei, Việt Nam čang hmăng dŭm ala čar leh anăn dŭm êpul bruă quốc tế mđĭ ai tiê bi hgŭm, đua klam, mđĭ kah mbha klei hâo hưn, kdrăp mrâo, ngăn prăk, mdrao mgŭn, boh nik vaccin čiăng hrăm mbĭt msưh kdŭn klei ruă tưp huĭ hyưt anei.

H Zawut pô mblang