VOV4.Êđê - Lŏ dơ̆ng dŭm bruă nah êngao gưl nao čhưn klă sĭt ti ala čar Lào mơ̆ng Khua lăn čar Nguyẽn Xuân Phúc, tlam hruê 9-8, Đại tướng Phan Văn Giang, Khua phŭn bruă lĭng kahan mâo leh klei blŭ hrăm hŏng Chansamone Chanyalath, K’iăng Khua knŭk kna, Khua phŭn bruă lĭng kahan ala čar Lào. Hlăm klei bi blŭ hrăm, dua tĭng bi mklă anei jing klei găl čiăng lŏ dơ̆ng bi trông, mđĭ ktang klei bi hgŭm lĭng kahan dua nah hlăm boh klei ruă Covid-19 dôk dleh ktuê dlăng, bi mklă khă gơ̆ hlăm ya boh klei, êpul lĭng kahan dua ala čar srăng bi đru, găn jih klei dleh dlan, lông dlăng răng mgang kjăp ktang klei tŭ krŭ kdơ̆ng dŭm gưl ênuk aê ama ksŭl mbŭ leh. Hlăm wưng kơ anăp, Phŭn bruă lĭng kahan dua ala čar brei lŏ dơ̆ng ktuê dlăng, ksiêm hriăm dŭm hdră bi hgŭm djŏ guôp, hŏng klei gĭr amâo brei klei bi hgŭm dua ala čar hmaĭ kyua klei ruă tưp, hlăm anăn hyuă kjăp bruă kriê dlăng, răng mgang knông lăn, gang mkhư̆ klei mŭt, kbiă soh hŏng hdră bhiăn.

H Zawut pô mblang