VOV4.Êđê-  Aguah mbruê, pô bi ala knŭk kna Ba Lan ti Việt Nam Wojciech Gerwel, bi ala leh kơ knŭk kna Ba Lan ba jao kơ phŭn bruă mdrao mgŭn 501 êbâo 600 hnơ̆ng vaccine gang mkhư̆ klei ruă tưp Covid-19 AstraZeneca. Hnơ̆ng vaccine AstraZeneca anei mơ̆ng knŭk kna Ba Lan mđup brei kơ ala čar Việt Nam čiăng mđĭ bruă gang mkhư̆ klei ruă tưp Covid-19 dưi truh leh tač êdeh phiơr Nội Bài tlam hruê 21/8. K’iăng khua phŭn bruă mdrao mgŭn Trương Quốc Cường lehanăn k’iăng khua phŭn bruă hŏng tač êngao Tô Anh Dũng nao tŭ mă leh hnơ̆ng vaccine anei hlăm klei đru mơ̆ng knŭk kna Ba Lan. Tui hluê anăn, k’iăng khua phŭn bruă mdrao mgŭn Trương Quốc Cường bi êdah klei lač jăk kyua klei khăp mơ̆ng pô bi ala lehanăn knŭk kna Ba Lan kơ knŭk kna, mnuih ƀuôn sang Việt Nam, ăt msĕ hŏng dŭm êpul êya mnuih Việt Nam ti ala čar Ba Lan. Klei anei lŏ đru kơ ala čar Việt Nam lŏ mâo thiăm ai dưi mdrơ̆ng hŏng klei ruă tưp lehanăn lŏ bi msiam klei mjĕ giăm 2 ala čar mâo leh 71 thŭn.

Y Bel pô mblang