VOV4.Êđê – Tlam mbruê 30/7, ti ƀuôn prŏng Ƀuôn Ama Thuôt, pô bi ala khua gĭt gai anôk bruă sang mđung asăp blŭ Việt Nam ti Lăn Dap Kngư mkŏ mjing leh klei mđup brei 2.200 kdrăp čŭt hơô bruă mdrao mgŭn, 500 ală kĭng gang mkhư̆ êa kčăi lehanăn mnơ̆ng yua aguah tlam kơ anôk bruă ksiêm dlăng klei ruă tưp čar Dak Lak, čiăng đru kơ bruă êpul êya bruă mdrao mgŭn čar Dak Lak lŏ mâo thiăm kdrăp gang mkhư̆ klei ruă tưp Covid-19.

Ngô Quang Khương, K’iăng khua kiă kriê bruă Sang đung asăp blŭ Việt Nam ti Lăn Dap Kngư brei thâo, hŏng klei hmăng hmưi dưi hrăm mbĭt hŏng čar Dak Lak gang mkhư̆ klei ruă tưp Covid-19, anôk bruă ngă leh bruă iêu mthưr dŭm êpul êya, mnuih ƀuôn sang ngă klei bi mguôp mnơ̆ng yua hlăm bruă mdrao mgŭn msĕ si: kdrăp čut hơô bruă mdrao mgŭn, ală kĭng gang mkhư̆ êa kčăi, leh anăn  mnơ̆ng dhơ̆ng yua aguah tlam mkăn. Leh 3 hruê iêu mthưr, mâo leh 10 êpul êya, mnuih ƀuôn sang nao hgŭm leh anăn bi mguôp 2.200 kdrăp čŭt hơô bruă mdrao mgŭn, ală kĭng gang mkhư̆ êa kčăi leh anăn lu mnơ̆ng yuă mkăn hŏng ênoh giăm 170 êklăk prăk.

Y Ƀel pô mblang