VOV4.Êđê- Tlam mbruê (20/7), bruă kƀĭn ala bi leh bruă čuăn ruah khua bruă kƀĭn ala gưl 15. Tui hluê anăn, 475/475 khua êmua bi ala bruă kƀĭn ala ngă leh bruă čuăn ruah tui si hdră mtrŭn čuăn ruah khua bruă kƀĭn ala. Sơnăn, khua bruă kƀĭn ala Vương Đình Huệ lŏ dưi čuăn ruah jing khua bruă kƀĭn ala gưl 15 hŏng hnơ̆ng čuăn ruah jing ênŭm jih jang.

Hŏng bruă ngă jing khua bruă kƀĭn ala, Vương Đình Huệ srăng myơr jih ai tiê pô, mbĭt hŏng bruă kƀĭn ala, jih jang phung khua êmua hlăm dhar bruă gĭt gai bruă kƀĭn ala, dŭm anôk bruă kƀĭn ala lehanăn dŭm čô bi ala bruă kƀĭn ala. Djă pioh lehanăn bi lar knhuah gru jăk siam 75 thŭn bruă kƀĭn ala Việt Nam, lŏ hdơ̆ng bi mlih hdră êlan, mđĭ hnơ̆ng lehanăn boh tŭ dưn mơ̆ng bruă kƀĭn ala kyua bruă kñăm jing klei jăk kơ ala čar, djuê ana, klei hdĭp mnuih ƀuôn sang. Tui si hdră êlan klei kƀĭn tal 1, bruă kƀĭn ala gưl 15, hruê 21/7, bruă kƀĭn ala srăng mă bruă ti adŭ bruă prŏng čiăng bi trông, bi klă dŭm hdră mtrŭn, čuăn ruah phung khua êmua hlăm dhar bruă kƀĭn ala.

Pô mblang: Y-Ƀel Êban