VOV4.K’ho- Tàm pơrjum Mpồl đơng lam Dà lơgar rơcang sơndră mờ kòp Covid-19 pa geh bơyai lơh poh lài, Phó Thủ tướng ồng Vũ Đức Đam sồr ală càr, ƀòn dờng pal lơh gùng che điện thoại, ală mpồl cau lơh sơnơm mpồl bơtiàn tus tơl ƀòn nàng gĭt, gròi sền, dong kờl broă lơh sơnơm tàm ƀòn nàng ai ală làng bol lơi geh tơngŏ gơtìp kòp Covid-19 mờ ală bơta pràn kơl dang să jan ndai.

Tus tŭ do, jơi tam gơl să pa Gamma neh gŏ tàm 81 lơgar mờ jơi tam gơl să Delta tàm 142 lơgar mờ ù tiah. Bộ Y tế đơs, mờ tam gơl să Delta, kòp gam gơtìp kal ke, gơtờp uă, gơtờp mhar mờ lơh chơ̆t jê uă tàm uă lơgar tàm dunia, tàm hơ̆ uă ngan là tàm tiah Đông Nam Á.

Mpồl y bác sĩ, cau pơgru, cau bơsram dờng khoa y bơh tiah đah tô dà lơgar tus dong kờl ƀòn dờng Hồ Chí Minh sơndră mờ kòp Covid-19 bơtờp

Tàm lơgar Việt Nam, gơtờp dơ̆ 4 do, gùt lơgar neh gŏ 243 rơbô nă cau, tàm hơ̆, ƀòn dờng Hồ Chí Minh geh gŏ rơlao 137 rơbô nă cau gơtìp. Bộ Y tế đơs: Kòp gơtờp di gơlan gam jŏ, tàm hơ̆ uă ngan là tàm ƀòn dờng Hồ Chí Minh mờ ală càr đah jum dà lơgar. Geh ờ uă càr di gơlan gơtờp wơl tai, pơhìn uă ngan tus mờ bơta pràn kơl dang să jan, màng kis làng bol, lơh gơrềng uă ngan tus mờ broă tơnguh bơtàu lơh sa mpồl bơtiàn.

Jăt broă mờng chài bơh ƀòn dờng Hồ Chí Minh mờ ală càr hờ đah jum pà gŏ, geh bơta lơh gơtờp kòp mhar là broă lơh jăt ờ nền nòn broă tam cah ngài mpồl bơtiàn jăt Chỉ thị sồ 16. Geh ờ uă mpồl lơh broă, mpồl lơh sa kă bro mờ ờ uă làng bol gam sền ờ sơ̆p, ờ sền gròi, gam tìp bal, ờ hềt mùl màl tam cah ngài bơh hìu mờ hìu tàm tiah kơrian wàng se. Yal tai bè broă xét nghiệm, Bộ trưởng Bộ Y tế ồng Nguyễn Thanh Long pà gĭt: “Kơrnoăt gŏ sơlơ gờñ sơlơ geh gơmù, tam cah ngài geh lơh gơmù bơta gơtờp kòp, den broă xét nghiệm tàm ală càr, ƀòn dờng mìng geh bơto sồr kơrnoăt, tàm tiah lơi ne geh mpồl cau lơh broă nàng bal mờ ƀòn lơgar bơ̆t bơtàu broă xét nghiệm di pal mờ jơh ală jơnau sồr. Kơrnoăt pal geh ai F0 lĭk bơdìh mpồl bơtiàn, geh bè hơ̆, hơ̆ sồng lơh gơmù broă gơtờp tàm mpồl bơtiàn”.

Tàm dơ̆ pơrjum, ală kuang bàng tàm Mpồl đơng lam, đơs uă tus mờ broă mờng chài uă ngan tàm ală tiah pà gŏ lài jơh pal sền gàr kơl jăp “tiah tơlir”, tiah ờ do ờ dă, mờ wàng se, tơmù tiah di gơlan gơtìp uă, uă ngan; tàm broă lơh jăt broă tam cah ngài mpồl bơtiàn jăt chỉ thị sồ 16, ală càr, ƀòn dờng pal tơnguh uă ngan gơnoar bơh ală mpồl lơh broă, mpồl Covid-19 mpồl bơtiàn, gùt làng bol, bơta tờm là mpồl kuang àng, nàng “lòt tus tơl pòt, teh tơl hìu, sền tơl nă cau”, git jơh ală cau bơh tàm tiah ndai tus, lơh glài nền nòn ală cau lơi ờ yal broă lơh sơnơm ha là ờ yal nền nòn.

Jăt Phó Thủ tướng ồng Vũ Đức Đam yal, tŭ neh lơh jăt broă tam cah ngài mpồl bơtiàn den pal gàr di pal “cau tàm tiah lơi ơm tàm tiah hơ̆”. Gơwèt mờ broă xét nghiệm, geh ờ uă tiah lơh jăt uă ir broă xét nghiệm mhar, ngòt xét nghiệm RT-PCR, den tàng, Phó Thủ tướng sồr broă xét nghiệm pal geh lơh tơrgùm bal, lơh tờm, tơl niam khoa học, geh cồng nha. Ală càr, ƀòn dờng pal tơrgùm cau lơh broă uă rơlao mờ ală tiah sơm kòp tàm tiah hờ đơm nàng sơm kòp, bơsong di tŭ ală cau gơtìp kòp jroă mhar, geh tơl bơta pràn, sơnơm, oxy, phan lơh broă di jăt mờ kơrnoăt nàng gàr niam khà jơnờng sơm kòp mùl màl. Phó Thủ tướng ồng Vũ Đức Đam đơs tờm: “Ală càr, ƀòn dờng pal crơng gơs mơ broă lơh gùng che điện thoại, ală mpồl cau lơh sơnơm ƀòn lơgar tus tơl ƀòn nàng dờp, gròi sền, dong kờl broă lơh sơnơm tơn tàm tiah hơ̆ ai ală làng bol lơi in geh tơngŏ gơtìp kòp Covid-19 kung bè aolă broă bè bơta pràn kơl dang să jan ndai, càr lơi geh mpồl lơh broă ntrờn pal tơrgùm uă rơlao, ală càr, ƀòn dờng pal kơlơi tus mờ broă tam cah ngài den pal drơng gàr mpồl jào phan in, mờ mpồl cau jào phan tŭ do kuơ màng ngan, ală càr tŭ do pal drơng tus mờ mpồl cau jào phan bơdìh mờ broă xét nghiệm, cĭt sơnơm vaccine den phan lơh broă pal gih dal kuang àng, pal sền gŏ hơ̆ là cau jào phan. Broă hơ̆ pal geh rơcang tài hơ̆ là jơnau bơsram broă mờng chài kuơ màng ngan".

Tàm broă sơm kòp, Phó Thủ tướng ồng Vũ Đức Đam đơs là, broă mờng chài bơh ƀòn dờng Hồ Chí Minh mờ ờ uă càr hờ đah jum dà lơgar pà gŏ: pal tam cah is tiah dờp lài ngan gơwèt mờ cau gơtìp kòp Covid-19 ờ geh tơngŏ kòp, ờ hềt geh sền là cau kòp, nàng sền gàr di pal bè phan sa, bơta pràn kơl dang să jan, nùs nhơm, nàng tơmù F0 geh tơngŏ kòp.

Tềng đăp mờ bơta kòp gơtờp gam gơtờp mhar, khà cau gơtìp kòp Covid-19 jroă geh tơngŏ gơguh uă, Bộ trưởng Bộ Y tế ồng Nguyễn Thanh Long neh kĭ sră nggal jal mhar pơyoa tus ală mpồl lơh broă bal mờ gah lơh sơnơm bè broă tơnguh broă bơto, bơsram tàp tơnguh uă bơta pràn sơm kòp, tơnguh bơta pràn niam. Jăt mờ hơ̆, jơh ală hìu lơh sơnơm ai geh khà măt, mhar bơto, bơsram tàp tơnguh bơta pràn sơm kòp, tơnguh bơtau pràn niam ai ală y bác sĩ in. Lài mờ hơ̆, Bộ trưởng ồng Nguyễn Thanh Long neh kĭ tơlik rơndăp broă lơh “Tơnguh bơta pràn sơm kòp, tơnguh bơta pràn niam ai ală hìu sơnơm sơm kòp cau gơtìp kòp Covid-19 jroă in” sồr mờ crơng gơs 12 anih tơnguh bơta pràn niam kòp Covid-19 dà lơgar geh bơh 200 tus 3 rơbô nơm jơnờng piam kòp tơnguh bơta pràn niam tàm ală hìu sơnơm.

Kờñ lam sồr mpồl y bác sĩ, cau lơh sơnơm dong kờl ai ƀòn dờng Hồ Chí Minh mờ ală càr đah jum rơcang sơndră mờ kòp Covid-19, Tổng Liên đoàn Lao động Việt Nam neh tơlĭk kơrnoăt bè broă dong kờl tơnguh phan sa bơkah tàm ală dơ̆ sào sa ai mpồl cau lơh sơnơm tàm tiah rơcang sơndră mờ kòp Covid-19 in. Jăt mờ hơ̆, cau geh dờp là mpồl bác sĩ, điều dưỡng, kuang bàng lơh sơnơm bơh ală hìu sơnơm dà lơgar mờ cau bơsram dờng, cau bơsram ală hìu bơsram y tế gơwèt Bộ Y tế (mờ ală càr, ƀòn dờng) geh ai tus 19 càr, ƀòn dờng hờ đah jum gam lơh jăt broă tam cah ngài mpồl bơtiàn jăt Chỉ thị sồ 16. Khà dong kờl mờ phan geh 1 tơlăk đong tàm 1 nă.

Cau mblàng Ndong Brawl