VOV4.K’ho- Bơh bơta geh ngan gơlik geh kal ke bơh kòp dê gơlam tus hăt hal ir tàm ală hìu sơnơm tàm ƀòn dờng Hồ Chí Minh dê, ngai 13/8, tàm pơrjum pơlam tàp pờ tơlik tơn tàm internet bè atbồ, sơm kòp mờ sền gròi cau bơtờp mờ virus Sars CoV-2, cau kòp Covid-19 jat bơta tam pà atbồ mờ sơm kòp, Bộ Y tế pà gĭt, geh pờ ơnàng broă sơm kòp ai cau F0 in tàm hìu mờ geh lơh tơrlòng lài pà “kơl dung sơnơm gàr tơl niam” bơto pơlam broă kham să jan ai cau kòp in.

Bộ neh geh bơto pơlam tàm pà bơnah sơnơm kòp jat broă lơh 3 cờn. Tàm hơ̆ cờn dơ̆ 1 sơm kòp ai cau F0 ờ geh bơta tềl tơngŏ kòp halà tềl tơngŏ kòp nggờc in tàm hìu sơnơm ing mờ sơm kòp tàm hìu. Cờn dơ̆ 2 sơm kòp tàm ală Hìu sơnơm bơh kơnă kơnhoàl rlau hơđang, drơng broă ală cau kòp geh tềl tơngŏ kòp di mơ mờ pal geh tơl oxy, sơnơm sơndră gơ klăc mhàm mờ sơn dră mờ as sồt. Cờn dơ̆ 3, là kơnă sơm kòp mờ sền gròi jơh nùs ai ală cau geh khà cau bơtờp kòp kơn jơ̆ in. Bộ trưởng Bộ Y tế ồng Nguyễn Thanh Long tơngkah ală càr, ƀòn dờng lơh jat mờ jơnau sồr “4 dùl bă tiah”, rcang lài ai sơm kòp bè jơnờng piam, oxy, măy tă nhơm, kờp bal mờ măy tă nhơm mờ oxy ngui jơnhoa ai cờn sơm kòp dơ̆ 3 in mờ soh phan rcang sơndră kòp.

Cau mblàng K’Hạnh