VOV4.K’ho- Tềng đap broă gơlik geh kal ke bơh kòp Covid-19 dê, kờñ rơcang lài git gŏ F0 tàm mpồl bơtiàn, Ủy ban Nhân dân ƀòn dờng Buôn Ma Thuột, càr Dăk Lăk neh tơlik broă rơndap lơh xét nghiệm mhar kháng nguyên virus Sars CoV-2 tàm ƀòn dờng dơ̆ 2.

Jat hơ̆, ƀòn dờng geh lơh xét nghiệm mhar kháng nguyên ai 16 xã, sơnah ƀòn geh tiah geh uă cau kòp tàm tơngai lài geh ală sơnah ƀòn: Ea Tam, Tân Tiến, Tự An, Tân Lợi, Tân Lập, Tân An, Thắng Lợi, Tân Hòa, Thành Nhất, Thành Công, Tân Thành, Thống Nhất mờ ală xã: Cư Êbur, Hòa Thuận, Hòa Thắng mờ Ea Tu. Tơngai lam lơh bơh ngai 06/11 mờ tơn jơh lài mờ ngai 09/11/2021. Nàng gàr di tŭ tơngai, ƀòn dờng geh crơng gơs 204 mpồl xét nghiệm, tơl mpồl lơh xét nghiệm mờr 500 mẫu tàm dùl ngai. Broă ai mẫu xét nghiệm geh lam lơh jat broă lơh tơrgùm jơh lài dùl bă tiah hơ̆ sồng lơh tiah ndai, tơl hìu bơnhă geh ai mẫu jat broă lơh mẫu pơgồp bal, ờ rlau 3 nă cau tàm dùl mẫu pơgồp.

Cau mblàng K’Duẩn