VOV4.K’ho- Ngai 27/10, càr Lâm Đồng pơn jat tai git gŏ 15 nă cau bơtờp kòp Covid-19, tàm hơ̆ geh uă cau kòp gơ rềng tus tiah geh kòp pa tàm tiah tờm ƀòn dờng Dà Làc. Tàm khà 15 nă cau bơtờp kòp Covid-19 pa geh git gŏ, geh 7 nă cau geh git gŏ tàm ƀòn dờng Dà Làc, 6 nă cau tàm kơnhoàl Đức Trọng mờ 2 nă cau tàm kơnhoàl Bảo Lâm.

Dà Làc git gŏ uă cau F0

Mìng is ală cau bơtờp kòp pa tàm ƀòn dờng Dà Làc ndrờm geh bơta gơ rềng bơtờp kòp tus tiah geh kòp pa tàm gùng dềt 31 gùng Nguyễn Công Trứ, sơnah ƀòn 8, ƀòn dờng Dà Làc. Tŭ do broă đal git tiah geh kòp, rơ wah, jòi cau ơm rềp, tam cah is ală cau ơm rềp mờ ală cau kòp gam geh ală mpồl lơh broă geh gơnoar bơh càr Lâm Đồng dê lam lơh. Tus tŭ do, Lâm Đồng neh geh 505 nă cau bơtờp kòp Covid-19, tàm hơ̆ geh 323 nă cau neh geh sơm bời mờ rê bơh hìu sơnơm.

Cau mblàng K’Duẩn