VOV4.K’ho - Tơnơ̆ mờ 3 poh mŭt lơh broă, kờp bơh mho ngai 30 nhai 07, hìu sơnơm ing sồ 3 ƀòn dờng Hồ Chí Minh (tiah ơm kis pa Bình Khánh gơwèt sơnah ƀòn An Khánh, ƀòn dờng Thủ Đức) neh bơyai lơh ai 1 rơbô 800 nă cau geh rê bơh hìu sơnơm tài neh sơm bời mờ kòp Covid-19.

Bác sĩ chuyên khoa 2 Lý Quốc Công, Kuang atbồ Khoa Lâm sàng, hìu sơnơm ing sồ 3 pà gĭt, tŭ do hìu sơnơm geh 20 nă cau sơm kòp jroă, pal tă nhơm mờ ôxy. Ală y bác sĩ gam lơh ngan sơm kòp cau kòp in, tŭ gơtìp jroă den geh jun tus hìu sơnơm dờng rơlao. Jơh ală broă sền nàng gĭt kòp, broă sơm kòp ndrờm geh ngui jăt mờ kơrnoăt geh ai bơh Bộ Y tế. tàm ƀòn dờng Hồ Chí Minh, pah ngai geh gĭt nđờ rơbô nă cau kòp geh bời kòp rê bơh hìu sơnơm. Jăt anih tờm gròi sền kòp tê jê să ƀòn dờng Hồ Chí Minh yal, tàm ngai 29 nhai 7, geh tai 3 rơbô 131 nă cau kòp geh bời, tơnguh khà cau geh sơm bời kòp kờp bơh tŭ kòp gơtìp là 28 rơbô 320 nă.

Cau mblàng Ndong Brawl