Tơnơ̆ mờ tŭ tơmŭt bal mờ càr Ninh Thuận, càr Khánh Hoà neh gơs bă ù tơrgùm bal uă bơta pràn ờ hoan geh ngan: ù tiah jăt gah dà lềng jòng ngan lơgar Việt Nam dê, bơta niam bồt dà lềng geh uă bơta, uă pòt dà lềng mờ ƀlàng dà lềng pơnrơ ngan bè Nha Trang, Vân Phong, Cam Ranh, Ninh Chữ, Vĩnh Hy, bal mờ ù tiah brê bơnơm niam, ƀlàng bràs mờ mpồl phan lời wơl niam chài, rài lài do krơi is. Do là bơta tờm nàng càr bơtàu tơnguh ală gah broă bè lòt nhơl tơlir, năng lượng tơlir, gùng lòt tơlir mờ rài kis tơlir ai mpồl bơtiàn in.

Mơya, càr Khánh Hoà kung gam kơnờm tàm ờ uă drà kă bro ndai tờm ngan mờ ƀuơn gơtìp gơrềng bal tài bơh ală tam gơl gùt plai ù. Tàm pơrjum cri bơyai, uă cau jăk geh jơnau sồr càr Khánh Hoà pal gờñ lơh geh khà niam lòt nhơl tơlir, ai jơnau kờñ tus nam 2030 geh 80% hìu cau năc ơm geh khà măt tơlir. Broă lơh mờng chài bơh ờ uă tiah lòt nhơl pơnrơ ngan tàm càr dê pà gŏ, bơtàu tơnguh tơlir geh tơnguh uă bơta pràn hòi jà lòt nhơl mờ pơgồp bal tàm broă gàr niam rài kis broă lơh sa mpồl bơtiàn in. Jăt ồng Phạm Minh Nhựt, Củ tịc Mpồl tam klăc mpồl lòt nhơl Nha Trang – Khánh Hoà đơs, do là gùng dà pal geh lơh nàng tơnguh uă bơta pràn tàm pơrlòng, ai geh bơta kwơ kơl jăp mờ gàr niam rài kis broă lơh broă sa jŏ jòng: “Lòt nhơl tơlir, lòt nhơl kơl jăp ờ di là broă lơh jăt bal gời, ờ di là broă lơh nàng geh mờ là broă pal geh lơh bơh ală mpồl lơh sa kă bro lòt nhơl dê. Tàm hơ̆ uă ngan là mpồl lơh sa kă bro ơm bic, mpồl lơh sa kă bro anih tus pal pơgồp bal sền gàr tiah kis mờ broă lơh lòt nhơl bơh ală mpồl lơh broă do dê. Lơh bè lơi gàr niam tiah kis, rơ̆p gàr niam bơta kơl jăp, bè tềng đăp măt là ngui phan đềt mềr mờ tiah kis. Ha là ală broă tơrgùm, lơh kloh siồ siă”.

Ồng Nguyễn Long Biên, Phó Củ tịc Anih duh broă Làng bol càr Khánh Hoà tơlik nùs nhơm, càr rơ̆p lơh mùl màl jơh ală jơnau pơgồp bal tàm gùng dà broă lơh, hòi jà bơta pràn tàm mpồl bơtiàn, pơlam mpồl lơh sa kă bro bơcri priă; mờ lơh pơgồp bal ală gùng dà broă lơh jŏ jòng bơh Dà lơgar dê nàng gờñ lơh geh ală jơnau kờñ gơs tiah tus tơlir tơl ală bơta: “Càr Khánh Hoà kơ̆p kờñ pơn jăt tai dờp geh broă sền gròi, mờ lơh broă bal bơh Dà lơgar, mpồl lơh sa kă bro, cau jăk mờ mpồl bơtiàn nàng lơh jăt mùl màl jơh jơnau kơ̆p kờñ gơs tiah tờm lòt nhơl dà lềng ală lơgar, tiah drà tơlir, ngăc ngar, gùng lòt tơlir, kơl jăp, pơgồp bal tàm jơnau kờñ gơguh lơh sa bàr sồ tơngai bơh nam 2025 tus 2030”.