Càr Dăk Lăk geh gùng nhàr lơgar jòng 73 kơi sồ rềp mờ càr Mondulkiri, lơgar Campuchia tàm ù tiah 4 sàh: Ea Bung, Ia Rvê, Ia Lốp mờ Buôn Đôn. Do là tiah is ồn, làng bol jơi bơtiàn dồ êt nă cau geh rlau 50%. Gùng lòt kal ke, hìu bơsram ờ diơng neh lơh broă bơsram sră bơh kơnòm bơsram dê gơtìp uă ngan gơ kòl. Pah dơ̆ mut nam bơsram pa, geh uă pơgru pal lòt tus tơl ƀòn, tơl hìu hòi jà kơnòm bơsram lòt bơsram, uă oh pal lòt gơl gùng jòng bơh 15 tus 20 kơi sồ nàng bơsram sră. Jơnau yal càr rơp bơcri priă lơh hìu bơsram ơm sa bic tơn ală kâp tàm ală sàh tiah nhàr lơgar neh gơ gơs bơta chờ hờp mờ kơp kơnờm pa gơ wèt mờ làng bol tiah do. Bi H’Đa Nê Byă, ơm tàm sàh Buôn Đôn đơs:

“Să tờm añ kung bè làng bol chờ hờp ngan. Tŭ hìu bơsram geh lơh, ală oh rơp geh anih bơsram sră niam rlau, geh dong kờl tai sră măi, sră cih, phan bơna mờ măi mok pa ngan. Do là jơnau yal chờ hờp ngan, bol hi kơp kờñ hìu bơsram gờñ geh lơh nàng oh kòn tiah nhàr lơgar geh anih bơsram pa”.

Jat bơceh lơh, tơl hìu bơsram gơtùi drơng bơh 1 rbô tus 1 rbô 200 nă kơnòm bơsram in, ơnàng bơh 5 tus 10 lồ, geh cơldŭ bơsram, hìu ơm bal, hìu sền sră, hìu sa, anih tàp pràn să jan, cơldŭ bơsram măi tíñ, dà sàng goh mờ ală broă dong kờl ndai. Kờp jơh priă tă lơh kờp dŭ mờr 420 tơmàn đong ai 4 hìu bơsram in. Gơ wèt mờ ală pơgru, do là bơta tam gơl kuơmàng ngan nàng tă bơsong uă kal ke tàm broă bơto bơtê. Ồng Nguyễn Văn Sơn – Lam bồ Hìu bơsram kâp 1 Lê Quý Đôn, sàh Ea Bung đơs:

“Geh bơcri priă lơh phan bơna dồ bă ndrờm bal rơp lơh gơlik bơta niam ai broă  bơsram sră in, dong ală sau tơrmù ƀà bơta sang tĕ bơsram. Ală sau geh ơm wơl tàm hìu bơsram nàng sa ngai halà geh ơm sa bic tơn tàm hìu bơsram, do là dùl tàm ală bơta ƀuơn ngan ai jơh bal kơnòm bơsram, mè bèp mờ pơgru in”.

Bè đah gơnoar atbồ, ală sàh neh crăp rơcang ai ù nàng lam lơh hìu bơsram ală kâp. Rơndap broă lơh tàm sàh Buôn Đôn neh geh rơndap lơh tàm bă ù rlau 5 lồ, kờp dŭ sơn đờm lam lơh tàm nhai 10 nam 2025. Ồng Lê Thanh Sơn, Phó Củ tịc Anih duh broă Làng bol sàh Buôn Đôn pà git:

“Bol hi neh ai rlau 3 lồ 6 mờ gam rề ơnàng gơguh tus 5 lồ nàng lơh hìu bơsram. Hìu bơsram rơp cèng wơl anih bơsram niam rlau ai pơgru, kơnòm bơsram in, mờ kung là broă lơh dong kờl gàr lơngăp lơngai rài kis kuơmàng ngan, dong làng bol ing nùs ơm kis, bơtàu tơnguh lơh sa tàm tiah nhàr lơgar”.

Jơh gùt càr Dăk Lăk tŭ do geh rlau 4 rbô 300 nă kơnòm bơsram tàm 4 sàh tiah nhàr lơgar. Bơta crơng gơs bơh ală hìu bơsram ơm sa bic tơn ală kâp ờ mìng dong ală oh geh anih bơsram, anih ơm mờ gam geh gơtha kuơmàng jŏ jòngt ai. Ồng Nguyễn Đình Trung - Ƀí thư Tỉñ ủy càr Dăk Lăk đơs nền: Do là jơnau lơh nền dờng, geh gơtha niam chài kòn bơnus dờng ngan, lơh gơlik tŭ niam nàng oh kòn làng bol jơi bơtiàn dồ êt nă cau tiah nhàr lơgar geh bơsram tàm anih niam rlau, pơgồp bơnah bơto bơtê cau lơh broă geh bơta niam uă ai càr in. Bal mờ hơ̆, hìu bơsram kung lơh kơ̆ mpồl sền gàr dà lơgar jơh gùt làng bol, lơngăp lơngai làng bol tàm tiah nhàr lơgar. Ồng Nguyễn Đình Trung đơs sùm:

“Sồr gah bơto bơsram bal mờ anih duh broă đơng lam đảng, gơnoar atbồ ƀòn lơgar jat gơnăp gơnoar, kơnòl broă geh jàu mhar lam lơh ală broă rơndap lơh, sră pơ àr geh gơ rềng nàng mhar sơn đờm lam lơh broă lơh. Tỉñ ủy càr rơp pơn jat tai lòt bal, sồr lơh nền nòn nàng kờñ gàr ală rơndap broă lơh geh ai ngui di tŭ tơngai hơ pơrgon, lơh gơlik bơta tam gơl pràn ai broă lơh bơto bơtê mờ bơsram bơh càr dê in, ngan là tàm tiah nhàr lơgar”.

Ală hìu bơsram dờng niam mờr mpờl gŏ tàm tiah nhàr lơgar ờ mìng là anih “bơto sră” mờ gam là anih lơh gơs bơta kơp kờñ, pờ gơs mpồng bồ tơngoh bơsram sră ai git nđờ rbô nă kơnòm bơsram in. Mờ bơta at tê bal bơh Dà lơgar, càr mờ làng bol dê, bơta kơp kờñ bơsram sră tàm tiah nhàr lơgar gam rơhời gơ gơs ngan ngồn.