Mình dùl poh tơnơ̆ Pơrjum dờng, càr Dăk Lăk neh  bơyai lơh Ngai chờ Tam gơl sồ nam 2025 mờ tơngume “Măi mok sồ- Bơceh lơh rài tơnơ̆ dp”. Mờ jơnau kờñ gơ gơs càr lòt lài bè tam gơl sồ tàm tiah Tây nguyên- Tiah đah Jum tàm gùl lơgar. Tơnơ̆ rlau 3 nhai tơmŭt bal, Dăk Lăk neh lơh sir 100% broă jàu tam gơl sồ tàm 102 sàh, sơnah ƀòn, khà sră nggal pơyoa tàm internet jơh gùt càr lơh geh 34,5%, kấp sàh lơh geh 37%. Anih tờm drơng broă sră pơ àr gơnoar atbồ 2 kấp dờp rlau 350 rơbô sră nggal, mờ 76% bơsong tàm internet. Jơh gùt càr geh rlau 83% làng bol geh pà mat điện tử khà 2, mờr 79% neh ai ngui.

Ală cồng nha do pà gŏ bơta bơtàu tơnguh pràn kơl dang bơh gơnoar atbồ ƀòn lơgar 2 kấp càr Dăk Lăk dê tàm gùng lòt tam gơl sồ, wèt tus broă lơh sră pơ àr gơnoar atbồ rềp làng bol, song dơ pă mờ pa ngan. Ồng Bùi Thanh Toàn, Kwang Lam bồ Sờh Jak chài mờ Măi mok càr Dăk Lăk, pà gĭt:“Lơh bè lơi nàng gơnoar atbồ rềp làng bol rlau tàm tơngai là bă ù dờng ơnàng rlau mờ ờ gam kấp kơnhoàl tai den tàng jak chài măi mok tam gơl pa, bơceh lơh mờ tam gơl sồ ngan là gùng dà broă lơh. Càr rơ̆p pơn jat tai bơcri priă lơh bè phan bơna bơt bơtàu, bè kòn bơnus rơ̆p geh dùl dơ̆ ai kwang bàng càr tus nàng dong kờl ai ală sàh, sơnah ƀòn in. Bơdìh mờ hơ̆ kung gơ hòi gơ jà mpồl lơh broă bơh đah bơdìh mờ kung dờp geh bơta lòt bal, dong kờl bơh ală mpồl lơh sa kă bro tàm ù tiah càr dê".

Tơngai lơh  broă pa, càr Dăk Lăk ai jơnau kờñ gơguh lơh sa 10,5% jat tàm bơtàu tơnguh mpồl lơh  broă jak, sơlơ tơnguh tai jak chài- măi mok, tam gơl pa bơceh lơh mờ tam gơl sồ, bơcri priă dồ ròt bal bơt bơtàu phan bơna nàng rề ơnàng lơh bal mờ ală tiah.

Bal mờ gơnoar atbồ, làng bol mờ mpồl lơh sa kă bro tàm càr ndrờm sền gĭt loh làng, tơngai lơh broă bơh nam 2025-2030 Dăk Lăk ờ mìng ngui ù tiah ai bơtàu tơnguh lơm mờ bơta kwơ màng rlau tai là rề ơnàng ù tiah bơh kơlôi sơnơng dê. Mò Ngô Tường Vy, Kwang Lam bồ dờng Tập đoàn Tăc mờ blơi phan mờ lơgar ndai plai chi Chánh Thu, pà gĭt bơta ƀuơn bơta pràn broă lơh sa suơn sre bơh càr Dăk Lăk dê tàm tơngai do, rơ̆p geh bal ală bơta trồ tiah brê bơnơm pà ală bơta ƀuơn is ồn mờ ală pơlam gùng dà pa, broă lơh, broă dong kờl pa: “Bơta kwơ màng là pal sền broă lơh sa suơn sre bè dùl gah lơh sa gĭt wă- jat tàm măi mok, ală bơta kwơ mờ bơta niam nàng phan bơna bơh càr Dăk Lăk dê brồ guh lòt ngài rlau, gơ gơs bơta pơn yờ să bơh broă lơh sa suơn sre Việt Nam dê”.

Mờ jơnau kờñ tam gơl pràn bơtàu tơnguh, càr Dăk Lăk rơ̆p sơlơ tơnguh jak chài, măi mok mờ tam gơl sồ, mơkung sơlơ tơnguh tai bơcri priă bơt bơtàu phan bơna gùng lòt. Ồng Tạ Anh Tuấn, Củ tịc Anih duh broă Làng bol càr Dăk Lăk pà gĭt, tàm tŭ tam gơl sồ -phan bơna bơt bơtàu sồ là “ bơta chồl tơnguh lơbơn” den phan bơna bơt bơtàu gùng lòt rê rơ̆p là bơta bơtàu tơnguh kră nàng sơlơ tơnguh tai lơh sa- mpồl bơtiàn:“Càr rơ̆p tơrgùm priă jền nàng bơcri priă lơh sir ală gơl gùng lòt rê tờm, is ồn là gơl gùng rơndeh lòt mhar tàm tơrbŏ bal mờ tiah đah mat ngai lik mờ mŭt càr dê, tàm tơrbŏ anih ơhò ơm dà lềng mờ ƀlàng rơndeh par kung bè tàm tơrbŏ mờ ală gơl gùng rơndeh lòt mhar bơh jơh gùt lơgar dê, bè gùng rơndeh lòt mhar đah Tô- đah jum, gùng rơndeh lòt mhar Buôn Ma Thuột- Vân Phong mờ phan bơna bơt bơtàu lòt lài dùl cơnđoà rơ̆p pờ geh ù tiah bơtàu tơnguh mờ bơsong ală bơta priă jền ndai”.

Mờ ală phan ngui bơtàu tơnguh gam geh mhar lơh kơ̆ kơl jăp, ală tŭ tơngai niam dờng ai priă bơcri- lơh sa kă bro tàm càr Dăk Lăk gam geh pờ geh. Ồng Lê Đức Huy, Củ tịc Mpồl duh broă tàm mpồl bal Kông ty Kơnòl nă să is Tăc mờ blơi phan mờ lơgar ndai 2/9 Dăk Lăk, pà gĭt: “Bol añ pin dờn ngan rơ̆p lam Dăk Lăk bơtàu tơnguh sơr lèt uă tàm tơngai tus, is ồn là ală broă lơh tam gơl pràn. Dơ̆ 1 là bè phan bơna bơt bơtàu rơ̆p bơtàu tơnguh ală phan bơt bơtàu, tàm tơrbŏ tiah đah mat tơngai lik- mut nàng bơtàu tơnguh bè lơh gơlik jrô, ală anih tờm bè tiah lơh sa mờ măi mok, ală anih ơhò ơm kung bè ală anih tờm anih ơhò ơm dà lềng nàng ai ală phan bơna lơh geh bơh broă lơh sa suơn sre mờ phan tàm dà bơh Tây Nguyên dê là tăc mờ lơgar ndai tơn mờ gùng dà lềng tàm tiah đah mat tơngai lik càr Dăk Lăk dê”.

Tơnơ̆ pơrjum dờng Đảng ƀộ càr, Dăk Lăk ờ mìng đơs bè “broă jàu lơm” mờ gam gơ hòi gơ jà ală broă lơh ngan ngồn, nàng lơh geh bơta pràn bơtàu tơnguh pa- tiah broă lơh sa suơn sre, lơh sa mờ măi mok mờ dà lềng tàm bơnĕ bơnài bal dùl gùng nàng bơtàu tơnguh. Tŭ Jơnau lơh nền tàm pơrjum geh lơh ngan ngồn mờ broă lơh, tŭ nùs nhơm tam gơl pràn gơ rề uă tus mờ tơl nă làng bol mờ mpồl lơh sa kă bro, Dăk Lăk rơ̆p ờ mìng là tiah tờm kơphê lơm, mờ gam là pơrya bơh dùl tiah gam brồ să he dê pràn kơl dang bơh tiah kơh bơnơm lik tus dà lềng dờng.