Tàm hìu lơh mờ mpàn ờs bè ờs ngan, rơndăp tăp sèng ngan, ồng Kơ Să Ha El lời cơldŭ di gùl là tiah dờng màng ngan rlau jơh yồng rùp Wa Hồ mờ uă sră jờng rơ, tàm hơ̆ Geh Sră jờng rơ 30 sơnam Đảng. Ồng neh lơh uă broă kwơmàng tàm ƀòn lơgar, là Ƀí thư Đảng ủy sàh Dà Chais, hơ̆ sồng Củ tịc Mpồl Cau lơh broă sa kơnhoàl Lạc Dương. Ồng ăt gơnoar broă Phó Mpồl Mblàng yal bơto bơtê Huyện ủy Lạc Dương, càr Lâm Đồng yau, mờ rê rlô lơh broă bơh nam 2022.

Mờ broă lơh jak mờ bơngă he dê, tŭ rê hờ ƀòn lơgar, ồng Kơ Să Ha El pơn jăt tai geh pồ ăt gơnoar broă Ƀí thư Ci ƀộ thôn Dà Blah, sàh Lạc Dương. Ồng chờ hờp yal bè ală tŭ tam gơl bơh ƀòn lơgar dê.

 “Lài do làng bol tiah do rƀah ngan, bơh gùng lòt, lơh sa sền bè ờ geh chi lơi…Tus nam 1992, geh bơta dong kờl sơntìl sơntìl kơphê bơh gơnoar ătbồ ƀòn lơgar neh lơh geh bơta tam gơl pràn kơldang tàm gĭt wă làng bol dê. Bol hi hòi jà làng bol bañ mus brê, hòi jà làng bol tam kơphê, tờm hồng, bơtàu tơngguh ròng phan bè rơpu, kơnrồ cèng wơl cồng nha lơh sa uă…”. 

Bơh tŭ lơh jăt Broă lơh Jơnau kờñ dà lơgar bơ̆t bơtàu ƀòn lơgar pa, hìu bơnhă đảng viên Kơ Să Ha El lơh krơh lòt lài. Ồng neh bal mpồl sờr ntrờn ù tiah hòi jà làng bol pà ù lơh gùng, bơ̆t bơtàu ală broă ngui tàm rài kis làng bol. Mùl màl ồng neh pà rlau 20 thơk măt ù kờp priă gĭt nđờ tơmàn đong nàng dà lơgar in lơh rơndăp broă lơh lơh niam wơl mờ lơh ơnàng gùng dà lơgar 27C. Tŭ do, Dà lơgar lam lơh rơndăp broă lơh rề ơnàng dơlam tơnau dà Rơhoa, hìu bơnhă ồng crăp rơcăng lời 2 sào nggùl ù gam tam kơphê.

Nùs nhơm lơh lài, lơh krơh mờ ală tă pơgồp bơh hìu bơnhă đảng viên Kơ Să Ha El dê neh lơh gơrề tàm mpồl bơtiàn ƀòn lơgar, tơrgùm bal pràn dùl nùs bal bơ̆t bơtàu ƀòn lơgar pa mờ jơh nùs lơh broă lơh sa bơtàu tơngguh uă rài kis. Nam lài, priă lơh geh kờp bal dùl nă cau bơh thôn Dà Blah dê geh 45 tơlak đong dùl nă dùl nam. Mò Cil Pam K’Quyên, lài do là Ƀí thư Ci ƀộ thôn Dà Blah, sàh Lạc Dương pà gĭt:

 “Gơ wèt mờ bol hi, ồng Kơ Să Ha El sùm là krơh àng bè bơta lơh lài, lơh krơh. Ồng là cau lơh kòn gùng pin dờn đah Đảng mờ Làng bol, bơr đơs ồng dê sùm geh bơngă, làng bol iăt mờ lơh jă”.

Sàh Lạc Dương tŭ do geh tơnggơs jăt tàm bơta tơmŭt bal 3 sàh: Dà Sar, Dà Nhim mờ Dà Chais, kơnhoàl Lạc Dương yau dê. Mờ bă ù geh is ơnàng mờr 830 kơi sồ vuồng, Lạc Dương gơgơs là sàh ơnàng ngan rlau jơh càr Lâm Đồng dê, mờ khà làng bol jơi bơtiàn dồ êt nă cau geh tus rlau 82%. Ồng Ya Tiong, Ƀí thư Đảng ủy sàh Lạc Dương, pà gĭt: tơngai lơh broă bơh nam 2025- 2030, sàh pơn jăt tai tàm gùng bơtàu tơngguh ai broă lơh sa sươn sre là broă tờm, jrong kờl; lòt nhơl là tàm gơl pràn. Nàng lơh geh cồng nha ală Jơnau lơh nền tàm pơrjum Đảng dê nàng sùm bơtàu tơngguh uă rài kis làng bol dê, sàh sền gròi tơngguh uă gơnoar broă, kơnòl bơh ală kâp ủy Đảng, lơh jăt niam gơnoar broă lơh lài, lơh krơh bơh đảng viên dê tàm tiah jơi bơtiàn dồ êt nă cau.

“Ƀòn lơgar do geh uă ngan đảng viên jŏ nam, pơnrơ bè ồng Kơ Să Ha El, bulah enh geh rê rlô lơh broă jăt bơta dong kờl bơh Dà lơgar dê, mơya tŭ do tài bơh nùs nhơm kwang bàng, tài nùs nhơm oh mi, làng bol ƀòn lơgar, ồng kung gam pal pơn jăt tai tă pơgồp dà kơlhề nàng pơgồp bal pràn bal mờ gơnoar ătbồ ƀòn lơgar pơn jăt tai broă lơh bơtàu tơngguh lơh sa – mpồl bơtiàn Lạc Dương do dê”.

Nùs nhơm geh kơnòl, nùs nhơm jơh nùs jơh tồr bơh đảng viên Kơ Să Ha El dê neh pơgồp bơnah lơh kơ̆ kơl jăp bơta pin dờn bơh làng bol dê gơ wèt mờ Đảng, lơh gơrề nùs nhơm kơ̆p kờñ brô guh, tơrgùm bal pràn bơ̆t bơtàu kơnhoàl Lạc Dương, càr Lâm Đồng ngai sơlơ tam gơl pa bơtàu tơnguh rlau.