Tàm trồ tơngai sòl duh ngan, mò Y H’Xuân- Ƀí thư Ci ƀộ mơkung là Lam bồ thôn Kon H’ring, sàh Đăk Tô, càr Quảng Ngãi tus hìu bi Y Nai nàng hòi jà ai oh kòn in lòt bơsram tàm hìu bơsram. Bi Y Nai, pà gĭt, ờ mìng is hìu bơnhă bi dê lơm, mờ mò H’ Xuân sùm sền gròi uă ngan tus rài kis bơh tơl hìu bơnhă kòn cau Sơdàng ơm tàm thôn Kon R’ring dê tai sơl: “Mò Y H’Xuân là dùl nă kwang bàng lơh krơh niam, mò sùm hòi jà mờ mblàng yal làng bol tàm thôn in bơtàu tơnguh lơh sa, bơto bơtê oh kòn. Mò là krơh niam nàng làng bol tàm thôn bol añ dê lơh jat, bơsram bal nàng tơnơ̆ do bol añ lơh krơh niam ai oh kòn he in”.

Mờ bơta pơndờm pơnđiang mờ lơh krơh niam bơh mò Y H’ Xuân dê, jơh ală oh kòn jơi bơtiàn dồ ết nă cau tàm Kon H’ring ndrờm lòt bơsram tàm hìu bơsram tơl làm. Mò pà gĭt “Kờñ lik klàs rƀah ngan ngồn den pal bơsram akhar. Geh bơta gĭt wă hơ̆ sồng gơ pờ bồ tơngoh, bơsram ală bơta pa”. Kung kơnờm geh bơsram mờ rài kis làng bol tàm thôn hời rơ hời ram mhŭ rlau.

Thôn Kon Hring geh rlau 400 hìu bơnhă, jơh ală ndrờm là kòn cau Sơdàng, tŭ do mìng gam 6 hìu bơnhă rƀah mờ 7 hìu bơnhă pa lik klà rƀah. Mờ bơta dong kờl bơh Dà lơgar dê, tŭ do jơh ală hìu bơnhă tàm thôn ndrờm geh hìu ơm kơ̆ nhăp, iang nùs lơh broă lơh sa.

Yal bè gùng lòt lik klàs rƀah bơh làng bol dê, mò Y H’ Xuân, cau neh geh mờr 20 nam at gơnoar broă lam bồ thôn, Ƀí thư Ci ƀộ thôn Kon H’ring, pà gĭt tai: “Añ sùm hòi jà làng bol bơt bơtàu ƀòn lơgar pa, tam gơl rài kis, hìu đam pal lơh pơng gàr mờ sàng goh, gùng lòt tàm tàm ƀòn pal tam bơkào nàng lơh niam ai thôn, ƀòn in. Añ hòi jà làng bol tam gơl “bồ tơngoh kơlôi sơnơng mờ broă lơh” lời tĕ ală broă lơh lơh sa yau bè lài do. Lài do, làng bol lơh kòi dùl kàl lơm, tŭ do lơh geh 2 kàl tàm nam. Ù mìr den tam gơl phan tam. Tàm suơn hìu mờ mìr den làng bol pal tam tờm chi jŏ nam geh priă lơh geh uă nàng tơnguh priă lơh geh. Tàm thôn tŭ do neh tam gơl uă ngan, rơnàng kơnòm să tŭ do lơh ngan tơryang tơryồng lơh broă sa, tàm pơrlòng bal lơh sa, uă hìu bơnhă den neh geh blơi rơndeh măi, rơndeh kông nông, rơndeh lơ òr, măi mok măi kơphê, gơ lơh bè hìu lơi kung blơi tơl làm rơndeh rơndồ măi mok drơng broă lơh lơh broă sa”.

Đơs bè Ƀí thư Ci ƀộ Y H’ Xuân, mò Lê Thị Kim Hiển – Kwang lam bồ Cơldŭ lơh broă Niam chài Mpồl bơtiàn sàh Đăk Tô, càr Quảng Ngãi, pà gĭt, do là cau kờñ lùp bơsram mờ jơh nùs ngan mờ broă lơh. Mò Y H’Xuân là dùl tàm ală cau ết ngan kwang bàng jơi bơtiàn dồ ết nă cau tàm tiah do bulah sơnam neh dờng mơya gĭt ngui internet, Zalo nàng cribơyai broă lơh. Ală srơh lơh broă bơh sàh dê lam lơh tàm thôn Kon H’ring ndrờm geh lơh jat mhar  mờ ƀuơn ngan. Mò Lê Thị Kim Hiển, pà gĭt: “ Mò Y H’Xuân là dùl tàm ală krơh niam pơn rơ gơguh jak mờ cau dồ nă să kung bè tàm mpồl bal. Pa do thôn Kon H’ring geh Pơrjum dờng tàm pơrlòng kờñ gơboh dà lơgar bơh sàh dê dờp là thôn geh uă tă pơgồp tàm srơh bơtàu tơnguh lơh sa tiah làng bol jơi bơtiàn dồ ết nă cau tơngai bơh nam 2020-2025. Mìng is să tờm mò Y H’ Xuân kung geh pà khà jờng tàm Pơrjum dờng, là đảng viên lơh krơh niam lam lài lơh jat niam broă lơh mblàng yal hòi jà làng bol bơtàu tơnguh lơh sa”.

Mờ nùs nhơm geh kơnòl, bơta lơh krơh lam lài bơh cau đảng viên dê, mò Y H’Xuân neh gơ gơs tiah kơldìng gơwèt mờ kòn cau Sơdàng tàm thôn Kon H’ring, pơgồp bơnah sơlơ tơnguh tai bơtàu tơnguh lơh sa mpồl bơtiàn, tam gơl muh mat ƀòn lơgar pa, dong làng bol rơ hời geh rài kis hờm ram.