Àng drim gờñ tàm ƀòn Tuor, ờ gam kơno tai săp ntas srĭ srài nggồr nggàc rơndeh tơ pềp srèk ntoăt lòt rê mhar ngan tàm gùng dà lơgar 14, gùng cài lă lam lòt mŭt tàm ƀòn gơ pơdar kwĕt rơkwe lòt gan ală hìu, ală sươn chi tơlir kơphê, sầu riêng, rùp să bơkàu rơmĭt, bơkàu dum luañ tàm njềt tềng pơngàr kềng bàr gah gùng. “Hìu Kathy” dê gơgơs niam măt ngan bal mờ rùp dà mpàn dê, dùl nơm ntùng mờng kwèng bal mờ jơng gùng bềng lìu bơkàu dum luañ. Bơta ƀô thồm bơh hìu trŭ sa sơlơ lơh gơhòi gơ jà ngan.

Lơh gơs nam 2023, 2 nam do, kờp bal pah nam “Hìu Kathy dê” wă rò rlau 200 nă năc, 80% tàm khà hơ̆ là năc lòt nhơl ală lơgar, uă ngan là Tây, Anh, Thụy Điển…Năc lòt nhơl sĕ còp mờ ơm bĭc wơl tàm homestay “Hìu Kathy dê” rơ̆p geh sền gŏ rài kis bơh làng bol kòn cau Rơđê tiah do dê tơn, trŭ sa bal, lòt mìr bal, tàñ bal ồi, ñô bal tơrnờm kềng bơnhă ồs hìt dờng…Bi H’Bellly chờ hờp ngan yal:

Năc lòt nhơl chờ hờp ngan tŭ geh nggui rơndeh rơmok lòt sền ƀòn lơgar, lòng nhơl phan ngui đơs crih ờs mờng bơh yau bè cing mồng, cing gle, phan soh ờs mờng bơh yau mờ tam ya xoang. Bol hi lơh drơng broă mờ năc lòt nhơl tơm priă tă lơh, cèng wơl priă lơh geh nàng nàng làng bol in ngui sa tàm rài kis. Añ pơnyờ să ngan tài ờ mìng geh priă lơh geh lơm mờ gam prăp gàr mờ lơh gơrề uă niam chài jơi bơtiàn dê.

Dùl nă năc lòt nhơl tus bơh lơgar Indonesia sĕ còp ƀòn Tuor mờ homestay bi Belly dê yal bơta gơboh kờñ ngan:

Ơi, do là dơ̆ sơnrờp añ tus còp Việt Nam. Bơta añ kah kờñ ngan ờ mìng là trồ tiah mờ gam là broă làng bol tàm do kis gơ tàm sòr bal mờ gơ. Tàm pơn jăt rài kis gơlơh bè nggờc nggờr mờ dàr dàr. Ală phan sa bơkah krơi ngan, yal bè cau Rơđê, tus dì dùl dơ̆ nhơl phan ngui đơs crih ờs mờng bơh yau, gơlơh kah kờñ ngan.

Năc lòt nhơl kung cèng tus uă bơta pa krơi ngan ai bi Belly mờ làng bol tàm ƀòn in. Hơ̆ là jơnau yal bè bơto kòn se pleh ngài mờ điện thoại bơh cau mè lơgar Tây dê; là broă tơm bơh bơr pah ngai bơh năc lòt nhơl lơgar Anh dê…Neh chài ngan đơs dà Tây, bi Belly ờ gŏ rơngòt bơsram tai uă dà đơs bè dà Mỹ, dà Anh, dà Thụy Điển nàng gơtùi rơndăp dơ̆ lòt nhơl jăt jơnau kờñ năc lòt nhơl dê, yal mờ năc lòt nhơl in uă rlau bè niam chài jơi bơtiàn dê. Gơ wèt mờ mpồl bơtiàn he dê, bi H’Belly lơh gơlik jơnau gơdan ai làng bol in sơlơ gơboh kờñ đềt mềr tai mờ ală broă ờs mờng bơh yau:

Añ hòi jà làng bol tàñ ồi, ƀĕ tơrnờm, dròng cing jañ mồng. Añ rơ̆p là cau blơi jơh ală phan bơna hơ̆ nàng drơng năc lòt nhơl in. Tŭ geh uă năc lòt nhơl tus, añ rơ̆p bal mờ làng bol drơng lơh. Broă gŏ năc lơgar Tây, lơgar Mỹ lòt nhơl sĕ còp neh pơn jờng làng bol tàm ƀòn uă ngan. Tŭ gŏ năc lơgar bơdìh lòt nhơl bơh lơgar Tây, ală lơgar câu Âu tus, blơi ồi, biăp bùm, phan lời kir, làng bol neh dòn ală bơta lơi añ đơs là ngan. Bơh hơ̆ làng bol gĭt wă geh là să tờm he kung là ală cau ala măt niam chài.

Ală mpồl năc jòi tus ngai sơlơ uă, cèng jăt bal kơ̆p kờñ jòi gĭt mờ ki ngàm gơ wèt mờ bơta niam chài ờs mờng bơh yau krơi is ngan, lơh kah wơl bơta pơnyờ să làng bol kòn cau Rơđê ƀòn Tuor dê. Geh tai ală hìu jòng geh lơh bơtàu wơl, rơndăp lơh wơl nàng ai lòt lòt nhơl; pah mang geh uă rlau ală dơ̆ pơrjum niam chài mpồl bơtiàn kơno dờng săp ntas dròng cing jañ mồng, tàm bơrlŭ bal tàm săp ñŏ, bơta chờ hờp bơh năc lòt nhơl mờ làng bol dê. Mò H’Drian Niê, 80 sơnam chờ hờp mờ ală tam gơl bơh ƀòn dê yal:

 “Añ chờ hờp ngan tŭ gŏ ngai sơlơ uă năc lòt nhơl, geh bal tàm lơgar mờ bơdìh lơgar, jòi tus ƀòn Tuor. Khi ờ mìng gơboh kờñ ngan mờ ù tiah ƀòn lơgar lơngăp lơngai lơm mờ gam gơboh kờñ ngan ală phan sa ƀarah ƀarài pah ngai mờ biăp sàng goh geh pik bơh sươn hìu, bơh mìr. Nàng ƀòn Tuor ngai sơlơ bơtàu tơngguh mờ gơhòi gơ jà tai uă năc lòt nhơl, broă boh bơr mờ dà Anh, dà Mỹ, dà Tây là dờng màng ngan. Añ gơn kơnờm ală bơyô kơnòm să rơ̆p jơh nùs bơsram jơnau chài đơs dà lơgar ndai bơh he dê. Ngan bơh bơta do rơ̆p dong bol he boh bơr niam rlau mờ năc lòt nhơl ală lơgar, ai ƀòn Tuor gơgơs dùl anih tus pas niam mờ jak chài rlau”.