Nam 2022, tơnơ̆ tŭ ơm rlô jơh sơnam lơh broă bơh gơnoar broă Củ tịc Mpồl cau lơh broă sa sàh Quảng Trực, ồng Điểu Dray pơn jat tai geh pin dờn pồ lơh Phó Ƀí thư Ci ƀộ, atbồ ƀòn Bu Prăng 1 mờ là cau lam bồ Jơnum atbồ is gùng nhàr lơgar. Tàm khat gơnoar broă lơi, ồng ndrờm tơnguh nùs nhơm geh kơnòl, jơh nùs tài mpồl bơtiàn.

Tàm lơh broă lơh sa, ồng Điểu Dray là cau lam lài tàm broă tam gơl rơndap tap sèng chi tam, lơh niam wơl suơn tam bơrlŭ phan, cèng wơl cồng nha lơh sa uă. Nam 2010, broă lơh pơlam broă lơh sa suơn sre dà lơgar ai tờm măk ka nàng tam tàm ù tiah nhàr lơgar Quảng Trực. Tàm tŭ uă hìu bơnhă gam ờ hềt khin tam den hìu bơnhă ồng Điểu Dray neh dờp tam rlau 1 lồ măk ka. Cồng nha bơh sơn rờp, hìu bơnhă ồng sùm rề ơnàng bă ù tam măk ka bơrlŭ bal mờ tam kơphe, tiêu. Ồng Điểu Dray pà git:

“Tŭ do, kờp jơh bă ù tam măk ka hìu bơnhă añ dê là 8 lồ, tàm hơ̆ 1 lồ nggùl gam pik tơnhàu uă, 1 nam tơnhàu 2 dơ̆, tơl dơ̆ tơnhàu geh mờr 2 tấn, giă tac pơgap 70 tơlak đong dùl tấn tàm kàl pik ờ uă, hơ̆ là pơgap nhai 3 nhai 4, ai kàl pik uă tàm pơgap nhai 9, nhai 10 den giă tac jơnhua rlau”.

Nàng broă lơh sa kơ̆ kơnhăp sùm, hìu bơnhă ồng Điểu Dray neh mut tàm Mpồl lơh broă bal broă lơh sa suơn sre tàm sàh. Ồng jơh nùs bơsram, tơnguh bơta chài măi mok, broă rơndap lơh sơngka sền gàr, pik tơnhàu, lơh gơlik phan bơh suơn sre jat gùng dà kơ̆ kơnhăp sùm. Ồng kung hòi jà làng bol mut tàm mpồl lơh broă bal nàng tơrbŏ bal bơtàu tơnguh lơh sa kơ̆ kơljap.

Tus tŭ do, sàh Quảng Trực, càr Lâm Đồng geh mờr 1 rbô 500 lồ măk sa, lơh gơlik tŭ niam lơh pas ai cau lơh broă sa in, ngan là làng bol jơi bơtiàn dồ êt nă cau. Tàm ƀòn Bu Prăng 1, geh git nđờ jơt hìu bơnhă tam măk ka, uă hìu bơnhă lơh geh priă jền sùm pah nam tus 2, 3 rhiăng tơlak đong. Ồng Đoàn Lê Anh – Củ tịc Anih duh broă mặt trận dà lơgar Việt Nam sàh Quảng Trực pà git, nàng geh tiah tam măk ka bè tŭ do, geh bơta tă pơgồp kuơmàng ngan bơh ồng Điểu Dray dê:

“Ồng Điểu Dray là kra ƀòn geh bơngă pin dờn, neh geh tŭ là Củ tịc Mpồl cau lơh broă sa sàh, den tàng broă lơh mblàng yal, bơto pơlam broă lơh sa suơn sre bơh ồng geh làng bol pin dờn. Ồng kung là cau tus bal broă lơh tam măk ka lài ngan tàm ƀòn Bu Prăng 1, Bu Prăng 2, bơh hơ̆ làng bol bơsram, đòm jat, dong ală ƀòn tiah nhàr lơgar ngai sơlơ tam gơl”.

Ờ mìng lam lài tàm broă lơh sa, ồng Điểu Dray gam sền gròi tus broă sền gàr mờ gàr bơta niam chài kòn cau M’nông dê. Pa do, tơnơ̆ tŭ tơn jơh kàl lơh sa, cau M’nông tàm sàh Quảng Trực bơyai lơh yàng gờm chờ tơnhàu phan tàm sap cing mồng duh hồl ngan. Ồng Điểu Dray pơn rơ ngan tàm phan soh kòn cau lam bồ mpồl cing Bu Prăng 1. Mò Thị Sư, kwang bàng cơldŭ niam chài mpồl bơtiàn sàh Quảng Trực yal, ồng Điểu Dray bal mờ mpồl cing mồng neh ai geh uă khà jờng niam tàm ală dơ̆ pơrlòng đơs crih tamya làng bol:

“Ồng jơh nùs ngan tàm ală broă lơh ƀòn dê, là cau lam lài hòi jà làng bol sền gàr bơhiàn bơh yau. Là cau lam bồ mpồl cing mồng, ồng lam lơh tàm ală dơ̆ lơh chờ, tìp mat lơh kwèng, gam bơto tơn ai cau kơnòm să in bơsram mờ git sền gàr bơta niam chài kòn cau”.

Tàm gùng nhàr lơgar Quảng Trực, càr Lâm Đồng, ồng Điểu Dray geh git tus bè dùl “jrong kis tiah nhàr lơgar”. Nhai 6 nam lài, ồng geh Gah đơng lam Mpồl ling sền gàr tiah nhàr lơgar jờng rơ là “cau geh bơngă pin dờn geh pơn rơ jak tiah nhàr lơgar, bồt dà lềng” tàm broă lơh “Anih kơldìng ƀòn lơgar dê”. Ồng Điểu Dray là Cau lam bồ Jơnum atbồ is gùng nhàr lơgar tàm Quảng Trực. Ồng jơh nùs pơgồp bal mờ mpồl ling sền gàr tiah nhàr lơgar lòt sền, sền gàr tiah nhàr lơgar, sùm mblàng yal làng bol in bañ iat, bañ đòm jơnau bol ờ niam, jơh nùs tus bal srơh “Jơh gùt làng bol tus bal sền gàr gơnoar tờm ù tiah, lơngăp lơngai tiah nhàr lơgar”. Ồng Điểu Minh Nhật, Phó Củ tịc Anih duh broă mặt trận dà lơgar, Ƀí thư Đoàn ơruh pơnu Kộng sản Hồ Chí Minh sàh Quảng Trực pà git, ồng Điểu Dray là krơh niam pơn rơ ngan ai rơnàng kơnòm să in đòm jat:

“Đoàn sàh pơgồp bal mờ ală ƀòn, jơnum sền gàr gùng nhàr lơgar bal mờ Pôs đồng ling sền gàr tiah nhàr lơgar sền gàr rơndap tap sèng lơngăp lơngai tiah nhàr lơgar. Ồng Điểu Dray gam pơgồp bal mờ Đoàn ơruh pơnu sàh bơyai lơh tìp mat lơh kwèng cing mồng, mblàng yal ơruh pơnu sền gàr niam chài, lơh jat adat boh lam, sền gàr brê, bañ iat jơnau pơn jồ lòt lơh broă tìs adat boh lam”.

Ală broă lơh ngan kơ̆ dơn bơh ồng Điểu Dray dê neh pơgồp bơnah dong ƀòn Bu Prăng 1, sàh tiah nhàr lơgar Quảng Trực, càr Lâm Đồng gàr kơ̆ lơngăp lơngai rơndap tap sèng, bơtàu tơnguh lơh sa, sền gàr bơta niam chài. Să tờm ồng Điểu Dray uă dơ̆ geh ală kâp gơnoar atbồ mờ mpồl ling sền gàr tiah nhàr lơgar jờng rơ tài geh cồng nha jak ngan tàm broă lơh hòi jà làng bol, bơt bơtàu ƀòn lơgar pa mờ sền gàr tiah nhàr lơgar.