Bơh lồi nam lài tus tŭ do, tŭ trồ mang tus, gùng lòt bê tông lă jòng gùt dar ƀòn Nú, sàh Ia Nan, càr Gia Lai àng is kơnờm ală ƀong đèng năng lượng mat tơngai. Kơnòm dềt chờ hờp nhơl ñiŏ, cau dờng rê lơh broă bơh tàm sre mìr rê kung geh sòl àng sơl, gàr niam bơta lơngăp lơngai. Trồ mang geh đèng sòl àng, oh H’ Oanh gam bal mờ 1 mpồl lòt jơng tus hìu niam chài chờ hờp đơs:“Lài do tŭ ờ hềt geh đèng năng lượng bơh kông ty dong kờl den ală kòn ùr bol añ lòt gùng rơngòt ngan. Bơh tŭ geh ồs đèng bol oh gơ lơh gŏ iang nùs”.

Bal mờ Ia Nan, uă sàh jat kềng gah tiah nhàr lơgar đah mat tơngai mut càr Gia Lai kung geh ală mpồl lơh broă bơh Ling mpồl 15 lam lơh broă lơh “Sơrmañ sòl àng ƀòn lơgar”. Nam 2024, Ling mpồl neh bơcri priă lơh gùng đèng sòl àng jòng 23 kơi sồ, kờp jơh priă tă lơh rlau 1 tơmàn 500 tơlak đong. Tus nam 2025, tơngai dơ̆ 2 bơh broă lơh dê pơn jat tai geh lam lơh tàm uă thôn, ƀòn kal ke tàm tiah nhàr lơgar, mờ kờp jơh bơta jòng rlau 10 kơi sồ. Tàm sàh Ia Mơr, kra ƀòn ồng Ksor H'Blâm ngoh rơngăc pà gĭt:“Kra ƀòn den chờ hờp ngan rao, làng bol chờ hờp ngan, gùng lòt geh sòl àng rao. Lòt lơh broă, lòt còr bơsơ̆t kao su, halà lòt tiah lơi geh đèng sòl àng gùng lòt den brơn brài ngan”.

Đại tá Nguyễn Chí Kiên – Ƀí thư Đảng ủy, Phó Kwang lam bồ Kông ty 72, Ling mpồl 15 pà gĭt, ală broă lơh sòl àng mờ năng lượng mat tơngai ờ mìng dong ală ƀòn lơgar tiah nhàr lơgar sơlơ dờng niam, dong kờl ƀòn lơgar bơt bơtàu rài kis niam chài mờ lơh sir ală broă jàu ƀòn lơgar pa lơm mờ gam pơgồp bơnah sền gàr lơngăp lơngai, rơndăp tăp sèng, tơrmù ƀà rềs àr mpồl bơtiàn mờ tơrmù uă rềs àr gùng lòt rê: “Bơh tŭ geh ală broă lơh sơrmañ sòl àng ƀòn lơgar tàm tiah geh ală mpồl ling bơh Ling mpồl 15 dê lơh pôs đồng tàm do den  ndrờm pơgồp bơnah kwơ màng ngan tàm sền gàr lơngăp lơngai rơndăp tăp sèng, gàr niam bơta niam jak tàm gùng lòt rê”.

Bơh ală ƀong đèng bal hiă ngan, broă lơh “Sơrmañ sòl àng ƀòn lơgar” ờ mìng sòl àng gùng lòt ƀòn lơgar lơm mờ gam sòl àng bơta pin dờn, bơta kơ̆p kờñ bè dùl rài tơnơ̆ do hờm ram, gơ gơs cơng tàng kis niam ngan ai nùs nhơm ling klàng làng bol đềt mềr kơ̆ ngan tàm tiah nhàr lơgar càr Gia Lai dê.