Gơwèt mờ lŏ Phạm Thị Thu Hằng tàm sơnah ƀòn Tân Lập, càr Dăk Lăk dê, ală phan krơi is geh pơnrơ ngan càr dê bè: kơphe, plai màk, plai ƀơ, ờ mìng là phan geh lơh bơh broă lơh sa suơn sre, lơh gơs phan sa dê. Cau bơceh lơh măt kă bro phan bơka să Pơ Lang neh jào ală phan geh lơh bơh broă lơh sa suơn sre, phan krơi is do geh rài kis pa, drơng gàr broă bơka niam să jan. Tơnơ̆ 5 nam bơh tŭ sơn đờm mŭt lơh broă, lŏ neh kơlôi sơnơng bơceh lơh 11 jơi phan geh bơh phan krơi is ƀòn lơgar dê, geh cau ngui kờñ ngan. Lŏ Phạm Thị Thu Hằng pà git, ai bơh tàm phan geh is ƀòn lơgar dê rơ̆p là bơta pràn bơh mpồl bơtiàn sơn đờm mŭt lơh broă dê: “Bơtàu tơnguh ală bơta phan geh lơh gơs nền nòn bơh phan geh lơh bơh broă lơh sa suơn sre ƀòn lơgar dê mờ wèt tus lơh gơs phan tơlir niam, lơh sa tơlir, ngui tơlir. Tàm broă sơn đờm mŭt lơh broă bol añ dê, den bol añ đơs là dùl broă pal geh lơh mờ bơh ală rơndăp broă dong kờl mpồl lơh sa kă bro lơh gơdờp tus mpồl bơtiàn kung bè ală mpồl lơh sa kă bro tơlir, priă jền tơlir, priă jền kơl jăp”.

Gơwèt mờ cau ùr kòn cau Rơglai, K’ Ho mờ Prum kis tàm sàh Phan Sơn, càr Lâm Đồng, phan sa Kataya là phan sa ờs mờng ngan. Mơya mờ mpồl lŏ Tạ Huyền Thuật dê, do là anih kơl dìng kwơ màng nàng lơh geh broă sơn đờm mŭt lơh broă. Kung gam ai ka, boh bơh dà lềng ƀòn lơgar dê, mpồl bơh lŏ Thuật pơgồp bal mờ phan tĕ, phan lơh sơnơm tàm ƀòn lơgar dê; lơh niam wơl bơta bơkah, sền gròi măt phan geh lơh, nàng gơs phan kă bro geh cau ngui sa uă. Lŏ Tạ Huyền Thuật pà git, phan sa Kataya ờs mờng tŭ do neh gơs măt phan kă bro, cèng geh uă bơta niam tàm broă lơh sa. “Phan bol añ lơh geh cèng bơta bơkah bơh brê bơnơm dê, tài bol añ ai bơh ală nha phan lơh sơnơm tàm brê lơh gơs phan sa do. Bol añ sơnđan do là “Pha sa bơkah bơh brê bơnơm dê-Nùs nhơm cau ƀòn lơgar dê”, mờ gùng dà broă lơh “Phan sa ƀòn lơgar ròng kis rơnàng tơnơ̆ do”. Tài bơh phan sa do, geh uă oh mi cau ùr, tàm hơ̆ uă ngan là ală cau mè gam ròng kòn dềt lài do mờ geh broă lơh, tŭ do neh geh broă lơh kơl jăp, pin dờn tai mờ geh dơ̆ niam nàng bơtàu tơnguh jŏ jòng”.

Kung ndrờm mờ tàm gah gùng lòt, ală gơl gùng ù gam geh ai lơh gơs gùng dờng, phan kwơ geh is tàm ù tiah càr Dăk Lăk kung rơhời geh mpồl bơtiàn sơn đờm mŭt lơh broă ai lơh, bơtàu tơnguh gơs măt phan kă bro. Bi Lê Anh Thông, dùl starup mờ broă lơh phan kơnrồ-iar gơlòt bal tàm sàh Sơn Hoà đơs là, kơnrồ rơmit tàm ƀòn, iar ri sơntìl lài do kung rơ̆p geh ngui bơta kwơ krơi is tŭ geh bơtàu tơnguh tàm broă lơh jŏ jòng di pal. Mơya, nàng mùl màl pờ geh ală gùng gơs phan kă bro pa, pal lơh di pal bè priă mờ cau lơh broă geh ndrờm bal: “Kal ke uă ngan tŭ do là ờ tơl priă, tus bal mờ ală broă dong kờl lơh sa suơn sre gam kal ke; dơ̆ bàr là ờ tơl cau lơh broă nàng lơh broă bal. Añ kơ̆p kờñ geh Dà lơgar sền gròi dong kờl bè priă, yal phan geh lơh tàm ală anih yal tơngit ƀòn lơgar dê, mờ ai geh bơta niam nàng bơyai lơh sa tơrgùm bal, geh tai uă hìu làng bol tus bal, pơgồp bal tàm broă bơtàu tơnguh lơh sa kơl jăt ai tiah do in”.

Tiah tàm gùl lơgar mờ Tây Nguyên, tiah geh uă bơta niam chài, uă bơta phan kwơ bơh brê bơnơm mờ dà lềng dê, gam geh lơh pràn mờ nùs nhơm bơceh lơh, nùs nhơm kơ̆p kờñ lơh pas, prăp gàr bơta niam chài mờ sền gàr tiah kis. Ală phan bè phan bơka să geh lơh bơh plai ƀơ, kă bŏ Kataya ha là broă lơh kơnrồ rơmit gơlòt bal… pà gŏ di lah git pơgồp bal bơta ngăc ngar mờ phan geh bơh ƀòn lơgar  dê, ală bơta phan kwơ ờs mờng di gơlan lơh gơs phan kă bro pa, geh anih tăc tàm drà kă bro.