VOV4.K’ho- Priă năc dồs bơh Ngân hàng Agribank Dăk Lăk dê tŭ do neh sơrlèt uă rlau 16 rbô tơmàn đong, tàm hơ̆ rlau 70% tơrgùm tàm gah broă lơh cau lơh broă sa, lơh broă sa sươn sre mờ ƀòn lơgar. Ală nam do, priă càn do neh dong kờl uă ngan ai ală hợp tak xã, mpồl lơh sa kă bro, hìu bơnhă cau lơh broă sa bơtàu tơnguh lơh sa, tơnguh uă priă lơh geh, lơh tam gơl niam mờ bơtàu tơnguh rài kis.

Ồng Nguyễn Văn Diên là dùl nă cau lơh broă pas sơm ngan tàm thôn Nam Hoà, xã Dray Bhăng, kơnhoàl Cư Kuiñ, càr Dăk Lăk dê, yal: Hìu bơnhă ồng bơh càr Nghệ An mŭt ndo bơh nam 1994. Ù tiah dờng ơning ơnàng, geh bơta mờng chài ròng phan mơya ờ geh priă nàng blơi kơnrồ ròng. Jŏ jòng tus dì nam 1998 den ồng hơ̆ sồng geh ngân hàng pà càn dùl bơnah priă rê blơi kơnrồ nàng ròng. Sùm tàm rlau 20 nam do, wàng kơnrồ bơh hìu bơnhă ồng dê tŭ lơi kung geh bơh 40 tus 50 nơm kơnrồ puăc, kơnrồ me. Mờr 25 nam do, ùr bơklau ồng Diên là cau càn priă sùm mờ geh bơngă pin dờn bơh ngân hàng dê. Ồng Diên yal: Kơnờm geh priă càn bơh ngân hàng dê mờ hìu bơnhă geh rài kis ngai sơlơ pas sơm bơtàu tơnguh: Bơh priă càn bơh Ngân hàng Agribank dê, pơgồp bal mờ priă bơh hìu bơnhă dê di pơgăp bơh 2 tơmàn tus 2 tơmàn mờ nggùl. Hìu bơnhă ròng uă phan ròng, ròng lơh lơmă tơnguh tai uă kơnrồ ròng lơh puăc mờ kơnrồ me. Pah nam, kờp jơh priă tă apah cau lơh broă, phan tơn siam kơnrồ in, hìu bơnhă geh cồng rlau 300 tơlak đong. Añ gŏ bơtàu tơnguh bè ròng phan hìu bơnhă, den rài kis geh tơl ngui tơl sa ngan.

Ồng Nguyễn Văn Diên là dùl nă cau lơh broă pas sơm ngan tàm thôn Nam Hoà, xã Dray Bhăng, kơnhoàl Cư Kuiñ, càr Dăk Lăk dê

Ồng Nguyễn Văn Tĩnh, Kwang ătbồ Ngân hàng Agribank kơnhoàl Cư Kuiñ pà gĭt: Tàm khà 835 tơmàn đong cau năc gam dồs tŭ do bơh ngân hàng dê, geh tus 97% bơh 4 rbô 200 nă năc càn dê là cau lơh broă sa sươn sre. Khi càn priă nàng bơcri priă ròng phan puan jơng, sơngka sền gàr sầu riêng, kơphê, tiêu. Cau càn priă geh ai priă càn tơn tàm ngai, bơta do lơh geh di tŭ bơta jăt tơngai kàl bè phơng sih, sơnơm sền gàr phan tam, sơntìl phan tam phan ròng den tàng ờ gơlik geh jơnau khi lòt càn priă đah bơdìh gơtìp cau sa priă cồng uă.

 Hìu bơnhă ồng Nguyễn Doãn Thi ơm tàm thôn 2, xã Băng Adrênh, kơnhoàl Krông Ana bơtàu tơnguh lơh sa kơnờm bơh priă càn bơh Agribank Dăk Lăk dê. Kàl sầu riêng nam do, hìu bơnhă ồng geh lơh 25 tấn plai; tŭ do neh tơnhàu geh nggùl, tăc mờ giă 48 tơlak đong dùl tấn. Bal mờ hơ̆, hìu bơnhă ồng gam ròng sur tăc puăc, pah nam tăc pơgăp 30 tấn sur lơh puăc. Ồng Nguyễn Doãn Thi, yal: Hìu bơnhă añ là dùl nă cau sùm càn priă bơh Ngân hàng Agribank dê. Lài do, càn dùl êt nàng bơcri priă, tơnơ̆ do den añ tơnguh rơhời priă lơh geh is mờ priă càn tai bơh ngân hàng dê nàng bơcri lơh sa, ròng phan. Priă càn bơh ngân hàng Agribank dê neh dong ai hìu bơnhă añ in bơcri nàng bơtàu tơnguh lơh sa ƀươn ƀoài rlau. Bơh bơcri priă blơi, bè: phơng sih, phan ngui tàm broă lơh sa sươn sre, măy mok, phan bơna ală bơta đơs bal kung di tơl sơl. Làng bol tiah Băng Adrênh do den broă càn priă đah bơdìh gơtìp cau sa priă cồng uă dùl êt mơ, mìng là khi càn ngân hàng lơh broă sa sươn sre dê lơm.

Ồng Nguyễn Doãn Thi ơm tàm thôn 2, xã Băng Adrênh, kơnhoàl Krông Ana gam tàm tơngai tơnhàu plai sầu riêng

Lơh broă rlau 10 nam do, Hợp tak xã drơng broă lơh broă sa sươn sre Thanh Bình tàm xã Dur Kmăl, kơnhoàl Krông Ana ngai sơlơ kơ̆ kơl jăp rlau, cèng wơl bơta kwơ ngan ngồn ai cau tàm hợp tak xã mờ cau lơh broă sa tàm tiah do in. Kwơmàng, tơngai rềp ndo, măt kă bro phe Thanh Bình- Krông Ana bơh Hợp tak xã dê tăc tàm drà tàm càr mờ bơdìh càr. Do là cồng nha broă lơh tơrlòng lài lơh gơlik kòi phe sàng goh mờ bơkah jăt tơl jơnau sồr bơh VietGap dê. Phan bơna lơh geh bơta sàng goh bơkah ngan, ờ gŏ geh jơngkah sơnơm sền gàr phan tam, cau ngui sa pin dờn mờ săc rwah. Ồng Nguyễn Văn Sanh, Kwang ătbồ Hợp tak xã Thanh Bình, đơs: Bơh nam 2009 neh càn priă ngân hàng dê rao. Ngân hàng Agribank neh dong kờl, nam hơ̆ den càn 400 tơlak đong. Tŭ do, hợp tak xã gam dồs ngân hàng dê neh là 3 tơmàn đong rao. Chờ hờp ngan tŭ mờ ngân hàng dong kờl ai càn priă den Hợp tak xã bơtàu tơnguh pràn ngan. Jơh ală broă lơh ndrờm kờñ pal geh priă jền, mờ priă den tàm ală cau tàm hợp tak xã kal ke ngan kung pal càng mờ kơnờm mờ ngân hàng sơl. Bơta bơcri priă blơi bơh phơng sih, sơnơm sền gàr phan tam kung kờñ ngan priă jền sơl, kờñ tus ngân hàng ai càn priă nàng lơh broă.

Broă lơh mhar sră pơ àr càn priă neh ai tơl bơta ƀươn ai cau bơcri priă in

Dùl tàm ală jơnau gơ sồr tàm Kơrnoăt 19 bơh Pơrjum dơ̆ 5 Ƀan Cấp hàñ Đảng Dà lơgar khoă XIII dê bè lơh broă sa sươn sre, cau lơh broă sa mờ ƀòn lơgar tus nam 2030, gùng dà tus nam 2045 hơ̆ là lơh sir kơrnoăt boh lam, gùng dà broă lơh bè lơh broă sa sươn sre, cau lơh broă sa mờ ƀòn lơgar. Tàm hơ̆ geh đơs wih đơs wơl tus pơn jăt tai lời priă ai càn ờ sa priă cồng uă, hòi jà ală ngân hàng ai càn priă gơwèt mờ lơh broă sa sươn sre, cau lơh broă mờ ƀòn lơgar; dong kờl ai càn priă ai hợp tak xã, mpồl lơh sa kă bro, hìu cau lơh broă sa tàm ƀòn lơgar bơtàu tơnguh lơh sa kă bro in.

Ồng Vương Hồng Lĩnh, Kwang ătbồ Ngân hàng Agribank Dăk Lăk, pà gĭt: Bè gùng dà broă lơh ai càn priă bơtàu tơnguh lơh broă sa sươn sre ƀòn lơgar in, den Agribank càr Dăk Lăk neh bơcri priă ai càn tàm càr in mờ khà priă cau năc gam dồs ngân hàng dê là rlau 70% tàm kờp jơh priă cau năc gam dồs. Tŭ do, kờp jơh priă cau năc gam dồs bơh broă lơh bơtàu tơnguh lơh broă sa sươn sre ƀòn lơgar tàm Ngân hàng Agribank Dăk Lăk neh rlau 11 rbô tơmàn đong. Tàm do kung tơngŏ là, gơnoar broă bơh Agribank Dăk Lăk dê là mpồl ai càn priă ngân hàng kă bro dà lơgar dê neh lơh jăt Kơrnoăt sồ 19 pơrjum dơ̆ 5 bơh Ƀan Câp hàñ Đảng Dà lơgar khoă XIII dê geh lơh ngan ngồn, gơlòt mŭt tàm rài kis bè bơtàu tơnguh lơh sa lơh broă sa sươn sre, hợp tak xã mờ ală cau dùl nă să is, mpồl cau in nàng bơtàu tơnguh gah lơh broă sa sươn sre tàm ù tiah càr Dăk Lăk dê.

            Cau cih Lê Xuân Lãm- Cau mblàng Lơ Mu K’Yến