VOV4.K’ho- Ơ làng bol mờ gơ̆p bơyô! Dùl tàm ală jơnau sồr gơ ai tơlik tàm Kơrnoăt sồ 19 bơh Pơrjum dơ̆ 5 Ƀan Câp hàñ Đảng Dà lơgar khoă XIII dê bè lơh broă sa sươn sre, cau lơh broă sa mờ ƀòn lơgar tus nam 2030, gùng dà tus nam 2045 hơ̆ là lơh sir kơrnoăt boh lam, broă lơh bè lơh broă sa sươn sre, cau lơh broă sa, ƀòn lơgar. Tàm hơ̆, đơs sùm tus pơn jăt tai ai priă càn dong kờl priă cồng hòi jà ală ngân hàng ai càn priă gơwèt mờ lơh broă sa, cau lơh broă sa mờ ƀòn lơgar; dong kờl ai càn priă ai hợp tak xã, mpồl lơh sa kă bro, hìu bơnhă ƀòn lơgar bơtàu tơnguh lơh sa, kă bro...Tàm Kơrnoăt sồ 29, dùl dơ̆ tai đơs sùm tus gơnoar broă bơh Agribank dê, Ngân hàng Cíñ sac Xã hội dê pơn jăt tai lơh niam tàm broă ai càn priă gơwèt mờ ală hìu bơnhă lơh sa sươn sre, ngan là hìu bơnhă rƀah mờ ală cau cíñ sac; kơryan mờ bơsong kràñ ai càn priă sa priă cồng uă.

Sền wơl gùng lòt jòng rlau 34 nam crơng gơs mờ bơtàu tơnguh, bơta tă pơgồp bơh Agribank dê bal mờ gơnoar broă tờm tàm drà kă bro priă jền mờ ai càn priă ai lơh broă sa, cau lơh broă sa, mờ ƀòn lơgar in tŭ ngân hàng sùm gàr sùm khà tàm pơndrờm bơcri priă “Lơh broă sa, cau lơh broă sa, mờ ƀòn lơgar in” geh tus mờr 70% tàm kờp jơh priă ai càn ai rài lơh sa in, geh tus khà uă ngan rlau jơh tàm bơnah drà ai càn priă bơcri lơh broă sa sươn sre, ƀòn lơgar in tàm Việt Nam geh bơta kwơ bè lơh sa, cíñ trị mờ mpồl bơtiàn jrô ơnàng ngan. Kơnờm priă ai càn bơh Agribank dê, cau lơh broă sa mờ ƀòn lơgar sơnđờm bơtàu tơnguh tơn jơh broă mìng tam dùl bơta chi tam lơm, tam gơl rơndăp tăp sèng mờ cau lơh broă sa, là ală “cau bơyô lòt bal” bơh Agribank dê ngai sơlơ dờng pràn, gĭt sơrlèt gan is bơta jơgloh rƀah mờ brồ guh tus lơh pas tơn tàm bă ù ƀòn tờm he dê tơn.

Mờ kơnòl broă drơng broă bơtàu tơnguh lơh broă sa, cau lơh broă sa mờ ƀòn lơgar, Agribank sùm lam lài, là ngân hàng tờm lam lơh geh cồng nha ală broă lơh ai càn priă dong kờl priă cồng, 02 broă lơh jơnau kờñ dà lơgar bè bơ̆t bơtàu ƀòn lơgar pa mờ tơrmù rƀah kơ̆ kơl jăp. Tŭ do, Agribank geh rlau 200 phan bơna drơng broă ngân hàng ƀươn kwơ ngan, geh tă pơgồp uă ngan bơtàu tơnguh drà tơm priă ờ ngui priă măt, tơnguh uă bơta tơl pràn lơh drơng broă ngân hàng ai rài lơh sa in, kwơmàng là tàm tiah lơh broă sa, ƀòn lơgar. Rlau 34 nam bơ̆t bơtàu mờ bơtàu tơnguh, Agribank neh gàr geh sùm bơta gơguh tai kơ̆ kơl jăp jơh bal bè broă lơh, rơndăp tăp sèng, bơta niam mờ cồng nha lơh broă. Kờp tus nhai 06 nam 2022, kờp jơh priă hòi jà pơyua priă bơh Agribank dê lơh geh rlau 1 tơlak 620 rbô tơmàn đong, dồs ai càn rài lơh sa in geh rlau 1 tơlak 390 rbô tơmàn đong. Tàm hơ̆, dồs ai càn lơh broă sa, ƀòn lơgar in geh rlau 896 rbô tơmàn đong, geh tus mờr 70% kờp jơh priă ai càn. Mờ bơnàng jă priă jền kơ̆ kơl jăp, ngân hàng sùm lòt bal mờ cau lơh broă sa tàm làm gùt ù tiah Dà lơgar dê, ai tơl priă càn drơng bơtàu tơnguh lơh sa kă bro. Bal mờ ai tơl priă càn, mờ uă broă lơh bơceh pa, geh cồng nha, dipal mờ tơl tŭ tơngai bơtàu tơnguh ngan ngồn, Agribank dong làng bol, ngan là tiah sar lơgar ngài geh càn priă ƀươn ƀoài rlau bal mờ anih priă jền kờñ ngan, bơtàu tơnguh uă rài kis mờ bơtàu tơnguh lơh sa, kă bro, pơgồp bơnah uă ngan tơrmù jơnau ai càn priă sa priă cồng uă.

Tềng đăp ală gơl gùng pa bơh rài lơh broă sa dê đơs is mờ lơh sa dà lơgar dê đơs bal, bulah tìp uă kal ke, bơta lòng, kwang đơng lam bồ Agribank đơs nền, ngân hàng kơ̆ dơn nùs nhơm jơnau kờñ bơtàu tơnguh lơh broă sa, cau lơh broă sa mờ ƀòn lơgar, sùm lơh ngan tơrgùm tê bal bal mờ Cíñ phủ, Ngân hàng Dà lơgar, pơn jăt tai lơh gơlik geh ală bơta bơtàu tơnguh pràn kơldang tàm broă lơh sền gàr rài kis làng bol in, ngan là cau lơh broă sa mờ bơtàu tơnguh lơh broă sa, ƀòn lơgar bơh lơgar he dê tàm rài pa. Tàm broă lơh bơtàu tơnguh bơh he dê, ală jơnau kờñ dờng sùm geh Agribank gĭt nền ai lơh lài, hơ̆ là: Lam lài lơh jăt ală gùng dà, broă lơh bơh Đảng mờ Dà lơgar dê; Pơn jăt tai gàr gơnoar broă tờm, pràn tàm drà kă bro priă jền ƀòn lơgar, sùm là cau bơyô lòt bal dòn song, pin dờn bơh cau lơh broă sa, ƀòn lơgar dê.

Sùm pờ ơnàng bè mpồl lơh broă, ală Agribank kwơmàng lơh tus tơn tàm ală tiah sar lơgar ngài, ală ƀòn lơgar lơh broă sa, ƀòn lơgar bơh jơh gùt lơgar dê nàng kờñ lơh geh di tŭ jơnau kờñ càn priă mờ ngui ală drơng broă ngân hàng bơh làng bol dê tàm jơh gùt lơgar...Lơh jăt nền nòn jơnau sồr bơh Cíñ phủ mờ Ngân hàng Dà lơgar dê, Agribank sùm jăt sền broă gơlik geh, bơta gơbàn bơh kòp bơtờp dê, trồ tiah lơh aniai, mơkung pơn jăt tai lam lơh jăt ngan ngồn, geh cồng nha ală broă lơh dong kờl cau càn priă gơtìp gơrềng tài bơh kòp Kovid-19, trồ tiah lơh aniai, hoàc hươr ờ gơtùi pleh klàs gơrềng tus lơh broă sa sươn sre....Bal mờ hơ̆, Agribank geh pơn jăt tai ai tơl bơta ai cau càn priă gơtìp gơrềng in tìp kal ke tàm broă lơh sa, kă bro, ngan là mpồl lơh sa kă bro di mơ mờ dềt, mpồl lơh sa kă bro gơwèt ală gah broă lơh kong gơrềng kơn jơ̆ ngan tài bơh kòp Kovid-19 mờ mpồl lơh sa kă bro geh ală mpồl ătbồ niam, geh tơl pràn bơtàu tơnguh wơl lơh sa, kă bro niam; Sùm rơcăng lài, sùm sùm kờp sền nàng geh ală broă lơh dipal mờ tơl nă cau càn priă tàm tơl jơh tŭ tơngai.

Cau mblàng Lơ Mu K’Yến