VOV4.K’ho- Ngai 23/9, tàm ƀòn dờng Dà Làc, Anih tờm pơlam broă lơh sa dà lơgar pơgồp bal mờ Sở Nông nghiệp mờ Phát triển Nông thôn càr Lâm Đồng bơyai lơh cribơyai pơlam broă lơh sa suơn sre mờ tơngume “Ngui gơguh jak kỹ thuật tàm bơtàu tơnguh lơh sa suơn sre ngac ngar gơ dờp mờ tam gơl trồ tiah”.

Rlau 150 nă kwang bàng là ală kwang bàng atbồ, cau jak chài gah lơh sa suơn sre, ala mat ală hợp tak xã, mpồl lơh sa kă bro mờ làng bol lơh broă sa tàm 7 càr, ƀòn dờng neh tus bal. Ală cau jak chài, cau atbồ, ala mat hợp tak xã, mpồl lơh sa kă bro mờ cau lơh broă sa bơh ală càr Lâm Đồng, Phú Yên, Khánh Hòa, Thừa Thiên Huế, Đà Nẵng, Đồng Nai mờ ƀòn dờng Hồ Chí Minh neh lời uă tŭ jơ nàng cribơyai ală tơngume bè bơtàu tơnguh lơh sa suơn sre kông nghệ kao jat gùng dà ngac ngar, dong rơcang lài tàm broă lơh sa, bơsong bơta lơh jat kàl, tơrmù bơta gơ wèt tàm trồ tiah mờ lơh jat niam jơnau kờñ bơh drà kă bro dê bè bơta niam phan lơh gơs. Tàm hơ̆, đơs tus uă ngan rlau jơh là ală kơrnuat, broă lơh dong kờl nàng bơtàu tơnguh lơh sa suơn sre ngac ngar; bơta rơndap ù tiah, bơcri priă bơt bơtàu phan bơna, ală broă lơh bè khoa học kông nghệ, priă bơcri kung bè bơtàu tơnguh cau lơh broă, bơta chài ngui mờ lơh tờm măi mok tàm gah lơh sa suơn sre.

Cau mblàng K’Duẩn