Tàm tê cèng điện thoại ngăc ngar mờ bơh bàr, pe broă lơh ƀuơn bè kŭp rùp, cih jơnau tơrgùm bal phan geh lơh, tiah tam, khà priă, broă dong kờl, ồng Đồng Xuân Liền, Kwang atbồ Hợp ták xã Nam Bình, kơnhoàl Dăk Glong, càr Dăk Nông neh tơmŭt geh gar tiêu jù tăc tàm drà kă bro điện tử Postmart. Ồng Liền pà git, 2 nhai lài Mpồl làng bol lơh broă sa càr mờ Bưu điện càr neh pơgồp bal lơh dùl dơ̆ bơto ai ală hợp ták xã in nàng ai phan geh lơh bơh broă lơh sa tăc tàm drà kă bro điện tử.

Làng bol lơh broă sa tàm càr Dăk Nông ờ pal lik tàm drà nàng tăc, ơm tàm hìu, pờ điện thoại kung gơtùi tăc tàm drà kă bro điện tử

Lài ngan ồng bal mờ ală cau tàm hợp ták xã ờ git, mơya mờ broă bơto nền nòn jơh nùs, tŭ do broă tơmŭt phan geh lơh bơh ồng dê tăc tàm pang tăc phan điện tử neh ƀuơn ngan mờ lài ngan neh ai gŏ ờ uă cau kờñ blơi, ồng chờ hờp ngan: “Bơh dơ̆ tus bơsram rê, kơlôi kờñ git tàm pang sră bơsram mờ kơnờm oh kòn bơto tai, den dơ̆ sơnrờp añ geh tơmŭt phan geh lơh bơh hợp ták xã tăc tàm drà kă bro điện tử añ chờ hờp ngan. Tơnơ̆ mờ dùl tơngai ờ jŏ neh geh cau dan blơi, bŭ lah ờ hềt geh uă, mơya neh geh sră cau dan blơi phan bơh hợp ták xã, do là bơta chờ hờp ngan”.

Bơh tŭ tam gơl gơs gah tăc phan điện tử, mò Nguyễn Thị Ngọc Sen kis tàm sơnah ƀòn Nghĩa Đức, ƀòn dờng Gia Nghĩa ờ gam pal lòt tăc rơpung jàl bè lài do tai. Mò pà git, lài do, plai rơpung jàl tam geh mìng geh tăc mờ ală hìu tăc phan ha là tus tăc tơn mờ ală cau neh git lài. Bơh tŭ tus bal drà kă bro điện tử hìu nhă mò mìng pĭc, klơm niam geh cau lơh broă Bưu điện tus dờp, pơn diang jào cau blơi in. Jơnau cih tàm drà kă bro điện tử bơh mò Sen pà gŏ, ală plai rơpung jàl bè: Kim Long, Hoàng Long, Kim Hoàng Hậu… geh tam tàm hìu krơh jăt khà VietGAP. Broă sền gàr, phơng sih, dà tuh... geh lơh jăt broă tuh dà ntờc. Sơrlèt mờ bơta ờ git lài ngan bè kông nghệ, mò Sen chờ hờp tŭ ală phan geh lơh mò dê neh mŭt tàm drà kă bro geh cồng nha, geh bơta niam tus mờ ală cau blơi tàm ù ơnàng rơlao: “Geh Mpồl cau lơh broă sa càr jà tus pơrjum cri bơyai gơs, hơ̆ sồng git tơmŭt plai rơpung jàl tăc tàm drà kă bro điện tử Postmart Dăk Nông. Kung là chờ hờp ngan, tơrbŏ bal phan bơh añ dê tus hờ bơdìh càr nàng phan geh lơh añ dê ngai sơlơ gơguh. Tŭ do, dùl kàl tăc geh 1 tấn nggùl, mơya kơ̆p kờñ tơnơ̆ do den dùl kàl pal tăc geh bơh 4 tus 5 tấn den hơ̆ sồng priă geh añ dê gơguh”.

Ai phan tăc tàm drà kă bro điện tử geh dong kờl làng bol lơh broă sa tàm càr Dăk Nông geh tai anih tăc phan geh lơh, rơcang rơlao tàm broă jòi drà tăc phan

Geh bal tàm broă lơh pràn tam gơl sồ tàm broă lơh sa suơn sre, Mpồl cau lơh broă sa càr Dăk Nông neh pơgồp bal Bưu điện càr bơyai lơh bơto ai làng bol lơh broă sa in tàm broă tơmŭt phan kă bro mŭt tàm drà kă bro điện tử Postmart. Tơnơ̆ mờ ơdŭ bơto mờ geh ală dơ̆ bơto sồr, dong kờl tơn, tus tŭ do neh geh 38 bơta phan bơh 28 hìu lơh sa tàm càr geh cih khà măt kă bro tàm anih kă bro gah bưu điện dê. Ồng Hồ Gấm, Củ tịc Mpồl làng bol lơh sa càr Dăk Nông pà git, tŭ do, làng bol lơh broă sa bal mờ ală hợp ták xã, mpồl lơh sa kă bro gam tìp uă kal ke bè1 broă geh lơh broă bal mờ kông nghệ thông tin, sră nggal dờp ală jơnau kờñ niam phan geh lơh nàng tơmŭt tàm drà kă bro điện tử. Den tàng, broă dong kờl làng bol lơh broă sa mờ ală hợp ták xã tŭ do geh kwơ ngan: “Bol añ kơ̆p kờñ là lài ngan jơh ală phan geh lơh geh jơnau kờñ dờp phan OCOP den pal pal geh tơmŭt tàm drà kă bro, geh sền tơl bơta niam mờ geh khà uă, geh bơta pràn tàm lơh sa. Rơhời he pal ai jơh ală phan mŭt tàm drà kă bro nàng geh tăc, cri bơyai loh làng, ndrờm bal, ƀuơn tơrgùm, ƀuơn geh ai”.

Mŭt tàm drà kă bro điện tử, phan geh lơh bơh broă lơh sa suơn sre làng bol lơh broă sa càr Dăk Nông dê geh bơta ndrờm bal jơnau tơngit phan geh lơh, jơnau yal, tơnguh bơta niam geh cau blơi phan gŏ, mơya kung pal geh uă rơlao tai bè bơta niam, muh măt phan geh lơh. Bơh bơta do, den tàng làng bol lơh broă sa pal tam gơl broă lơh sa, sền kwơ tus tàm ală bơta niam ờ do ờ dă, tơnguh uă bơta niam phan geh lơh, prăp gàr mờ lơh tơnơ̆ mờ tŭ tơnhào niam rơlao. Geh bè hơ̆, hơ̆ sồng broă mŭt bal tàm drà kă bro điện tử mùl màl geh cồng nha, nàng làng bol lơh geh is bơta niam bơh phan geh lơh bơh să tờm dê.