Tàm càr Gia Lai, ală tiah geh kòp geh git gŏ tàm 29 hìu bơnhă ròng sur gơ wèt 24 thôn, ƀòn tàm 14 sàh. Pơn drờm mờ poh lài, khà sàh geh kòp gơguh tai 6 sàh, tàm hơ̆ 5 sàh gơ wèt tiah đah mat tơngai mut càr Gia Lai mờ 1 sàh tàm tiah đah mat tơngai lik Gia Lai geh: Ia Tul, Ia Krái, Ia Grai, Chư Sê, Ia Krêl, Tuy Phước. 

Nàng sền gròi kòp bơ tờp, tàm rlau 1 nhai do, 4 anih sền gròi kòp làm gah tàm ală gơl gùng dà lơgar tờm ngan bơh càr Gia Lai dê neh sền sơ wì mờr 900 dơ̆ rơndeh rơndồ pơndiang phan kis, tàm hơ̆ ƀồm sơnơm lơh kloh khuẩn jơh ală rơndeh lik mờ mut tàm càr. Sờh Broă lơh sa suơn sre mờ Tiah ơm kis càr Gia Lai pơn jat tai sồr ală tiah jat sền bơta bơtờp kòp, ai mẫu xét nghiệm, bơsong jơh tŭ geh tiah geh kòp pa, mờ kung mblàng yal, hòi jà làng bol crăp rơcang yal mờ lơh jat nền nòn ală broă lơh rơcang lài kơryan kòp.