VOV4.K’ho- Giă phơng sih, phan siam  phan ròng kung bè phan bơna drơng broă lơh sa sùm gơguh uă lơh uă cau lơh broă sa càr Dăk Lăk gơtìp kal ke tàm broă bơcri priă lơh sa suơn sre. Mơya, tàm uă tiah, cau lơh broă sa, mpồl lơh sa suơn sre neh “tă bơsong is” ai he in mờ broă ngui ală khà phan jơng kah bơh broă lơh sa suơn sre lời ồm nàng lơh phơng sih, lơh jat broă lơh sa suơn sre tàm pơdar nàng tơrmù ƀà priă tă tàm broă lơh sa.

Ồng Đỗ Hữu Minh ơm tàm thôn Tân Phú, xã Ea Nuôl, kơnhoàl Buôn Đôn geh rlau 2 lồ ù tam kơphê, tiêu mờ tam tàm bơrlŭ bal bàr pe tờm chi sa plai. Ồng pà gĭt, pah nam hìu bơnhă pal tă priă bơh 35 tus 40 tơlak đong blơi phơng hóa họk.

Ồng Đỗ Hữu Minh ngui jơh ală è rơpài ròng răn

 Tŭ giă phơng sih gơguh kas ir, ồng ngui ală phan jơng kah bơh broă lơh sa suơn sre geh lài tàm suơn  nàng lơh phơng sih. Rlau 1 nam do ồng ngui phơng vi siñ lơh bơh kơmhò kơphê, tiêu, lơ̆ kòi sih ai phan tam in, ờ mìng lơh niam wơl ù, sền gàr tiah ơm kis mờ gam tơrmù priă tă bơcri. Ồng Đỗ Hữu Minh đơs: Lài do ơn phơng NPK, phơng hóa họk mơya tŭ do là ngui phơng vi siñ jơh lơm. Phơng vi siñ bơh să tờm añ lơh gơlik is bơh ală phan jơng kah bơh broă lơh sa suơn sre lời ồm den gơ gơs phơng sih geh kwơ ngan. Bè phơng hoá họk pah nam sih 1  nam tàm khà priă 35 tơlak đong mơya tŭ do phơng vi siñ lơh geh is mìng roh bơh 4 tus 5 tơlak đong den neh geh suơn 2 lồ là sih mờ tuh dà suơn in là lila ngan.

Kơmhò kơphê geh cau lơh broă sa Dăk Lăk lời ồm nàng lơh phơng sih hữu kơ

Gơwèt mờ Hợp ták xã lơh sa suơn sre mờ nhơl chờ Phú Nông Buôn Đôn, kơnhoàl Buôn Đôn, den broă ngui phan jơng kah bơh broă lơh sa suơn sre drơng broă lơh gơlik wơl lơh sa neh geh cau tàm mpồl Hợp ták xã lơh jat jak ngan. Broă lơh gơlik jat dùl tŭ tơngai lơh is jơh lơm mờ jơh ală dà bơ̆ tuh bơdìh geh gơ rê wơl lơh phan ngui ai gah lơh sa in. Ồng Trần Văn Toàn, Kwang atbồ Hợp ták xã pà gĭt, broă lơh lơh sa tàm pơdar lơh gơlik geh phan bơna ờdo ờdă, geh bơta niam uă mờ ờ hoan lơh geh bơta hoàc huơr mờ ngan là tơrmù uă ngan rlau jơh dà ƀơ̆ tuh tàm tiah ơm kis. Ồng Trần Văn Toàn đơs: Nàng tơrmù priă tă bơcri den ală è phan ròng dê geh ngui nàng ròng răn den hơ̆ sồng ai răn lơh phan sa ai iar, ơda, ai ka in den geh tơrmù priă tă bơcri lơh sa. Lơh ngan pơlam làng bol cau lơh broă sa jat broă lơh tàm pơdar geh tơrmù priă tă bơcri lơh tơnguh priă lơh geh tàm tŭ phan bơna he dê lơh gơlik kung gam tơl khà ală jơnau kờñ  sơl.

Lơh sa suơn sre tàm pơdar kung là broă lơh mờ uă mpồl lơh sa kă bro tàm Dăk Lăk lơh jat gơ dờp lài mờ dơ̆ giă phan drơng broă lơh sa gơguh jơnhoa ngan bè phơng sih, mơkung wèt tus dùl rài lơh sa suơn sre tơlir mờ kơ̆ kơljap, tơrmù ƀà broă ngui phơng hóa họk, sơnơm sền gàr phan tam. Ồng Phạm Hữu Thời, Kwang atbồ dờng Kông ty TNHH lơh sa suơn sre Nhất Thống, mpồl sùm lơh gơlik phan, tăc phan mờ lơgar ndai phan lơh geh bơh lơh sa suơn sre hữu kơ dê pà gĭt: Lơh sa suơn sre hữu kơ là lơh sa suơn sre tàm pơdar lơh is jơh lơm den gơ lơh bè ết ngan gơrềng tàm giă bơh phơng sih đah bơdìh dê. Tài bơh tàm tŭ lơh gơlik lơh geh ală phơng sih, khà phan siam tàm tiah ròng phan kung gơlơh bè di pal ală jơnau sồr tờm ngan tàm broă tơl khà hữu kơ dê là pal lơh gơlik geh khà pràn bơkah phan sa tàm suơn dờng dê in uă ngan rlau jơh pal lơh geh 50% ai broă lơh ròng phan in kung bè phơng sih ai phan tam in.

  Dăk Lăk là càr geh rài lơh sa suơn sre lila ngan den khà phan jơng kah bơh broă lơh sa suơn sre là dờng ngan. Do là bơta nàng gơtùi bơtàu tơnguh lơh sa suơn sre kơ̆ kơljap jat broă lơh tàm pơdar. Broă lơh lơh sa tàm pơdar lơh gơlik geh phan bơna ờdo ờdă, niam, tơrmù uă ngan rlau jơh phan bơ̆ tuh bơdìh tàm tiah ơm kis. Ngan là tàm tơngai giă blơi ală phan drơng broă lơh sa suơn sre gơguh uă bè tŭ do, broă ngui jơh ală phan jơngkah bơh broă lơh sa suơn sre nàng lơh gơs phan lơh phơng ai broă lơh sa ndai in geh tềm pềr geh uă ngan priă tă.

Cau cih Hương Lý- Cau mblàng K’Hạnh