VOV4.K’ho- Ală bơta phan siam phan ròng in sùm gơguh giă, tàm tŭ giă sur ờ hềt lơh puăc den gam ơm sùm tàm khà lơyah ngan lơh cau ròng phan tàm càr Dăk Lăk tìp kal ke. Anih lơh broă geh gơnoar sồr tơrmù priă tă blơi phan siam phan ròng in tàm tŭ giă ròng gơs phan ròng là dùl tàm ală broă lơh kwơmàng tŭ do. Broă lơh mờr tus là ngui phan lơh phan siam phan ròng bơh ală tiah dê; tam gơl bàr pe bă ù tam phan ờ geh cồng nha nàng tam phan lơh phan siam phan ròng in.

Lài do, hìu bơnhă ồng Đinh Công Việt ơm tàm ƀòn Ea Nho, xã Cư Kpô, kơnhoàl Krông Buk, càr Dăk Lăk sùm geh bơh 15 tus 20 nơm jơrke ròng tàm wàng, priă lơh geh pơgăp 5 tơlak đong dùl nhai. Rlau dùl nam do, giă phơng sih sơnơm sền gàr phan tam gơguh jơnhoa, giă phan siam phan ròng kung gơguh jăt bal sơl, tàm tŭ giă tăc sur ờ hềt lơh puăc den gơmù wơl bơh 10 tus 20 rbô đong dùl kĭ, bơta do lơh hìu bơnhă ồng Việt tìp ờ dùl êt kal ke. Ồng Đinh Công Việt, đơs: Lài do, hìu añ ròng uă, ròng bơh 7 tus 8 nơm sur me, sur kòn deh dơ̆ lơi là geh cau blơi jơh tơn, mơya tŭ do tài bơh giă gơguh jơnhoa ir, ngan là lơ̆. Lơ̆ lài do 5 rbô đong dùl kĭ, tŭ do rlau 7 rbô đong dùl kĭ den tàng kal ke ngan, den tàng hìu bơnhă hơ̆ sồng tơrmù ƀà tĕ gơ. Tơngai tus, kal ke ir hìu bơnhă añ tam gơl ròng phan ndai, ròng phan bè do là hoàc hươr, ờ geh bè lài.

Ndrờm bè ồng Đinh Công Việt sơl, hìu bơnhă ồng Nguyễn Tuấn Anh ơm tàm thôn 5, xã Krông Buk, kơnhoàl Krông Pach kung pal tơrmù nggùl khà sur bơh he dê pơndrờm dùl tơngai bal mờ nam 2021 tài bơh ờ jai kong tềng đăp bơta gơguh uă ir bơh giă phan siam phan ròng dê. Ồng Tuấn Anh pà gĭt, bơh lồi nam 2020 tus tŭ do, giă phan siam phan ròng gơguh 13 dơ̆. Mờ khà gơguh bơh 300 tus 500 đong dùl kĭ ai pah dơ̆ gơguh in, giă bơh jơh ală phan siam phan ròng tŭ do neh gơguh rlau 6 rbô đong dùl kĭ. Ồng Nguyễn Tuấn Anh, đơs: Bè hìu añ, ròng sur me deh sur kòn mờ ròng tus sur puăc den tus tŭ tăc dilah kờp den geh priă cồng bơh 3 tus 400 dùl nơm, ai mờ dilah blơi sơntìl den mìng geh cồng bơh 150 tus 200 là jak ngan rao. Añ neh ờ huan ròng uă tai mìng ròng bơh 5 tus 70 nơm lơm, lài do, giă lơ̆ ờ gơguh den añ ròng tus 150, 200 nơm tơn.

Priă cồng ờ gŏ geh uă, cau ròng phan ờ huan ròng uă, lời gời wàng ròng

Ai ồng Lê Xuân Sáng, là cau ƀòn bal mờ ồng Nguyễn Tuấn Anh den pà gĭt, giă puăc sur tŭ do gơ gơmù wơl pơndrờm mờ giă phan siam phan ròng. Ồng Lê Xuân Sáng, đơs: Sur bơcri priă ròng den uă mơya priă cồng den kung ờ gŏ geh ngan sơl. Ñchi gơlơh bè hơ̆ taih, lơ̆ ngai sơlơ gơguh uă ngan mờ giă sur den ờ huan wơl gơguh. Mơya mờ cau lơh broă sa ờ lơh broă do den gĭt lơh broă lơi tai taih. Dilah giă phan siam phan ròng gơmù dùl êt den cau lơh broă sa kung ờ huan gơlơh ir sơl. Mờ gơguh sùm bè do den cau lơh broă sa kung bòl glar kal ke ngan sơl.

Jăt ồng Trần Ngọc Sơn, Phó Kwang ătbồ Ci kụk Ròng phan mờ Lơh sơnơm phan ròng càr Dăk Lăk đơs, kờp jơh sur tàm càr tŭ do pơgăp 680 rbô nơm. Giă sur ờ hềt lơh puăc tŭ do pơgăp 55 rbô đong dùl kĭ, ndrờm mờ 77% pơndrờm mờ giă sur ờ hềt lơh puăc tàm dùl tơngai bal tàm nam 2021, mơya giă ală bơta phan siam phan ròng den gơguh tus 40%, den tàng cau ròng sur tìp uă ngan kal ke. Ồng Trần Ngọc Sơn đơs là, cau ròng phan pal sơlơ lòt jòi, ngui jơh phan lơh phan siam phan ròng tàm lơgar mơkung tơn rŭc lơyah tŭ tơngai ală anih tam pà nàng tơrmù giă phan siam phan ròng. Ồng Trần Ngọc Sơn, đơs: Cau ròng phan pal rơcăng lài tam uă tơngời, bùm blàng, khuah nàñ, lơh phan siam phan ròng in klài bơrlŭ bal phan siam phan ròng nàng ala phan blơi bơh lơgar ndai. Bơdìh hơ̆ tai, làng bol gơtùi rơcăng lài ròng ka, ran nàng lơh gơs ƀòk nàng bơtơl đàm, tơrmù priă ròng sur, tơrmù priă tă blơi phan siam phan ròng. Bal mờ hơ̆, pal rơndăp tăp sèng wơl gùng dà lam lơh sa, pal mŭt bal tàm ală Hợp tak xã, Mpồl lơh bal, ală mpồl lơh sa ròng phan nàng cribơyai, blơi phan siam phan ròng khà uă tơn bơh ală hìu măy lơh gơlik. Bơta ndai, làng bol gơtùi kơlôi sơnơng tam gơl, rơndăp tăp sèng wơl phan ròng dipal, di mờ bơta tơl pràn, rài kis kung bè sơlơ ròng uă phan ròng sa nhơ̆t, sa tờm chi lơh sơnơm nàng ala.

Giă gơguh uă, cau ròng phan pal kơlôi ngan pah tŭ blơi phan siam phan ròng in

Pa do, tàm Hà Nội geh lơh pơrjum pờ tơn tàm internet bơyai gùng dà broă lơh dong bơtàu tơnguh ròng sur mờ tơnguh tai broă lơh ătbồ lơh broă lơh sa, kă bro phan siam phan ròng. Đơs tàm pơrjum, Thứ trưởng Ƀộ Nông nghiệp mờ Phát triển Nông thôn ồng Phùng Đức Tiến đơs là, tơrmù priă tă blơi phan siam phan ròng tàm tŭ giă lơh gơs phan ròng là dùl tàm ală gùng dà broă lơh kwơmàng tŭ do. Gùng dà broă lơh mờr tus là ngui phan lơh phan siam phan ròng bơh ală tiah dê; tam gơl bàr pe bă ù tam phan ờ geh cồng nha nàng tam phan lơh phan siam phan ròng. Mờr tus, Ƀộ Nông nghiệp mờ Phát triển Nông thôn geh pơgồp bal mờ Kông ty Trác ñiệm hữu hạn DeHeus pơgồp bal mờ ală càr tàm tiah Tây Nguyên lơh ală hợp tak xã tơrgùm mìng tàm broă tam bùm blàng mờ tơngời mờ bơta lơh bal bơh ală mpồl lơh sa kă bro dê tàm broă ngui kông nghệ nàng rơcăng lài phan lơh phan siam phan ròng, tơrmù bơta kơñ jơ̆ blơi bơh lơgar ndai. Ồng Phùng Đức Tiến, đơs: Tơnơ̆ uă nam Viện ròng phan bal mờ ală anih neh sền swì bơta kwơ phan bơkah tơl pràn bơh ală phan lơh phan siam phan ròng tàm ală tiah dê; neh ai tơlik geh ală broă pơlam lơh phan siam phan ròng mờ mblàng sền bơta kwơ phan siam phan ròng tàm bơrlŭ bal, wil tơl ală broă jàu. Cồng nha kơlôi sơnơng neh geh ngui tàm uă phan tàm broă ròng phan. Cồng nha kơlôi sơnơng do geh rề ơnàng lơh uă. Mờ broă lơh bè do den giă phan siam phan ròng gơmù bơh 300 đong tus 1 rbô đong dùl kĭ. Giă lơh gơs phan ròng gơmù geh bơh 5% tus 7%. Bol he iang nùs mờ ală gùng dà broă lơh dùl ròt bal den geh pơgồp bơnah tàm bơtàu tơnguh ròng phan tàm tơngai tus dùl bă rơcăng lài mờ geh cồng nha.

Cau cih Vũ Nam Trang- Cau mblàng Lơ Mu K’Yến