Ntào tàm gùl suơn tam tiêu bơrlŭ bal mờ kơphe ơnàng rơlao 1 lồ gam hòn gơs niam, plai uă, bi Hoàng Văn Thủy, kis tàm thôn Bằng Sơn, xã Ea Pô, kơnhoàl Cư̆ Jút, càr Dăk Nông chờ hờp tŭ đơs bè broă hìu nhă bi tus bal hợp ták xã lơh tiêu kơl jăp. 5 nam tus bal, bi neh geh bơto uă ngan ală kỹ thuật sơnka sền gàr mờ suơn tiêu hìu nhă bi tŭ do gam tam jăt jơnau sồr VietGAP. Tus bal lơh sa jăt mpồl, hìu nhă bi kung geh hợp ták xã, mpồl lơh sa kă bro lơh broă bal dong kờl phơng sih, sơnơm gơsơ̆t tu bal mờ ală bơta phan lơh broă geh kwơ ndai tai.

Kơnờm mờ hơ̆, ală nam do, suơn tam tiêu hìu nhă bi sùm geh ală jơnau sồr bè lơh sa kloh niam. Bal mờ broă kơl jăp bơh suơn tiêu dê, cồng nha lơh sa kung loh làng tŭ tơl tấn phan geh lơh ndrờm geh bơtơl tai bơh 1 tơlăk nggùl tus 3 tơlăk đong priă rơlao mờ khà priă tàm drà kă bro: “Cồng nha là ờ hoan gơtìp rềs àr bè kòp rơlao, kòp chơ̆t mhar chơ̆t lơyài ờ hoan geh, git rềs àr bơh kòp tàm tờm tiêu bal mờ broă git đal, sơnka sền gàr tờm tiêu, hơ̆ sồng broă atbồ tu, kòp den he geh broă mờng chài. Tờm tiêu kung geh cồng nha rơlao mờ đah kông ty lơh broă bal kung dong kờl phơng, sơnơm. Khà priă den tiêu kloh geh bơta A den geh pơn jờng 1 rơbô 500 đong tàm 1 kĭ, gam A0 den geh 3 rơbô đong tàm 1 kĭ”.

Kung gŏ geh bơta kwơ bơh broă lơh sa jăt mpồl dê, làng bol lơh kòi sre tàm xã Dăk Drông, kơnhoàl Cư̆ Jút, càr Dăk Nông neh lơh gơs hợp ták xã  Nông Phú. Ồng Đỗ Hàn Phú, kwang atbồ Hợp ták xã pà git, broă tus bal hợp ták xã neh dong kờl làng bol tam gơl bồ tơngoh lơh sa mờ geh tìp mờ ală sơntìl kòi geh bơkah uă rơlao, kỹ thuật tam geh niam rơlao. Kơnờm mờ hơ̆, cồng nha geh uă, bơta kwơ kung niam rơlao mờ làng bol ờ gam pal ngòt ờ sŭk bè khà priă geh, cau kă bro rồn bơklơn khà priă tăc. Jơh ală kòi bơkah geh lơh gơs ndrờm ờ tơl nàng tăc mờ ală mpồl lơh sa kă bro lơh broă bal in. Lơh sa jăt mpồl mùl màl là broă lơh pràn ai broă lơh kòi tàm xã tiah ngài do dê mờ gùng dà broă lơh hợp ták xã geh pơn jăt tai pờ ơnàng broă bơyai lơh, tăc uă bơta phan geh lơh bơh broă lơh sa suơn sre ndai in, ờ mìng ơm wơl tàm broă lơh kòi: “Lài jơh, làng bol geh gŏ phan geh lơh bơh să tờm dê geh tăc niam rơlao mờ khà priă kas rơlao, ờ pal ngòt cau blơi rồn bơklơn khà priă tăc. Gơtùi đơs, làng bol neh git wă, geh broă lơh gơguh jăk nàng tơnguh uă broă lơh sa, bal mờ ală broă dong kờl bơh ală kông ty tàm dơlam ha là bơdìh bè dong kờl sơntìl ờ sa priă, ha là dong kờl phơng sih hữu kơ”.

Ồng Đỗ Duy Nam, Phó kwang atbồ phòng Nông nghiệp mờ Phát triển Nông thôn kơnhoàl Cư̆ Jút, càr Dăk Nông pà git, broă tơnguh bơtàu lơh sa jăt mpồl neh mờ gam pơgồp bal bơnah tàm broă dong kờl tơnguh uă bơta kwơ phan geh lơh bơh broă lơh sa suơn sre tàm kơnhoàl dê. Ală mpồl lơh broă bal, hợp ták xã gam rơhời ai tơngŏ gơnoar là anih tơrbŏ bal đah làng bol lơh broă sa mờ mpồl lơh sa kă bro bal mờ dà lơgar. Uă bơta phan tŭ do neh di pal mờ ală jơnau kờñ geh uă ngan bơh ală lơgar blơi phan dê bè lơgar Mỹ, lơgar Nhờk mờ ală lơgar tàm câu Âu: “Broă lơh jăt mpồl pơgồp bal den cèng geh ờ uă cồng nha bè lơh sa. Lài ngan, bè bơta niam phan geh lơh den bơh broă pơgồp bal do ală hìu làng bol, ală cau tàm mpồl pơgồp bal geh ală dơ̆ bơsram tàp, tam gơl broă mờng chài mờ lơh jăt kỹ thuật bơh mpồl lơh broă pơgồp bal dê. Pơgồp bal tàm broă tơnguh uă bơta ngăc ngar, broă mờng chài ai làng bol in, bơh tŭ hơ̆, geh pơgồp bal tàm broă tơnguh bơtàu gah lơh sa nền nòn rơlao, niam bơnĕ rơlao”.

Mò Nguyễn Thị Tình, Phó kwang atbồ Sở Nông nghiệp mờ Phát triển Nông thôn càr Dăk Nông pà git, mờ bơta pràn bè ù tiah, trồ tiah mờ geh bă ù dờng ơnàng, càr geh ai broă lơh sa suơn sre là dùl tàm ală gah broă lơh sa tờm ngan. Nàng tơnguh geh ală bơta kwơ do, broă lơh ală tiah tam phan lơh sa suơn sre geh bơta niam uă mờ ală broă pơgồp bal nền nòn gam geh Tỉñ uỷ, UɃÑZ càr sền gròi ngan: “Bơh Tỉñ ủy tus UɃÑZ càr neh geh uă ngan jơnau đơng lam bè broă do. Tàm tơngu me bơ̆t bơtàu wơl broă lơh sa suơn sre den kung geh ai broă pơgồp bal nàng lơh geh tiah tam phan kơl jăp, geh sùm nàng drơng broă blơi kông nghệ lơh gơs kung bè tăc mờ lơgar bơdìh tơnơ̆ do in. Di gơlan nàng lơh geh tiah tam den pơgồp bal mờ hơ̆ là pal geh mpồl lơh broă bal, nàng ai geh tiah tam phan mờ bă tam phan geh bơta niam uă nàng jòi tiah tam den he git phan tam hơ̆ gam geh tam tàm tiah lơi, ñcau là cau gam lơh mờ jăt broă lơh lơi, geh tơl kloh niam tàm phan sa lah ờ. Den hơ̆ sồng ală hìu lơh sa tàm tiah hơ̆ pal pơgồp bal nàng ring bal bè broă lơh”.

Pơgồp bal lơh sa jăt mpồl neh mờ gam pơgồp bal dong kờl tơnguh uă bơta kwơ phan geh lơh bơh broă lơh sa suơn sre tàm càr Dăk Nông dê, mờ bơta tờm bơh ală mpồl pơgồp bal lơh sa do là ală mpồl lơh broă, ală hợp ták xã dê. Bơta chờ hờp ngan là tơnơ̆ mờ rơlao 10 nam lơh jăt adăt hợp ták xã, ală hợp ták xã tàm càr Dăk Nông neh geh tơnguh bơtàu pràn kơl dang. Tus tŭ do, gùt càr Dăk Nông neh geh rơlao 230 hợp ták xã, mờ di pơgăp 18 rơbô nă cau. Do là anih tơrbŏ geh cồng nha đah làng bol lơh broă sa mờ dà lơgar, mpồl lơh sa kă bro dê. Mờ jăt jơnau đơs bơh UɃÑZ càr Dăk Nông dê, ală hợp ták xã gam geh ală broă tam gơl pa, ngai sơlơ pờ ơnàng mờ tơnguh bơtàu, pơgồp bal tàm broă lơh gơs ală tiah lơh sa suơn sre ngui kông nghệ kao, tam gơl muh măt ƀòn lơgar.