VOV4.K’ho - Kờñ lơh mùl màl jơh ală nghị quyết, broă lơh, rơndăp broă bè tơnguh bơtàu lơh sa suơn sre càr Dăk Lăk dê. Mờ ai tơngŏ jơnau hơ bơh càr dê tàm broă dong kờl mpồl lơh sa kă bro, cau bơcri priă tus bơcri, lơh sa kă bro. Ngai hìng 29 nhai 04, càr Dăk Lăk geh bơyai lơh “Pơrjum hòi jà bơcri priă gah lơh sa suơn sre càr Dăk Lăk nam 2022”. Nàng git loh làng rơlao bè bơta geh, bơta pràn, ală broă pơlam, ai lài bơcri priă bơh càr dê. Hương Lý, cau ai tơngit jơnau đơs Việt Nam tàm Tây Nguyên geh dơ̆ lùp ồng Nguyễn Đình Trung, Ủy viên Đảng dà lơgar, Ƀí thư Tỉñ ủy Dăk Lăk bè tơngu me do.

Ồng Nguyễn Đình Trung, Ƀí thư Tỉñ ủy Dăk Lăk (ào tơlir tàm gùl) còp broă lơh blơn sŭt plai Nova ngui kông nghệ kao tàm kơnhoàl Cư̆ Mgar

Ơ ồng Nguyễn Đình Trung, càr Dăk Lăk geh sền là tiah tờm bè broă lơh sa suơn sre Tây Nguyên dê kung bè gùt lơgar, tơngai do càr Dăk Lăk neh lơh broă lơi nàng broă lơh sa suơn sre di pal mờ bơta geh?

Ồng Nguyễn Đình Trung: “Gơwèt mờ càr tàm ală tơngai lơh broă pa do sùm ai broă lơh sa suơn sre, làng bol lơh broă sa, ƀòn lơgar là ală broă mờ càr sùm pal geh broă sền gròi ngan. Mùl màl den tàm ală nam do, lơh sa suơn sre sùm geh mờr 40% khà broă tàm broă tơnguh bơtàu lơh sa càr dê. Tàm ală nam do, tàm càr kung geh uă broă lơh, uă cau bơcri priă tus tàm gah lơh sa suơn sre ngui kông nghệ kao mờ mùl màl neh geh uă phan bè gah broă do ai tus tàm drà kă bro tàm lơgar mờ dunia. Tơnơ̆ do, broă lơh sa suơn sre gam là broă geh càr sền gròi tơnguh bơtàu kơl jăp pơgồp bal mờ tơnguh bơtàu càr dê kung bè tơnguh uă rài kis làng bol”.

Ồng Nguyễn Đình Trung, Ƀí thư Tỉñ ủy Dăk Lăk iăt jơnau yal bơh mpồl lơh sa kă bro bơcri priă tàm gah lơh sa suơn sre hữu kơ

Bè hơ̆ tàm tơngai tus, Ƀan Thường vụ Tỉñ ủy pơn jăt tai geh broă đơng lam, tơwèt gùng dà broă lơh bè lơi gơwèt mờ gah lơh sa suơn sre ơ ồng?

Ồng Nguyễn Đình Trung: “Tơngai tus, nghị quyết pơrjum dờng dơ̆ 17 càr dê mờ ală nghị quyết jăt tơngu me kung neh geh ai: tàm ală gah broă geh ai lài tơnguh bơtàu den geh gah lơh sa suơn sre. Kwơ màng là lơh sa suơn sre ngui kông nghệ kao nàng tơnguh bơta geh, ală bơta pràn bè lơh sa suơn sre càr Dăk Lăk dê pơgồp bal kwơ màng tàm broă tơnguh bơtàu lơh sa càr dê, kung bè tơnguh uă rài kis phan bơna, nùs nhơm làng bol. Càr Dăk Lăk ai tơl bơta ƀuơn nàng ală cau bơcri priă tus mờ càr Dăk Lăk tus bal, lơh broă bal mờ càr, bal mờ làng bol tàm càr tơnguh bơtàu lơh sa”.

Bè ồng pa đơs, càr Dăk Lăk geh ai tơl bơta ƀuơn nàng ală cau bơcri priă tus mờ càr Dăk Lăk, bè hơ̆ mùl màl bè lơi ơ ồng? Tàm hơ̆ uă ngan là tŭ ală cau bơcri priă gam geh nùs nhơm ngòt bè ală broă gơrềng bal tus mờ ù tiah?

Ồng Nguyễn Đình Trung: “Càr gam bơyai lơh ai rơndăp lơh ù tiah càr kung bè ai rơndăp lơh ù tiah bè broă ngui ù, ală tiah ngui ù lơh sa suơn sre. Lài jơh là gơnoar bơh dà lơgar pal lơh jăt niam broă ai rơndăp ù tiah tơl niam, di pal mờ mùl màl nàng tŭ cau bơcri priă tus mờ càr geh tơngu me nàng kơlôi sơnơm, sền gròi mờ ai tơlik kơrnoăt bơcri priă. Dơ̆ bàr, pơgồp bal đah ală cau tàm broă lơh sa, do kung là kơnòl bơh càr dê, càr geh lơh jăt broă pơgồp bal đah ală cau tàm broă lơh sa bơh broă lơh sa suơn sre ngui kông nghệ kao dê. Broă dơ̆ 3, tăc phan kung bè pơgồp bal mờ broă lơh sa mờ măi mŏk lơh gơs phan ngui sa tơnơ̆ mờ ală broă bè gùng lòt, bơtơ̆t rơbòng dà mờ ală broă lơh ndai tai bơh tàm ală rơndăp broă lơh sa suơn sre ngui kông nghệ kao dê.

Ơi, dan ưn ngài ồng!

Cau cih Hương Lý- Cau mblàng Ndong Brawl