VOV4.K’ho- Tàm càr Dăk Lăk gĭt nđờ rơhiang lồ bùm lô neh tus tơngai tơn hào. Mơya, cau tam bùm lô gam ờ iang ngan tŭ giă tăc ờ yòm mờ ờ geh cau blơi sơl.

Hìu bơnhă bi Nguyễn Ngọc Ánh, ơm tàm thôn Mê Linh 2, xã Ƀuôn Triết, kơnhoàl Lăk, càr Dăk Lăk, nam do tam rlau 7 lồ 5 sào bùm lô. Bi kơlôi sơnơng tŭ bùm tus tơngai tơnhào, giă tăc gơ mù mìng gam bơh 4 tus 5 rơbô đong dùl kĭ, mờ ờ geh cau lùp blơi. Jat bơta kờp bơh bi dê Ánh dê mờ giă tăc do kàl tơnhào bùm nam do hìu bơnhă bi dê hoàc huơr rlau 700 tơlak đong. Bi Nguyễn Ngọc Ánh đơs: Bè pah nam giă tăc gơ kung lơyah ngan sơl mơya kung gam geh bơh 7 tus 8 rơbô đong dùl kĭ, cau lơh broă sa tăc den kung gam geh priă jền sơl. Ai nam do den nisơna ală cau kă bro hòi khi, den khi ờ gŏ blơi tơn. Làng bol nam do đơs bal là rơngòt ngan sơl, tài bơh tơnhào bùm ờ hềt tơl nàng tơm jơh priă ơpah sre mbe nàng đơs tus priă bơcri lơh, den hơ̆ sồng là ơpah cau lơh broă tai.

Ndrờm bè hơ̆ sơl, bi Trần Văn Thanh ơm tàm xã Ƀuôn Triết, kơnhoàl Lăk kung tam rlau 5 lồ bùm lô mờ priă bơcri rlau 500 tơlak đong mơya kàl tơnhào nam do bè do gơlơh bè roh jơh. Bi Trần Văn Thanh đơs: Bùm mờr 5 nhai do mơya kung ờ geh cau blơi sơl, tŭ do kal ke ngan tăc geh, giă den lơyah ngan. Tŭ do uă cau kờñ sang tĕ bùm lô mơya he mờ sang tĕ den pơlai ngan mờ tus di tŭ tơnhào rê kờp jơh priă ơpah cau lơh den hoàc huơr ngan. Bơcri priă tam bùm lô uă rlau mờ lơh kòi uă rlau 2 dơ̆, 3 dơ̆. Nam do, dùl lồ pal hoàc huơr bơh 100 tus 150 tơlak đong.

Gĭt nđờ rơhiang lồ bùm lô tàm Dăk Lăk kung gam ờ hềt geh tăc

Ai bi Trần Văn Nghĩa, ơm tàm xã Quảng Điền, kơnhoàl Krông Na nam do kung ơpah ù tam rlau 5 lồ bùm lô. Uă poh do bi hòi điện thoại ai cau kă bro in kờñ blơi bùm lô mơya ờ geh cau hơ. Ai bi Trần Văn Nghĩa đơs: Pah nam tus tơngai tơnhào den cau kă bro lòt jòi is tơn nàng blơi, mơya nam do neh mut tàm tơngai tơnhào mơya ờ geh cau kă bro tus blơi sơl. Bol añ neh hòi điện thoại mơya khi ờ bài blơi tài bơh khi ờ hềt geh tiah tăc den khi ờ gŏ blơi phan bơh làng bol dê ờ, kal ke ngan. Nam do, hoàc huơr là bơta ờ gơtùi pleh ngan, digơlan nam tus bol añ pal sền sơ wì wơl tam tờm sơntìl ndai, bè do sùm den kal ke ngan bè ờs rài kis.

Ồng Đoàn Văn Trường ơm tàm ƀòn dờng Buôn Ma Thuột, dùl nă cau kă bro sùm blơi bùm lô ală càr tàm Tây Nguyên nàng tăc mờ lơgar ndai pà gĭt: bơh lồi nhai 4 tus tŭ do, khà phan uă rlau mờ cau blơi den giă bùm lô sùm gơmù uă. Ală cau blơi bơh đah lơgar Lo blơi bùm lô rah rài den sơlơ lơh giă gơmù lơyah ngan. Ồng Đoàn Văn Trường đơs:Tŭ do, drà kă bro gơ lơh bè là til mpồng. Bè bòl añ halà uă cau kă bro ndai tŭ do ờ gĭt plai tăc bùm lô do mbè lơi sơl. Tài bơh bùm lô tŭ do gơtìp tơrgùm wơl là uă ir. Kung geh uă hìu bơnhă hòi điện bol añ in nàng blơi bùm lô mơya bol añ ờ gĭt loh geh anih tăc halà ờ den ờ gơtùi hơ ngan là broă tăc mbè lơi nàng blơi bùm lồ làng bol in.

Cau tam bùm lô kơlôi sơnơng tŭ tăc gơ mù lơyah mơya ờ geh cau lùp blơi

Jat tơrgùm kờp bơh Ci kụk Phan tam mờ Sền gàr phan tam (Gơwèt Sở Nông nghiệp mờ Phát triển Nông thôn càr Dăk Lăk) gùt càr geh pơgap 2 rơbô 500 lồ bùm lô. Tàm hơ̆, mìng is kơnhoàl Lăk geh tus 1 rơbô 200 lồ bùm lô. Ồng Nguyễn Viết Quang, Kwang atbồ Phòng Nông nghiệp mờ Phát Triển Nông thôn kơnhoàl Lăk pà gĭt: Tŭ do gam rlau 500 lồ bùm lô bơh làng bol dê ờ hềt tơnhào tài bơh ờ geh cau blơi. Ồng Nguyễn Viết Quang đơs: Tŭ do Phòng Nông nghiệp gam pơgồp bal mờ ală xã Ƀuôn Triết, Ƀuôn Triết neh lùp bàr pe cau kă bro kung bè mpồl lơh sa kă bro blơi bùm lô nàng dong làng bol tăc phan lơh geh bơh suơn sre. Gah lơh sa suơn sre neh geh sră nggal sồr ală xã tơngkah làng bol cau lơh broă sa suơn sre pal tam ală bă ù bùm lô gơ ơm tàm broă rơndap lơh, rơndap ù tiah bơh gah lơh broă dê.

Cau cih Tuấn Anh- Cau mblàng K’Hạnh