VOV4.K’ho- Pa do, kơnhoàl Krông Păk, càr Dăk Lăk bơyai lơh yal tac uă jat sră pơrgon sầu riêng sơn rờp bơh lơgar he dê tus lơgar Lo. Nàng gơtùi tac uă jat sră pơrgon hờ lơgar ndai, phan sầu riêng pal geh lơh mã sồ tiah tam. Mơya, broă lơh sră nggal, làng bol tàm kơnhoàl Krông Păk git gŏ 2, 3 suơn chi gơtìp mpồl lơh sa kă bro lơh mã sồ tiah tam bơh tŭ lơi kung ờ git sơl. Bơta ờ loh làng do neh lơh làng bol ờ suk ngan, dilah ờ bơsong kràñ cê mờ di tŭ den digơlan lơh gơ rềng uă ngan tus gah lơh phan geh bơta kuơ lơh geh uă ngan do.

Tơngai rềp ndo, làng bol thôn Tân Bắc, xã Ea Kênh, kơnhoàl Krông Păk, càr Dăk Lăk tàm đơs mờ gơp bè broă lơh mac sồ tiah tam ai sầu riêng in. Ơm tam nggùl suơn sầu riêng ơnàng mờr 2 lồ neh tam 18 nam, mò Lê Thị Hương bal mờ 2, 3 nă cau rềp hìu ờ suk ngan tŭ đơs bè broă jơh bă sầu riêng tàm do neh gơtìp Kông ti TNHH Kă bro phan lơh gơs bơh suơn sre Thiện Tâm lơh sră nggal lơh mã sồ tiah tam mờ să tờm khi dê den ờ git dùl êt lơi tơn. 

Làng bol tam sầu riêng tàm thôn Tân Bắc ờ suk tŭ mã sồ tiah tam neh geh lơh ai mpồl lơh sa kă bro in mờ làng bol ờ git

Mò Hương đơs nền, broă lơh sră nggal nàng lơh mã sồ tiah tam, mpồl lơh sa kă bro neh ờ đơs, ờ yal mờ cau tòm suơn mò kung ờ blơi sầu riêng tàm do sơl: “Mã sồ tiah tam den khi đơs là geh cau tàm thôn Tân Bắc do bloh, mơya mùl màl den khi ờ mut tàm do nàng còp sền suơn do tac bè lơi nàng khi blơi. Khi ờ blơi sầu riêng tàm ndo, bol hi pal tac cau ndai in. Tŭ do, làng bol bol hi sồr càr, kơnhoàl, xã pal lơh loh broă do”.

Ồng Hoàng Trọng Cường, atbồ thôn Tân Bắc, xã Ea Kênh pà git: 2 nam lài, ala mat kông ty TNHH kă bro phan lơh gơs bơh suơn sre Thiện Tân geh tus tàm thôn sồr làng bol yal bè bă ù tam phan, mơya ờ đơs loh là yal nàng lơh ñchi. Rềp ndo, tŭ sầu riêng tàm tiah do geh tac uă jat sră pơrgon hờ lơgar ndai, 2, 3 mpồl lơh sa kă bro tus đơs mờ mpồl lơh broă bal thôn dê, sồr lơh bal lơh sră nggal mã sồ tiah tam, blơi phan lơh gơs den hơ̆ sồng git gŏ mã sồ tiah tam bơh uă suơn chi tàm thôn dê neh geh lơh ai Kông ty Thiện Tâm in. Ồng Hoàng Trọng Cường đơs: “Geh uă ngan mpồl lơh sa kă bro mut tàm thôn lơh bal mờ ală hìu bơnhă làng bol lơh mã sồ tiah tam, hơ pơrgon blơi phan lơh gơs nàng tac uă jat sră pơrgon hờ lơgar ndai. Tŭ do, tàm thôn geh 2 mpồl lơh bal khi yal nàng lơh mã sồ tiah tam, tus kơnhoàl den kơnhoàl hơ mã tiah tam do neh geh lơh. Làng bol lùp wơl là ñchi bơh tài lơh mờ ờ git. Kơp kờñ bơh làng bol dê là kông ty mut lơh broă loh làng bè mã tiah tam do tài bơta do gơ jat bal mờ bơta kuơ mờ phan lơh gơs bơh làng bol dê”.

Càr Dăk Lăk geh mờr 15 rbô lồ sầu riêng, tàm hơ̆ geh 23 mã sồ tiah tam neh geh lơh ai 1 rbô 500 lồ in

Mò Ngô Thị Minh Trinh, Phó Củ tịc Ủy ƀan Ñân zân kơnhoàl Krông Păk, càr Dăk Lăk pà git, tơnơ̆ tŭ geh jơnau yal làng bol thôn Tân Bắc yal bè mã sồ tiah tam, kơnhoàl neh sồr ală anih lơh broă geh gơnoar pơgồp bal mờ mpồl lơh sa kă bro lam lơh cribơyai. Bè broă geh halà ờ bơta blac pơrlồm tàm lơh mã sồ tiah tam, kơnhoàl Krông Păk gam sồr ală anih lơh broă geh gơnoar lùp sền, kờp sền tàm jơh gùt ù tiah kơnhoàl nàng lơh loh mờ geh gùng dà bơsong: “Kơnhoàl geh broă rơndap lơh sền sơ wì jơh ală bơta, neh lơh cau lơi in, ai tơlik jơnau sồr lơi, geh mã lơi, bol hi kràñ cê bơsong nàng lơh loh broă do tơn. Tài gam pal sền gàr bơngă pin dờn, mat kă bro phan lơh gơs bơh suơn sre Kông Păk dê tai. Bè mã sồ tiah tam, dilah atbồ ờ kràñ, den cau ai phan bơh tàm tiah ndai mờ đơs là phan Krông Păk dê, rơngòt digơlan gơlik geh khih halà bơta lơi. Ngan là tam tơngai tus den geh gùng dà, broă rơndap lơh ngan ngồn mờ broă atbồ kràñ cê mã sồ tiah tam do”.

Bơta ờ loh làng tàm broă lơh mã sồ tiah tam sầu riêng tus tŭ do mìng rơp pa geh git gŏ tàm thôn Tân Bắc, xã Ea Kênh, kơnhoàl Krông Păk mờ khà 2, 3 jơt lồ. Tŭ do kung ờ hềt gơtùi git là gam nđờ bă sầu riêng tai geh bơta do. Mơya bơh broă do ai gŏ, neh geh ală bơta ờ niam tàm broă rơndap lơh mờ bơta ờ niam, bơta ờ geh kơnòl bơh ală anih lơh broă geh gơ rềng dê tàm broă lam lơh lơh mã sồ tiah tam. Ồng Nguyễn Hoài Dương, Kwang atbồ Sở Nông nghiệp mờ Phát triển Nông thôn càr Dăk Lăk đơs là, bulah mìng rơp gơlik geh tàm khà dùl êt, mơya broă do geh jơnau pơhìn dờng ngan mờ pal bơsong kràñ cê nàng gàr niam bơngă pin dờn bơh gah lơh phan dê: “Bơta pơrlồm mat tiah tam, ngui mã tiah tam ờ di, ngui mã tiah tam bơh tiah do dê mơya ai sầu riêng tiah ndai dê nàng tac hờ lơgar ndai den hơ̆ là bơta blac pơrlồm, lơh tìs adat boh lam. Ală bơta hơ̆ pal gờñ geh git gŏ mờ lơh glài kràñ. Añ kung kơp kờñ ală anih lơh broă geh gơnoar, ngan là làng bol pal jat sền nền nòn broă do, dilah git gŏ tàm tiah lơi geh bơta do den pal gờñ yal mờ anih lơh broă geh gơnoar nàng sền sơ wì mờ lơh glài kràñ nàng lơh bè lơi gơtùi gàr bơngă pin dờn ai gah lơh sầu riêng Việt Nam in”.

Tus tŭ do, càr Dăk Lăk geh mờr 15 rbô lồ sầu riêng, tàm hơ̆ geh 23 mã sồ tiah tam neh geh lơh ai 1 rbô 500 lồ in. Broă làng bol lơh broă sa yă mpồl lơh sa kă bro blac pơrlồm mã sồ tiah tam tàm thôn Tân Bắc, xã Ea Kênh mờ khà mờr 100 lồ, bulah ờ huan uă mơya ai gŏ ală bơta ờ niam tàm broă bơt bơtàu mờ ring bal sră nggal. Bơta do sồr ală anih lơh broă atbồ, pal sền sơ wì wơl broă rơndap lơh, geh ală jơnau pơlam mùl màl, loh làng.

Công Bắc/Cau mblàng K’Duẩn