Tiah kòp geh gŏ tàm 2 hìu làng bol tàm thôn 11 mờ thôn 5, xã Ea Kly. Tàm hơ̆, tiah kòp bơh sơnrờp geh gŏ tàm ngai 29/10 pa do tàm hìu bơnhă ồng Nguyễn Nhu Lực, ơm tàm thôn 11 mờ khà iar ada bơtờp kòp mờr 800 nơm. Tiah kòp dơ̆ 2 geh gŏ tàm ngai 5/11 pa do, tàm hìu bơnhă ồng Ngô Đức Tình ơm tàm thôn 5 mờ 750 nơm iar ada gơtìp kòp, tàm hơ̆ geh 500 nơm ada mờ 250 nơm iar.

Tơnơ̆ tŭ kơno yal bè ală tiah geh kòp tơn, kwang bàng lơh sơnơm phan ròng neh ai dùl êt iar ada kòp nàng xét nghiệm mờ lồi dŭt gơ ai cồng nha bơtờp mờ virus nggụ A/H5N1. Hìu ròng phan mờ lơh sơnơm phan ròng neh pơgồp bal mờ gơnoar ătbồ tàm tiah do tus tơ̆p pơrgŭc jơh ală iar ada bơtờp kòp; ƀồm sơnơm kơryan kòp tàm wàng ròng, gùt dar bơtô tơ̆p pơrgŭc mờ gùt dar tiah geh kòp. Ci kụk Ròng phan mờ lơh sơnơm phan ròng càr Dăk Lăk neh pà 36 lĭt dà sơnơm nàng tiah do in lơh broă lơh ƀồm sơnơm kơryan kòp lơh kloh ù tiah; pơgồp bal mờ Anih tờm Gròi sền kòp bơtờp càr Dăk Lăk tus lùp kờp, jăt sền kòp nggụ iar ada tàm kòn bơnus tàm ù tiah xã Ea Kly.