Jơh gùt càr Dăk Lăk geh mờr 41 rơbô lồ sầu riêng, tàm hơ̆ geh 26 rơbô 600 lồ gam ai tơnhào, gơguh 4 rơbô lồ pơndrờm mờ nam 2024. Khà lơh geh kờp dŭ lơh geh 392 rơbô tấn, gơguh pơgăp 30 rơbô tấn. Dăk Lăk tŭ do geh 269 mã tiah tam geh pà mờ bă ù ơnàng rlau 7 rơbô 400 lồ, khà lơh geh tiah tam lơh geh pơgăp 220 rơbô tấn.

Tàm ù tiah càr kung geh rlau 250 anih tăc bro- lơh gơlik, 11 anih ơn mrềt mờ 40 anih ơn kơldung sầu riêng ris neh geh pà mã sồ tăc mờ lơgar ndai. Jat ồng Nguyễn Minh Huấn, Kwang lam bồ Sờh Broă lơh sa suơn sre mờ Tiah ơm kis càr Dăk Lăk, nàng lơh kràñ gròi sền bơta niam bơkah bơh tàm tiah tam, càr Dăk Lăk neh tam pà kấp atbồ tiah tam, anih ơn kơldung mờ lơh broă kă bro sầu riêng ai gơnoar atbồ kấp sàh in.