VOV4.K’ho- Kòp jê ndul gơ jroh sur câu Phi pơn jat tai bơtờp sùm tàm càr Dăk Lăk, mờ mờr 60 tiah kòp geh sền gŏ bơh bồ nam tus tŭ do. 2 tiah kòp pa tàm Dăk Lăk ndrờm bơh hìu bơnhă cau ròng sur tàm xã Ea Tul mờ Cư M’gar, kơnhoàl Cư M’gar, càr Dăk Lăk dê mờ 10 nơm sur bơtờp kòp. Ală sur kòp neh geh mpồl lơh sơnơm phan ròng pơgồp bal mờ làng bol tơ̆p pơrgŭc.

Cau ròng sur Dăk Lăk ƀồm sơnơm lơh kloh khuẩn tàm wàng ròng sur bơtờp kòp

Kờp bơh bồ nam tus tŭ do, gùt càr Dăk Lăk geh 59 tiah kòp tàm 52 thôn, ƀòn, bơh 8 kơnhoàl dê. Kờp jơh ală sur bơtờp kòp mờr 400 nơm mờ bơta kơn jơ̆ mờr 24 tấn. Tàm hơ̆, Cư M’gar kung là dùl tàm ală kơnhoàl geh bơta kòp jê ndul gơ jroh sur câu Phi kal ke ngan rlau jơh mờ 158 nơm sur pal tơ̆p pơr gŭc, kờp jơh bơta kơn jơ̆ mờr 11 tấn. Ồng Nguyễn Quang Đức, Kwang atbồ  Trạm ròng phan mờ gah lơh sơnơm phan ròng kơnhoàl Cư M’gar pà gĭt: tŭ do gah lơh sơnơm phan ròng pơgồp bal mờ gơnoar atbồ tiah do dê jat sền tiah kòp mờ sồr cau ròng sur hơ ờ tăc sur kòp nàng pleh lơh bơtờp uă kòp.

Cau mblàng K’Hạnh