Tàm dơ̆ bơyai lơh, ală kwang bàng mờ đoàn viên ơruh pơnu càr Dăk Lăk neh tam 80 tờm chi sao jù jơnhoa bơh 3 thơk rlau hơđang tàm sơnĕ gùng sồ 1 mờ sồ 2 gơwèt Rơndăp broă lơh Tiah ntrờn ơm kis pa thôn 1, xã Hoà Thắng, ƀòn dờng Buôn Ma Thuột. Bal mờ broă lơh ngan tam mờ sền gàr tờm chi, Sở Nông nghiệp mờ Phát triển Nông thôn càr Dăk Lăk sồr ală tiah tàm càr pơgồp bal lơh jăt geh cồng nha broă rơndăp lơh bơtàu tơnguh gah lơh broă brê bơnơm Việt Nam tơngai bơh nam 2021- 2030, gùng dà broă lơh tus nam 2050. Tàm hơ̆, tơrgùm mblàng yal tơnguh uă bơta gĭt wă bơh làng bol dê tàm broă sền gàr brê, tam dră mờ kơryan jơnau mus kơl brê, sơgràm ù brê, lơh jăt niam broă lơh sền gàr tiah ơm kis, pleh mờ bơta tam gơl trồ tiah, gròi sền ƀơ̆ ƀơl, lơh niam wơl mờ lơh geh wơl tiah ơm kis niam bơh broă tam, sền gàr chi che.