Pơrjum geh bơyai lơh tơnơ̆ ală bơta ờ niam, tam pìt tam phà mờ pin pơrdah ờ ngan, mờ mpồl lơh sa kă bro tac hờ lơgar ndai bơta phan do tàm càr Dăk Lăk gơtìp tơnơ̆ ală khà sầu riêng sơn rờp geh tac uă jat sră pơrgon hờ lơgar ndai. Jat jơnau yal tàm pơrjum, tus tŭ do, Dăk Lăk neh tam geh rlau 15 rbô 200 lồ sầu riêng, gơguh 13 rbô lồ pơndrờm mờ nam 2015. Sầu riêng nam 2022 geh rlau 150 rbô tấn mờ kờp dŭ geh gơguh tus 300 rbô tấn tàm nam 2025.

Anih prap phan bơh dùl mpồl lơh sa kă bro sầu riêng tàm Dăk Lăk dê

Bè tac hờ lơgar ndai, nam 2022, là nam sơn rờp sầu riêng Dăk Lăk kung bè gùt lơgar geh tac uă jat sră pơrgon hờ drà kă bro lơgar Lo, là tiah blơi 99% khà sầu riêng tàm dunia. Nàng bơsong uă ngan rlau jơh ală bơta kòl yan tàm broă lơh bal bơtàu tơnguh gah lơh phan sầu riêng, tơnguh bơta pràn tàm pơrlòng tàm broă tac hờ lơgar ndai, kwang đơng lam bồ Ủy ƀan Ñân zân càr Dăk Lăk sồr ală anih lơh broă geh gơ rềng sơlơ tơnguh bơta niam atbồ, pơgồp bal niam mờ bơsong di tŭ ală broă gơlik geh, hòi jà crơng gơs hiệp hội sầu riêng nàng lơh gơlik bơta mờng chài tàm gah lơh phan cèng uă bơta pràn do.