Tàm dơ̆ tìp, ală gah neh cribơyai bè pơlam gùng dà lơh broă bal nàng kờñ rề ơnàng tăc phan mờ lơgar dai uă, li la drà kă bro bơdìh mờ drà kă bro lơgar Lo. Ală mpồl sầu riêng Dăk Lăk kung ai tơlik bàr pe jơnau sồr lơh broă bal, tàm hơ̆ geh: sơlơ tơnguh tai kĭ hơ sră pơrgon lơh broă jòng tơngai, kơ̆ kơl jăp ala tài bơh lơh broă lơyah tơngai jat kàl tơnhào; pơn jờng mpồl lơh sa kă bro lơgar Lo bơcri priă lơh tàm anih ơn prăp mrềt, logistics mờ lơh gơ lik jrô tàm ƀòn lơgar; pờ ơnàng lơh broă bal bơto bơtê mpồl lơh  broă, tàm jàu măi mok mờ mờng chài rơ̆ ru atbồ bơta niam bơkah.

Dăk Lăk tŭ do geh mờr 40 rơbô lồ sầu riêng, khà lơh geh nam 2025 kờp dŭ lơh geh mờr 400 rơbô tấn. Càr neh geh đah lơgar Lo ring bal pà 269 màh sồ tiah tam mờ mờr 7 rơbô 400 lồ; 40 anih ơn kơldung plai ris mờ 11 anih sầu riêng ơn mrềt drơng broă tăc mờ lơgar ndai in.