VOV4.K’ho- Tỉñ ủy Dăk Lăk pa pơgồp bal mờ Họk viện Cíñ trị Dà lơgar Hồ Chí Minh bơyai lơh Cribơyai jak chài mờ tơngume “Càr Dăk Lăk tơrgùm bơtàu tơnguh lơh broă sa sươn sre jăt gùng dà niam uă mờ kơ̆ kơl jăp jŏ jòng.

Tàm dơ̆ cribơyai, ală cau jak chài, cau ătbồ sền Jơnau yal jơnau cih tă pơgồp jơnau đơs bal mờ uă tơngume, bè: Nùs nhơm bơh Đảng dê, gùng dà broă lơh, kơrnoăt boh lam bơh Dà lơgar dê bè bơtàu tơnguh lơh broă sa sươn sre jăt gùng dà niam uă mờ kơ̆ kơl jăp jŏ jòng; Gùng dà, broă lơh bơh càr Dăk Lăk dê bè bơtàu tơnguh lơh broă sa sươn sre jăt gùng dà niam uă mờ kơ̆ kơl jăp jŏ jòng; Ngui kông nghệ siñ họk tàm broă bơtàu tơnguh lơh sa sươn sre tàm ù tiah càr dê; Tŭ niam mờ bơta lòng tàm bơtàu tơnguh lơh broă sa sươn sre càr Dăk Lăk jăt gùng dà niam uă mờ kơ̆ kơl jăp jŏ jòng; Bàr pe broă mờ broă lơh bơta chài bơtàu tơnguh lơh broă sa sươn sre kơ̆ kơl jăp jŏ jòng jăt broă lơh sac rwah ù tiah ai bàr pe tờm chi tam tờm ngan tàm càr Dăk Lăk in; Bơta geh ngan mờ broă lơh bơtàu tơnguh măy mok lơh gơlik phan bơh dơm chi càr Dăk Lăk...

Jăt Tiến sĩ ồng Võ Văn Lợi, Kwang ătbồ Gah bơsram Lơh sa, Họk viện Cíñ trị tiah 3 đơs, Dăk Lăk mờ bơta ƀươn geh rlau 650 rbô lồ ù lơh broă sa sươn sre, tàm hơ̆ geh rlau 300 rbô lồ ù ƀazan nđiơm gơs ngan, bal mờ trồ tiah niam ngan, Dăk Lăk ƀươn ngan bơtàu tơnguh lơh broă sa sươn sre jăt gùng dà lơh bal lơh sa gơ jăt bal mờ tăc bro phan lơh geh, bơtòm tơrgùm ù tiah nàng lơh gơlik bơta pràn ai bơtàu tơnguh lơh sa sươn sre in. Tiến sĩ ồng Võ Văn Lợi, đơs: Bol he kờñ pal lơh ală broă lơh bơh ală broă lơh bal nàng bol he ngui niam jơh ală bơta pràn, bơta ƀươn hơ̆ là ală bơta pràn bơcri lơh. Bơh ală broă lơh bal, bơh ală broă lơh nàng bol he tơrmù bơta rềs àr, gàr geh niam ală bơta kwơ. Mìng geh broă pleh geh ală jơnau pơhìn tơrmù geh bơta lòng den bol he pal lơh.

Anih bơyai lơh dơ̆ cribơyai

Jăt Tỉñ ủy Dăk Lăk, bơtàu tơnguh lơh broă sa sươn sre jăt gùng dà niam uă mờ kơ̆ kơl jăp jŏ jòng là dùl tàm prao kơnòl broă tờm mờ kwơmàng ngan nàng bơtàu tơnguh lơh sa bơh càr dê, geh cih tàm Kơrnoăt Pơrjum dờng Đảng ƀộ càr dơ̆ XVII, tơngai lơh broă bơh nam 2020- 2025. Bulah bè hơ̆, bơta ờ dùl ròt bal tàm ală broă lơh, ờ hềt gơhòi gơ jà ală cau bơcri priă tàm gah lơh broă sa sươn sre kông nghệ kao...gam là ală jơnau kơryan tờm lơh broă lơh sa sươn sre ờ hềt bơtàu tơnguh di gùng dà bè bơta kơ̆p kờñ. Bơh bơta geh ngan tàm tiah he dê, ồng Nguyễn Quang Hà, Củ tịc Ủy ƀan Ñân zân kơnhoàl Ea H’leo đơs là, ală bơta gơkòl tàm lơh broă sa sươn sre càr Dăk Lăk dê tŭ do, geh uă bơh ală broă bơh broă lơh rơndăp ù tiah dê. Ngan den tàng bè hơ̆, kờñ pal sền gròi rlau tai tus rơndăp ù tiah lơh broă sa sươn sre lài mờ tŭ bơyai tus ală broă lơh ndai. Ồng Nguyễn Quang Hà, đơs: Bơh jŏ sùm jơnau geh tơnhàu tăc ờ yòm mờ cau lơh broă ntoăt jăt sùm jơnau kờñ bơh drà kă bro dê, tŭ sền gŏ bơta lơi geh giă den tàm đòm jăt gơ̆p tam ur ar. Jơnau hơ̆ geh tài bơh bol he ờ lơh niam rơndăp ù tiah. Broă lơh mờ añ sồr lơh là bol he kờñ pal lơh niam broă lơh rơndăp ù tiah, tam gơl rơndăp ù tiah ai tơl tiah in, dipal mờ mùl màl tơl bơta chi tam nàng kờñ cèng wơl cồng nha uă ngan rlau jơh tàm dùl bă ù.

Ală kwang bàng lòt còp hìu ràng tăc phan bơna lơh broă sa sươn sre pơnrơ càr Dăk Lăk dê

Tàm dơ̆ cribơyai, bal mờ ală jơnau đơs wèt tus dùl rài lơh broă sa sươn sre kơ̆ kơl jăp jŏ jòng, ală kwang bàng neh sồr geh ală broă lơh bơtàu tơnguh lơh broă sa sươn sre kông nghệ kau bè ngui bơta jak chài măy mok, gơhòi gơ jà bơcri priă, ngui ală cồng nha lơh geh bơh dơ̆ tam gơl bơta yau gơs bơta pa ngui măy mok 4.0 tàm gah lơh broă sa sươn sre. Bơh hơ̆ lơh gơlik geh bơta dùl ròt bal, bơtàu tơnguh mhar, gơtùi lơh jăt ngan ngồn ai càr Dăk Lăk in nàng bơtàu tơnguh lơh broă sa sươn sre niam uă, kơ̆ kơl jăp jŏ jòng, lơh jăt jơnau kờñ bơtàu tơnguh “Lơh broă sa sươn sre ƀòn brê bơnơm, ƀòn lơgar pa ngan, cau lơh broă sa jak chài”. Ồng Phạm Minh Tấn, Phó Ƀí thư Duh broă sùm Tỉñ ủy Dăk Lăk pà gĭt: Kơrnoăt Pơrjum dờng Đảng ƀộ càr dơ̆ XVII, tơngai lơh broă bơh nam 2020- 2025 gĭt nền bơtàu tơnguh lơh broă sa sươn sre jăt gùng dà niam uă mờ kơ̆ kơl jăp jŏ jòng. Do là dùl tàm 6 kơnòl broă tờm kwơmàng ngan nàng bơtàu tơnguh lơh sa bơh càr Dăk Lăk dê. Kơnờm bè hơ̆, rơndăp tăp sèng lơh sa tam gơl jăt gùng dà niam ngan, gơguh lơh sa kờp bal pah nam geh 8,5%. Lơh broă sa sươn sre gam tơrgùm bơtàu tơnguh jăt gùng dà tơnguh uă cồng nha lơh geh, bơta niam gơ jăt bal mờ jơnau kờñ bơh drà kă bro dê, bơh sơnrờp neh ngui geh bơta pràn bơta ƀươn bơh càr dê. Nàng bơ̆t bơtàu rài lơh broă sa sươn sre jăt gùng dà pa ngan, kơ̆ kơl jăp jŏ jòng, càr Dăk Lăk gam pơn jăt tai tơrgùm lơh pràn bơcri priă mờ gơhòi gơ jà bơcri priă tàm gah broă lơh do.

Cau cih Vũ Hương Lý- Cau mblàng Lơ Mu K’Yến