Ală ngai do, hìu bơnhă ồng Y Kem, ơm tàm ƀòn Bu Păh, xã Trường Xuân, kơnhoàl Dăk Song, ờ suk ơm ngan tài bơh suơn kơphê hìu bơnhă ồng dê pa gơtìp cau pĭk kơñau. Ồng Y Kem pà gĭt, rlau 50 tờm kơphê gơtìp pk jơh, hoàc huơr pơgap 400 kĭ. Do ờ gŏ di là dơ̆ sơn rờp kơphê ồng dê gơtìp cau pĭk kơñau ờ, tài bơh suơn kơphê ngài mờ hìu ơm ồng dê rlau 1 kơi sồ. Ồng Y Kem đơs: 3 nam do rao, ndrờm gơtìp roh kơphê tàm đah do. Tài tơngai pĭk plai kơphê den uă ngan tàm ală tiah ndai tus pĭk kơphê, añ ờ gĭt cau lơi mờ cau lơi, den tŭ gơtìp cau pĭk kơñau den añ kung kal ke nàng gĭt sơl.

Ồng Y Kem tềng đap suơn kơphê pa gơtìp cau pĭc kơñau

Geh gĭt kung tàm ù tiah do tơngai pĭk plai kơphê nam lài, geh 2 hìu bơnhă gơtìp cau pĭk kơñau kơphê. Nàng sền gàr phan bơna, làng bol geh suơn kơphê tàm tiah do neh pơgồp bal mờ gơ̆p tàm pơdar bơyai lòt sền tàm trồ mang. Mơya broă roh kơphê kung gam gơlik geh sơl tài bơh suơn kơphê ơnàng, ngài mờ tiah làng bol ơm kis mờ geh uă gùng dềt. Den tàng, bơdìh mờ broă pơgồp bal sơlơ tơnguh lòt sền, tàm bàr pe gơl gùng làng bol gam crăp camera jat sền nàng rcang sơndră cau kơñau. Ồng Lê Ngọc Ga, ơm tàm xã Trường Xuân, kơnhoàl Dăk Song, pà gĭt: Trồ mang den sùm lòt sền suơn. Den he crăp tai camera nàng jat sền tàm đah hơđap hìu, jat gùng lòt. Tŭ mờ kwang bàng thôn kờñ den he pờ sền wơl camera hơ̆ nàng khi in sền gĭt mờ kŭp cau lơh aniai halà cau kơñau phan tam, nàng làng bol tam kơphê in iang nùs rlau.

Kwang àng neh kŭp geh 5 nă cau pĭc kơñau kơphê

Bơta pĭk kơñau kơphê lơh làng bol kơlôi sơnơng uă ngan, tài bơh ờ mìng gơtìp roh phan bơna, mờ ală tờm kơphê sùm gơtìp cau ờ niam tơrkă jơh ntê, kal ke ngan sơng ka sền gàr nàng tờm kơphê in pràn wơl, mờ lơh gơ rềng khà tơnhào kàl tơnơ̆. Ờ mìng pĭk kơñau kơphe lơm, uă cau sơmờm tơngai pĭk kơphê nàng kơñau phan bơna. Pa do, dùl hìu bơnhă làng bol ơm tàm xã Dăk Sin, kơnhoàl Dăk R’lấp, neh gơtìp cau pĭk kơphê ai kơñau rơndeh măy mờ dùl ết priă jền, biàng hơ̆ sồng dô mpồn. Ai tàm sơnah ƀòn Quảng Thành, ƀòn dờng Gia Nghĩa, mpồl kwang àng sền gŏ dùl nă cau dô mpồn jòi kŭp mŭt ơm bơrlŭ bal tàm mpồl cau lòt lơh broă apah...

Mŭt tàm tơngai pĭc kơphê, làng bol sùm rơngòt cau pĭk kơñau kơphê gơguh 

Nàng gàr niam sền gàr lơngap lơngai, rơndap tap sèng tàm tơngai pĭk plai kơphê, ală tiah tàm càr Dăk Nông neh lơh pràn broă lơh mblàng yal, tơngkah lài ală broă lơh, kai bơh cau lơh tìs dê. Mpồl kwang àng ƀòn lơgar kung sơlơ lòt sền, gròi sền tàm ală ù tiah tờm, lòt sền cau ơm kis ing gơwèt khà cau lơh broă khat gơboh, cau lơh apah jat tơngai... Kwang àng càr Dăk Nông tơngkah làng bol tŭ apah cau lơh broă kờñ pal sền gròi sră pơ àr să jan mờ lơh jat broă lơh lơh sră dan ơm kis ing, lơh sră dan ờ geh mat ing tàm tiah ơm kis jat di jơnau sồr.

 Đại úy ồng Nguyễn Văn Đô, Phó Kwang atbồ Kwang àng xã Trường Xuân pà gĭt, bal mờ mpồl lơh broă geh gơnoar, bơta rcang ngăc bơh làng bol dê geh pơgồp bơnah tơrmù ƀà ală cau lơh tìs gơlik geh tàm tơngai pĭc kơphê dê. Bè broă bơh hìu bơnhă ồng Y Kem dê, kwang àng xã neh sền sơ wì, sơr băc mhar kŭp geh 5 nă cau pĭc kơñau kơphê. Đại úy ồng  Nguyễn Văn Đô pà gĭt: Tàm tơngai pĭk kơphê pah nam den kwang àng xã kung bơt bơtàu broă rơndap lơh sền gàr phan tam, mblàng yal nàng làng bol in gĭt wă broă rcang sơndră mờ ală cau lơh tìs, ngan cau lơh tìs kơñau phan bơna. Kwang àng xã kung sùm pơgồp bal mờ mpồl sền gàr lơngap lơngai, rơndap tap sèng, mpồl sền gàr lơngap lơngai làng bol lòt sền nàng tơrmù ƀà broă roh phan bơna bơh làng bol dê tàm tơngai pĭk plai kơphê. Bơdìh mờ hơ̆ kung sền gĭt loh khà cau bơh ală tiah ndai rê lơh broă jat tơngai halà ơm kis; mờ sùm hòi jà, pơhìn ală cau geh tềl tơngŏ kơñau phan bơna.