VOV4.K’ho- Việt Nam neh geh ală phan Fine Robusta (hơ̆ là kơphe bơkah) geh dunia dờn dờp den kung pal geh ală cau coh kơphe mờng chài nàng ai ală phan do tus mờ gal ngan cau ngui. Do là jơnau kờñ  mờ Hiệp hội kơphe Buôn Ma Thuột wèt tus bơh dơ̆ pơrlòng coh coh kơphe Việt Nam nam 2022 geh lơh pa do tàm Dăk Lăk.

Dơ̆ pơrlòng coh kơphe Việt Nam nam 2022 (Vietnam Amazing Roast Master 2022) bơh Hiệp hội kơphe Buôn Ma Thuột bơyai lơh là broă geh ală mpồl lơh kơphe tàm gùt lơgar gròi sền. Tài do là dơ̆ pơrlòng sơn rờp geh bơyai lơh tàm lơgar Việt Nam mờ broă bơyai lơh kâp dà lơgar nàng kờñ lơh gơlik “anih nhơl” ai ală mpồl lơh kơphe in mờ hời rơ hời crơng gơs dùl mpồl coh kơphe mờng chài kâp dunia, kuơmàng là bè coh kơphe Robusta. Cau pơrlòng Đoàn Tuấn Nhật tus bơh càr Lâm Đồng, pà git: “Tus bal dơ̆ pơrlòng do geh khà jơnau git wă uă ngan, jrô ơnàng ngan. Là dùl nă cau coh kơphe den tàm dơ̆ pơrlòng do pal gơtùi sền sơ wì bơta niam bơh gar tơlir bơh kơphe dê geh ală bơta lơi tàm gar nàng he kờñ tă ai gơ. Pơn jat hơ̆ tơnơ̆ tŭ coh gơs phan den he kung pal klài nàng sền git wơl là he neh coh gơ di mờ bơta chài, di mờ bơta geh ngan bơh gar kơphe dê halà ờ. Dùl nă cau coh kơphe mờng chài là pal git sền sơ wì phan lài mờ tŭ mờ tơnơ̆ tŭ coh kơphe, ală bơta do ndrờm gơ ơm tàm bơnah pơrlòng lơm”.

Cau pơrlòng sền sơ wì gar kơphe ris lài mờ tŭ coh

Tàm 4 ngai, bơh ngai 06 tus ngai 09/10, 35 nă cau pơrlòng tus bơh 13 càr, ƀòn dờng tàm gùt lơgar neh lòt gan ală tơngume pơrlòng, geh: sền sơ wì gar kơphe lir; lơh kwèng mờ măi coh kơphe, phan bơna, gar kơphe nàng coh; lam lơh coh kơphe; klài, yal tơnggit bè phan lơh gơs he dê. Cau pơrlòng Nguyễn Thị Thu Hương tus bơh càr Dăk Nông yal, lài do, ală dơ̆ pơrlòng coh kơphe mờng tơrgùm tàm jơnau git wă, mờng chài uă mơya dơ̆ pơrlòng do gam geh bơta cau hùc tai mờ tơnguh bơta kuơ phan kơphe bơkah Việt Nam, mờng kwèng bơh jŏ bơh cau Việt Nam dê. Bè hơ̆ den tàng, tus bal dơ̆ pơrlòng do, cau coh kơphe ờ mìng geh kơnòl lơh tiơng pơn rơ bơta bơkah mờ gam pal yal tơnggit gơ tus mờ cau hùc kơphe kung bè git sền sơ wì cồng nha phan coh he dê: ‘Tŭ do, kơphe Việt Nam dê gam tam gơl niam ngan bè bơta niam, bè hơ̆ den tàng jơnau kờñ bơh cau hùc kơphe dê kung gơguh dùl bă loh làng ngan sơl. Khi geh jơnau kờñ bè bơta ƀô thồm kung bè kờñ jòi git bè ală tơl khà kơphe sàng goh, ală jơnau tơnggit gơ rềng tus anih lơh gơlik phan bơna ngui… Ngan ngồn do là tŭ niam dờng ngan nàng añ in git tam gơl bơta ƀô thồm, bơta bơkah tàm tŭ lơh gơlik phan he dê, tơngoh bơta niam nàng drơng cau ngui he in”.

Cau pơrlòng tam gơl bơta duh tàm tŭ coh kơphe

Jat ồng Lê Đức Huy, Kwang atbồ dờng Kông ty Simexco Dăk Lăk, Phó Củ tịc Hiệp hội kơphe Buôn Ma Thuột kơphe pà git, hùc kơphe Việt Nam neh geh jŏ jòng rhiang nam bal mờ tŭ tơngai bơtàu tơnguh bơh tờm kơphe dê. Tus tŭ do, Việt Nam neh thàn đòm jat ală bơta chài kông nghệ coh kơphe dunia dê, ală bơta lơi pa ngan rlau jơh bè măi mok kung neh geh tàm lơgar Việt Nam. Bulah bè hơ̆, phan bơna, măi mok kung ờ gơtùi ala kòn bơnus, tài anih lơh gơlik kơphe li la ngan den tàng pal geh ală cau geh bơto bơtê wil tơl, mờng chài, ngui măi coh kơphe dùl bă chài rơgơi hơ̆ sồng gơtùi lơh gơlik kơphe bơkah. Ồng Lê Đức Huy đơs nền: “Tàm ròt mpồl lơh gơlik bol he dê, anih lơh gơlik là cau lơh broă sa geh phan bơna den ală cau ngui gơ kung pal git tơnguh bơta kuơ phan hơ̆ sơl. Cau coh kơphe là cau dờp tơn kơphe gar do, den tàng nàng pơn jat tai bơtaù tơnguh drà kă bro, ờ mìng bol he bơtàu tơnguh khà lơh golwik mờ pal tơnguh jơnau kờñ tai. Ai dilah bol he mìng lơh phan bơkah ur ar mờ dut ndơl ờ git ngui den rê wơl mờ jơnau khà lơh gơlik uă rlau mờ jơnau kờñ den giă kơphe gơmù lơyah”.

Dơ̆ pơrlòng coh kơphe Việt Nam ờ mìng jờng rơ ală cau coh kơphe jak mờ gam jờng rơ ală gar kơphe Robusta Việt Nam tus dùl khà jơnhua dipal. Do kung là broă pơn jat tai mờ ală cau jơh nùs mờ gah lơh kơphe kờñ wèt tus nàng kờñ đơs nền, Việt Nam ờ mìng gơtùi lơh gơlik kơphe bơkah mờ gam git ngui kơphe bơkah lơh gơlik uă tai.

Cau mblàng K’Duẩn