VOV4.K’ho - Tam gơl sồ, ngui kông nghệ tàm broă lơh sa suơn sre neh mờ gam pơgồp bal kwơ màng lơh tam gơl gùng dà lơh sa, kă bro phan geh lơh bơh uă làng bol lơh broă sa, mpồl lơh sa kă bro tàm càr Dăk Lăk dê. Ală cồng nha mờ tam gơl sồ geh cèng wơl ală gam dong kờl gah lơh sa suơn sre càr Dăk Lăk tus rềp rơlao mờ broă lơh pa.

Nam 2019, ồng Nguyễn Văn Hiếu, kis tàm xã Hoà Thuận, ƀòn dờng Buôn Ma Thuột neh tơrbŏ bal mờ dùl mpồl lơh sa kă bro tàm càr, tam 1 lồ plai blơn sŭt tờm Nova. Plai blơn sŭt geh tam tàm hìu jàl, tuh dà geh lơh is, ngui phan điện tử nàng sền gròi broă hòn mờ gơs dờng bơh tờm dê.

Ƀí thư Tỉñ ủy Dăk Lăk ồng Nguyễn Đình Trung còp broă lơh plai blơn sŭt ngui kông nghệ kao

Tơnơ̆ mờ 2 nam ngui broă lơh do, mờ uă dơ̆ tơnhào geh uă, bơta niam uă, ồng Nguyễn Văn Hiếu đơs broă lơh pa geh uă bơta kwơ: “Ngui kông nghệ kao do dong kờl tơmù khà priă tă uă ngan, Tơmù priă cau lơh broă geh kwơ tus mờ làng bol lơh broă sa uă ngan. Tàm hơ̆ uă ngan là he iang nùs tàm broă tăc”.

Ờ mìng ngui kông nghệ sồ tàm broă lơh, uă làng bol kis tàm càr Dăk Lăk neh tơrbŏ bal yal phan geh lơh bơh să tờm dê tus mờ cau ngui sa bơh gùng internet. Geh pơnrơ ngan bè ồng Nguyễn Đình Vạn, kis tàm xã Cư̆ Né, kơnhoàl Krông Buk, bơh phan kơphe gar coh geh bơta niam uă Krông Buk geh dờp phan OCOP 3 sơrmañ kấp càr, ồng Vạn neh rơcang tơrbŏ bal mờ ală anih kă bro điện tử nàng tăc tơn phan geh lơh bơh să tờm dê ala mờ broă geh bơh ală mpồl lơh broă kòn gùng bè lài do. Broă tam gơl do neh dong kờl ồng tềm pềr priă tă, pờ ơnàng lơh sa, tơnguh bơtàu tiah lơh nàng tăc phan geh lơh bơh broă lơh sa suơn sre mhar, ƀuơn, niam, geh cồng nha. “Jơh ală cau blơi ndrờm gơtùi ngui điện thoại ngăc ngar mŭt tàm QR cord nàng jòi anih cau lơh geh mờ geh git phan do bơh tàm tiah lơi, atbồ bè lơi, phan geh lơh jăt mờ broă lơh bè lơi, geh sră dờp bơta niam lah ờ, broă lơh sa, tiah tam...  Bŭ lah cau năc ờ ơm rềp tàm ală tiah cau ngui sa kung gam gơtùi sền gròi geh. Bè hơ̆, khà pin dờn bơh cau ngui sa gơwèt mờ phan geh lơh ngai sơlơ gơguh uă”.

Ală phan geh lơh bơh broă lơh sa suơn sre geh khà OCOP ndrờm geh mã QR nàng jòi tiah tam

Jăt ồng Nguyễn Hoài Dương, Kwang atbồ Sở Nông nghiệp mờ Phát triển Nông thôn càr Dăk Lăk đơs, kông nghệ sồ neh mờ gam geh gơnoar kwơ màng tàm broă lơh sa suơn sre, càr Dăk Lăk neh ai rơlao 77 tơmàn đong nàng lơh geh “lơh sa suơn sre sồ”. Sở neh tơlik broă rơndăp lơh bè tam gơl sồ bơh gah lơh sa suơn sre mờ tơnguh bơtàu ƀòn lơgar tơngai bơh nam 2021 tus 2025, gùng dà tus nam 2030. Bơh broă ngui kông nghệ sồ tàm lơh sa, lài ngan neh cèng geh ală bơta kwơ pa, kơl jăp tàm broă lơh sa suơn sre càr dê. “Tam gơl sồ là dùl tàm ală phan lơh broă, bơta niam ai geh broă lơh pràn mờ bơta niam uă, bal mờ cồng nha tàm broă lơh sa suơn sre dê. Tàm mùl màl pà gŏ, tơngai do geh ală mpồl lơh sa kă bro bal mờ hợp ták xã neh git, git  broă lơh geh cồng nha, bơta kwơ tŭ tus bal tam gơl sồ pơgồp bal mờ ngui kông nghệ kao tàm broă lơh sa suơn sre mờ lài ngan neh cèng geh cồng nha”.

Nghị quyết pơrjum dờng Đảng ƀộ càr Dăk Lăk dơ̆ 17 neh ai: lơh sa suơn sre geh bơta kwơ màng ngan tàm broă lơh sa càr dê, geh di pơgăp 30% GRDP mờ ai broă lơh bal mờ priă geh di pơgăp 65% cau lơh broă in. Den tàng, tơngai tus, gah lơh sa suơn sre càr Dăk Lăk tơrgùm pràn ngan nàng lơh jăt broă tam gơl sồ nàng geh ală jơnau kờñ broă rơndăp lơh bè neh geh ai. Ồng Nguyễn Đình Trung, Ƀí thư Tỉñ ủy Dăk Lăk pà git: “Tam gơl sồ tàm gah lơh sa suơn sre là dùl gah ơnàng ngan mờ gơrềng tus tơn rài kis bal mờ lơh sa càr dê. Den tàng càr kung ai tàm ală tơngu me ai lài bè tam gơl sồ den gah lơh sa suơn sre là gah geh ai lài ngan. Càr kung neh geh nghị quyết bè tam gơl sồ đơs bal mờ neh kĭ hơ bal mờ tập đoàn FPT nàng lơh jăt broă tam gơl sồ. Tàm hơ̆, gah lơh sa suơn sre là gah geh ai lài ngan”.

Tam gơl sồ gam là gùng dà broă pal geh lơh tàm uă gah broă lơh sa mpồl bơtiàn, tàm hơ̆ geh gah lơh sa suơn sre. Gơwèt mờ càr geh uă broă lơh sa suơn sre bè càr Dăk lăk, broă tam gơl sồ sơlơ geh kwơ màng ngan nàng chồl pràn broă lơh gơs phan kă bro mờ pờ geh bơta niam tơnguh bơtàu mhar, tơrgùm bal.

Ngai 19 nhai 8 lài do, Ƀộ Nông nghiệp mờ Phát triển Nông thôn neh bơyai lơh lam sồr tam gơl sồ lơh sa suơn sre mờ tơnguh bơtàu ƀòn lơgar. Mờ lơh jăt broă yal tơngit, kơ sở dữ liệu kấp, atbồ mã sồ tiah tam. Lài ngan, Ƀộ Nông nghiệp mờ Phát triển Nông thôn rơwah tờm plai thanh long nàng tơrlòng lơh. Broă lơh gơs, ai jơnau tơngit, kơ sở dữ liệu kấp, atbồ mã sồ tiah tam tàm broă lơh pơn jăt tai tơnơ̆ jơnau tơngit, kơ sở dữ liệu atbồ phan sa ròng phan mờ kơ sở dữ liệu tơlik broă lơh ngan uă bơh gah lơh sa do tàm broă hơ geh chồl mhar broă tam gơl sồ. Bơh tŭ hơ̆, nàng tam gơl bồ tơngoh, broă atbồ pa, ai geh bơta pràn chồl pràn broă tơnguh bơtàu lơh sa suơn sre kơl jăp jăt broă “lơh sa suơn sre brê bơnơm, ƀòn lơgar pa, làng bol gơguh jăk” tàm tơngai tus.

Cau cih Hương Lý-Cau mblàng Ndong Brawl