VOV4.K’ho- Tơrmù bơnah phơng hoá họk, ngui phơng jơm is, hơ̆ là broă mờ cau lơh broă sa càr Gia Lai lơh nàng sơrlèt gan dơ̆ gơguh uă giă phơng sih sơnơm sền gàr phan tam. Gah lơh broă geh gơnoar tàm tiah do kung sơlơ ătbồ drà kă bro, mờ bơto sồr làng bol ngui phơng geh anih lơh gơlik loh làng nàng kờñ pleh gơtìp blơi phan ờ ngan.

Tơngai pa do, giă ală bơta phơng sih, sơnơm sền gàr phan tam gơguh jơnhoa neh lơh gơrềng tơn tus broă lơh sa sươn sre bơh cau lơh broă sa càr Gia Lai dê. Bulah ờ kờñ mơya uă hìu bơnhă neh pal tơrmù uă ngan bơnah phơng ơn tờm chi tam in. Ồng Trần Quốc Toản ơm tàm xã Ia Châm, kơnhoàl Ia Grai, pà gĭt: Nam do, hìu bơnhă añ lơh 2 lồ kơphê, 5 sào plai màk, nam do tài bơh giă phơng sih gơguh jơnhoa rlau mờ ală nam den hìu bơnhă kung ơn phơng gơmù ƀà dùl êt. Bè ală nam, hìu bơnhă añ ơn phơng ai 2 lồ kơphê in là 1 tấn mờ nggùl dùl dơ̆ ơn, nam do mìng khin ơn dùl tấn gời lơm. Bè ală nam, ơn phơng kàl mìu là 3 dơ̆ mơya nam do mìng khin ơn 2 dơ̆ lơm gời.

Bal mờ broă tơrmù bơnah phơng hóa họk, cau lơh broă sa càr Gia Lai ngui jơh ală phơng sơrbì bơh lơh broă sa sươn sre nàng jơm is phơng vi siñ ơn tờm chi tam in. Ồng Lại Quang Huấn ơm tàm thôn Chư Wâu, xã Chư A Thai, kơnhoàl Phú Thiện gam tam 6 lồ chi sa plai, yal: Nam do, phơng vô kơ giă gơguh uă ir, bơh hơ̆ añ hơ̆ sồng lùp bơsram, kơlôi sơnơng tai nàng lơh  phơng vi siñ. Ngui jơh ală phan gơtùi lơh gơs phơng bơh hìu bơnhă dê, gùt dar hìu bơnhă tàm ƀòn lơgar blơi khi dê mờ giă ờ kas ngan den he jơm is tơnơ̆ hơ̆ he ơn tờm chi tam in, dilah đơs ngan den là gơ niam ngan ih.

Giă phơng sih sơnơm sền gàr phan tam ngui tàm broă lơh sa gơguh jơnhoa, cau lơh broă sa càr Gia Lai neh jơm is phan jơngkah bơh broă lơh sa sươn sre nàng lơh gơs phơng ơn tờm chi tam in

Nàng gròi sền bơta niam, giă ală bơta phơng sih, sơnơm sền gàr phan tam ngui tàm broă lơh sa sươn sre tàm ală ƀòn lơgar, ală anih lơh broă geh gơnoar bơh càr Gia Lai dê neh sơlơ lòt sền, jăt sền broă lơh gơlik, tăc bro ală bơta phan do. Bơh bồ nam tus tŭ do, Gia Lai neh gŏ mờ lơh glài 78 dơ̆ lơh tìs tàm gah broă lơh phơng sih, sơnơm sền gàr phan tam; lơh glài mờ priă 230 tơlak đong mờ sồr tơn jơh lơh broă 3 anih kă bro phơng sih. Ồng Lê Hồng Hà, Kwang ătbồ Kụk Ătbồ drà kă bro càr Gia Lai, pà gĭt: Ờ dùl êt mpồl lơh sa kă bro sơmờm giă phơng sih gơtìp lơh gơguh jơnhoa nàng lơh gơlik mờ tăc tàm drà phơng sih ờ niam. Tềng đăp bơta hơ̆ kung neh sồr ală mpồl ătbồ drà kă bro, tàm hơ̆ geh mpồl lơh broă mhar lơh ală broă lơh ờs mờng, tàm hơ̆ geh ai dùl êt gơwèt mờ phan bơna phơng sih. Tŭ do, bol añ neh pơyua phan ai dùl êt hơ̆ nàng lòt sền swì mờ khà là 10 bơta phan phơng sih, tŭ do, neh geh jơnau yal 4 bơta phan phơng sih lơh tìs.

Tềng đăp broă giă phơng sih, sơnơm sền gàr phan tam ngui tàm gah lơh broă sa sươn sre gơguh uă, gah lơh broă sa sươn sre càr Gia Lai bơto sồr cau lơh broă sa pal ătbồ sền gàr sươn chi dipal, ngui phơng sih gĭt loh anih lơh gơlik nàng pleh gơtìp blơi phơng ờ niam. Ồng Bùi Trọng Thành, Kwang ătbồ Cơldŭ lơh broă Lơh broă sa sươn sre mờ Bơtàu tơnguh Ƀòn lơgar kơnhoàl Phú Thiện, đơs: Cơldŭ lơh broă Lơh broă sa sươn sre kung mblàng yal bơto pơlam làng bol lơh broă sa in mờ ală tiah in là ngui phơng hóa họk den kờñ pal ngui phơng niam, geh anih lơh gơlik loh làng. Mơkung là ngui dùl bă tềm pềr geh cồng nha. Bal mờ hơ̆, cơldŭ lơh broă lơh broă sa sươn sre kơnhoàl kung sền dờng màng broă lơh bơto sồr làng bol jơh nùs ngui ală phơng sih vi siñ, phơng sih hữu kơ tàm broă lơh sa nàng tơrmù ƀà priă tă ngui.

Ồng Lê Tấn Hùng, Phó Kwang ătbồ Cơldŭ lơh broă Lơh broă sa sươn sre mờ Bơtàu tơnguh Ƀòn lơgar kơnhoàl Đăk Đoa pà gĭt, bơh bồ nam 2021 tus tŭ do, giă tăc blơi bơh uă phơng sih sơnơm sền gàr phan tam ngui tàm broă lơh sa sươn sre mờ xăng zờu ndrờm sùm gơguh jơnhoa. Tàm hơ̆, ală sơnơm sền gàr phan tam gơguh giă bơh 15 tus 30%. Mìng is phơng hoá họk, geh uă bơta phơng gơguh giă tus bàr dơ̆. Bơta do lơh priă tă blơi phơng sih gơwèt mờ tơl lồ kơphê, tiêu gơtìp gơguh tai tus jơ̆t tơlak đong. Jăt ồng Hùng yal, bè đah cau lơh broă sa, nàng tơrmù ƀà bơta gơrềng bơh giă phơng sih sơnơm sền gàr phan tam gơguh jơnhoa, tàm pơnring priă tă ngui tàm broă lơh sa, den kờñ pal geh broă lơh tam phan jăt gùng dà hữu kơ, kơ̆ kơl jăp gơwèt mờ chi tam. Tàm hơ̆, làng bol pal lơh lài broă lơh tuh dà tềm pềr, tam ñhơ̆t, khuah phòng brê tàm sươn nàng gàr bơta rài nsồp ù mờ gàr bơta sùh iò ai ù in. Gơwèt mờ phơng sih, ồng Hùng bơto sồr làng bol ai lài ngui phơng hữu kơ nàng tơrmù priă tă ngui tàm broă lơh sa. Ồng Lê Tấn Hùng, đơs: Tơngai lài, càr mờ anih lơh broă geh gơnoar kâp kơnhoàl geh sră bơto pơlam sùm, mblàng yal, hòi jà làng bol tơrmù ƀà uă ngan rlau jơh broă bơcri priă blơi phơng sih hoá họk, ai lài bơcri priă blơi phơng hữu kơ; ngui jơh ală phơng hữu kơ gam geh tŭ do, ală phan jơngkah bơh lơh broă sa sươn sre, nàng jơm ngui jơh, tơrmù ƀà broă bơcri priă, tơnguh uă cồng nha ai làng bol in.

Mpồl lơh broă geh gơnoar lòt sền bơta niam phơng sih

Tam gơl broă lơh tam phan jăt gùng dà hữu kơ geh dong cau lơh broă sa bơnah lơi tềm pềr priă tă ngui tàm broă lơh sa tàm tơngai giă phơng sih, sơnơm sền gàr phan tam ngui tàm broă lơh sa sươn sre sùm gơguh uă bè tŭ do.

Cau cih Hoàng Qui- Cau mblàng Lơ Mu K’Yến