VOV4.K’ho- Mho ngai 22/04, Sở Nông nghiệp mờ Phát triển Nông thôn càr Gia Lai bơyai lơh dơ̆ jàu sră cơng tàng phan bơna OCOP ai ală phan bơna pơnrơ is bơh ală xã dê tàm càr.

Càr Gia Lai jàu sră cơng tàng phan bơna OCOP 2021

Nam 2021, càr Gia Lai pơn jăt tai bơtàu tơnguh geh 67 phan bơna pơnrơ is, geh dờp cồng nha sền swì mờ pà sră cơng tàng phan bơna OCOP. Tàm hơ̆, geh 3 phan bơna lơh geh khà 4 sơrmañ mờ 64 phan bơna lơh geh khà 3 sơrmañ. Phan bơna dờp sền lơh geh ală khà sơrmañ geh Ủy ƀan Ñân zân càr pà sră cơng tàng, geh ngui măt kă bro cơng tàng “OCOP Gia Lai” mờ khà sơrmañ lĭp tàm kơldung prăp phan jăt jơnau sồr bơh kơrnoăt boh lam dê. Cồng nha dờp geh ngui tàm tơngai 3 nam kờp bơh tŭ ngai kĭ kơrnoăt dờp. Bè hơ̆, tơnơ̆ 03 nam lơh jăt Broă lơh OCOP, Gia Lai neh geh 25 phan bơna lơh geh 4 sơrmañ mờ 189 phan bơna lơh geh 3 sơrmañ.

Cau mblàng Lơ Mu K’Yến