VOV4.K’ho- Mờ rlau 80 rbô lồ bùm blàng, ai cồng nha tơnhàu rlau 1 tơlak 600 rbô tấn pah nam, tŭ do, Gia Lai là càr tam bùm blàng uă ngan rlau jơh gùt lơgar. Bulah bè hơ̆, priă lơh geh bơh cau tam bùm blàng dê gam dùl êt, sồr pal geh ală tam gơl bơh broă tam mờ lơh gơlik bùm blàng nàng tơnguh niam bơta ƀuơn bơh tiah tam bùm blàng dê mờ tơnguh priă lơh geh ai làng bol in tai. 

Hìu bơnhă bi Rơ Com H’Duyệt ơm tàm xã Chư Ngọc, kơnhoàl Krông Pa, càr Gia Lai geh 1 lồ bùm blàng. Nam lài, tơnhàu geh uă, khà priă tac kơ̆ kơljap đau den tàng tŭ neh kờp jơh priă tă lơh, bi lơh geh 30 tơlak đông. Nam do, kòp croañ nha bùm blàng lơh suơn tam bùm blàng bi dê gơtìp gơmù cồng nha tơnhàu, bi tơnhàu mìng geh nggùl pơndrờm mờ kàl lài: “Nam lài tơnhàu geh uă, tac den yòm tai. Nam do, bùm blàng ờ geh kơnuh, cồng nha tơnhàu ờ gơguh. Dan dà lơgar geh ală sơntìl bùm blàng pa geh uă kơnuh rlau”.

Tŭ do, tàm càr Gia Lai geh rlau 80 rbô lồ bùm blàng, geh tam uă ngan tàm ală kơnhoàl tiah đah jum mat tơngai lik bè Krông Pa, Ayun Pa mờ Ia Pa. Bulah bè hơ̆, mờ cồng nha tơnhàu kờp bal tŭ do geh pơgap 20 tấn tàm dùl lồ, tơnơ̆ tŭ kờp jơh priă tă lơh, tơl lồ bùm blàng ai geh priă jền pah nam mìng bơh 20 tus 30 tơlak đông. Ồng Nguyễn Như Cường, Kwang atbồ Kụk tam phan, gơ wèt Ƀộ Nông nghiệp mờ Phát triển Nông thôn pơlam làng bol pal tam sơntìl bùm blàng sơndră kòp, ai cồng nha tơnhàu uă: “Bol he pal ai sơntìl niam, ngui bơta chài lơh broă tơl làm, bơcri priă blơi phơng sih, dà ƀồm, lơh bè lơi tơnguh cồng nha tơnhàu, priă jền lơh geh, khà lơh geh bùm blàng dê. Dùl bơta tai là hìu măi lơh bùm blàng pal pơgồp bal mờ geh kơnòl tàm broă bơtàu tơnguh tiah tam phan, dong kờl làng bol bơt bơtàu wơl ală hợp tak xã pơlam lơh sa suơn sre, tam gơl bơta chài tam phan pa”.

Cau lơh broă sa kơnhoàl Krông Pa, càr Gia Lai tơnhàu bùm blàng

Ồng Lưu Trung Nghĩa, Kwang atbồ Sở Nông nghiệp mờ Phát triển Nông thôn càr Gia Lai đơs là, pal bơtàu tơnguh tờm chi tam do jat gùng dà kơ̆ kơljap jŏ jòng sùm bơh bơta lơh bal tam mờ lơh gơlik uă. Gùt càr geh 5 hìu măi lơh ƀòk bùm blàng, mơya ờ hềt geh hìu măi lơi kĭ sră pơrgon blơi phan lơh gơs mờ làng bol. Bơta do lơh cau tam bùm blàng gơtìp rơmơp ndơl tàm broă lơh sa. Bơdìh hơ̆ tai, kông nghệ lơh gơlik phan bơh ală hìu măi dê tŭ do tàm khà di mơ, phan bơna tac hờ lơgar ndai ờ hềt li la, bơta pràn tàm pơrlòng ờ hềt uă. Mờr tus, den gah lơh sa suơn sre càr Gia Lai geh pơgồp bal mờ Mpồl lơh bùm blàng Việt Nam nàng bơsong ală broă do: “Tơngai lài, tŭ cau lơh broă sa lơh gơlik khà bùm blàng bè hơ̆, mơya mpồl lơh sa kă bro mìng blơi lơm, ờ hềt geh sră pơrgon bơh bồ kàl. Den tàng kơp kờñ là geh ală hìu măi lơh gơlik phan geh bơta lơh bal do. Bol hi geh lơh broă jơh nùs mờ Mpồl lơh bùm blàng Việt Nam nàng lơh ngan hòi jà tàm broă do. Mờ tiah tam bùm blàng 80 rbô lồ do, dilah bol he lơh niam broă do den gơtùi hòi jà bơh 3 tus 4 hìu măi geh kông nghệ niam, priă jền niam den gơtùi lơh gơlik tiah tam phan bơtàu tơnguh kơ̆ kơljap jŏ jòng sùm”.

Kơnờm geh lơh gơlik mờ tac hờ lơgar ndai, tŭ do bùm blàng mờ ală phan lơh gơs bơh bùm blàng neh geh bơta pràn nàng tơnguh priă jền lơh geh. Bè hơ̆ den tàng nàng pơgồp bơnah tơnguh priă jền lơh geh ai cau lơh broă sa in, mờ kung tơnguh bơta pràn bơh tiah tam bùm blàng uă ngan rlau jơh gùt lơgar dê, Gia Lai pal geh ală tam gơl, tam bùm blàng jat gùng dà kơ̆ kơljap jŏ jòng sùm, geh cồng nha rlau.

Cau mblàng K’Duẩn