Ală ngai do, tàm ƀlàng sre dờng ơnàng gơ wèt ală sàh Chư A Thai, Phú Thiện, càr Gia Lai, kòi neh dum jơh bè dùl pang chèu dờng gơ lă jòng ờ git lơh. Bàr pe lŏ sre, cau lơh broă sa neh ơpah măi tơ wès gờñ. Ồng Kpă An, kòn cau Jarai ơm tàm ƀòn Ring Dap, sàh Chư A Thai lòt còp lŏ sre gŏ gơ lơh chờ hờp ngan tài sơn yùr kòi să gar. Ồng pà git, hìu bơnhă geh mờr 1 lồ 5 sàu kòi sre 2 kàl, dà ndrờm gơ hòr is bơh rbòng dà Ayun Hạ den tàng pah nam tơnhàu geh mờr 20 tấn kòi: “Tŭ do lơh kòi sre tàm tiah do dilah mìng nàng sa tàm hìu bơnhă den neh jơngkah uă ngan. Tơnơ̆ tŭ kờp jơh priă tă bè priă blơi phơng sih, priă blơi sơnơm gơ sơt tu, priă ơpah cau lơh ù, tơ wès kòi…, bơnah gam wơl hìu bơnhă sa gùt nam tơn. Ờ mìng tơl sa mờ gam gơtùi prap ai nam tơnơ̆ in tai mờ tac nàng geh tai priă jền. Lài do lơh kòi mìr, ờ huan geh, tơnhàu ờ uă. Ai tŭ do, lơh kòi sre kơnờm geh rbòng dà Ayun Hạ, geh tơl dà lŏ sre in, cồng nha tơnhàu neh gơguh uă rlau. Bơh tŭ tam gơl nàng lơh kòi sre, rài kis làng bol dê geh hờm ram, wil tơl rlau”.

Tàm ală ƀlàng sre gơ wèt sàh Phú Thiện, càr Gia Lai – tiah geh mat kă bro “Phe Phú Thiện” tiơng pơn rơ ngan, sap ntas măi tơ wès kòi kung neh nggồr ngan. Ồng Nay Keng, kòn cau Jarai, atbồ thôn Rbai, sàh Phú Thiện pà git, kơnờm geh dà bơh rbòng dà Ayun Hạ, làng bol neh lơh li la broă lơh sa, lơh gơs ală tiah mìng tam tàu, bùm lô, tờm jràu… Lài do, làng bol mìng lơh kòi tơl sa, ai tŭ do gam git lơh bal mờ mpồl lơh sa kă bro nàng tam kòi bơkah, cèng mat kă bro “Phe Phú Thiện” tiơng pơn rơ: “Bơh tŭ geh bơtơt rbòng dà Ayun Hạ, broă lơh sa làng bol tàm tiah do dê neh ƀuơn uă rlau pơndrờm mờ lài. Dà bơh tơnau geh lam bơh rbòng dà rê tus tàm ƀlàng sre, kơnờm bơh hơ̆ mờ làng bol geh dà nàng drơng broă sih tam in, ờ gam gơ wèt tàm dà mìu bè lài do tai. Kàl lơi kung geh tơl dà ƀồm, kòi hòn gơs niam, cồng nha tơnhàu geh uă, ờ gam siơ̆u siar bè lài do tai. Làng bol ờ mìng tam kòi 2 kàl tàm nam mờ gam geh tai bơta ƀuơn nàng rề ơnàng bă ù lơh sa, pơgồp bal tam tai tờm jràu, bùm lô nàng tơnguh priă jền lơh geh. Kơnờm bơh hơ̆, rài kis lơh sa làng bol dê ngai sơlơ kơ̆ kơljap mờ bơtàu tơnguh. Rbòng dà Ayun Hạ ngan ngồn neh dong làng bol tam gơl mờng kwèng lơh sa, pơgồp bơnah bơtàu tơnguh lơh sa ƀòn lơgar dê”.

Ayun Hạ là dùl tàm ală broă lơh rbòng dà dờng ngan tàm tiah Tây Nguyên, ai dà ƀồm rlau 13 rbô 500 lồ chi tam ală bơta in, tàm hơ̆ uă ngan là kòi sre. Bal mờ ală sơntìl kòi pa, ngui gơguh jak bơta chài măi mok, ală nam do, dà bơh rbòng dà Ayun Hạ neh pơgồp bơnah lam cồng nha tơnhàu kòi tàm ală sàh Phú Thiện, Ayun Pa, Chư A Thai gơguh 8 tấn dùl lồ, geh tiah gơguh tus 10 tấn 1 lồ. Ồng Phạm Văn Lượng, lài do là Ƀí thư Huyện ủy kơnhoàl Phú Thiện, tŭ do là Phó Ƀí thư Đảng ủy – Củ tịc Anih duh broă Làng bol sàh Chư A Thai, càr Gia Lai pà git, kòi là chi tam tờm ngan tàm sàh. Lơh jat jơnau lơh nền tàm pơrjum bơh Huyện ủy kơnhoàl Phú Thiện lài do dê bè lơh pràn ngui bơta chài măi mok pa tàm broă lơh sa, wèt tus bơt bơtàu mat kă bro “Phe Phú Thiện”, pah nam, sàh ai lài priă nàng dong kờl làng bol lơh broă sa, ngan là làng bol jơi bơtiàn dồ êt nă cau rề ơnàng ƀlàng sre dờng. Rbòng dà Ayun Hạ kung neh dong làng bol tam gơl bồ tơngoh kơlôi sơnơng lơh sa, ngan là cau jơi bơtiàn dồ êt nă cau neh tam gơl bơh broă tam phan mìng gơ wèt tàm dà mìu gơ gơs tam mìng dùl bơta phan, sơngka sền gàr geh cồng nha: “Ngui geh cồng nha broă lơh rbòng dà Ayun Hạ, geh dà nàng bơtàu tơnguh lơh sa, làng bol tơrgùm tam gơl ală broă lơh sa. Gơ wèt mờ kơnhoàl Phú Thiện lài do den làng bol neh lam lơh ală broă lơh lơh bal tam kòi sre cèng wơl cồng nha uă. Bơh hơ̆ làng bol neh gàr kơ̆ rài kis, ngan là làng bol kòn cau Jarai neh ngui uă sơntìl kòi geh cồng nha tơnhàu mờ priă jền lơh geh uă”.

Ală ƀlàng sre kòi dum rơmit tŭ do neh cèng wơl bơta chờ hờp tơnhàu geh uă ai làng bol lơh broă sa tàm ală sàh Phú Thiện, Ayun Pa, Chư A Thai, càr Gia lai ai tơnggŏ loh làng ngan cồng nha lơh geh bơh rbòng dà Ayun Hạ. Bơh bơta mìng lơh sa ờ huan geh cồng nha, gơ wèt tàm dà mìu, làng bol ală jơi bơtiàn tiah do neh crăp rơcang sih tam 2 kàl kòi sùm, pơgồp bal tam tai ală bơta chi tam ndai, rơhời tơnguh priă jền lơh geh, brồ guh lơh pas. Cồng nha hơ̆ kung ai gŏ gơtha dờng ngan bơh broă ngui jak chài – măi mok mờ ngui geh cồng nha ală broă lơh rbòng dà tàm bơtàu tơnguh broă lơh sa suơn sre kơ̆ kơljap sùm tàm tiah Tây Nguyên.