Tàm ƀòn Jung, sàh Krông Păc, càr Dăk Lăk, ồng Y Thơm pà git, suơn is hìu ồng dê mìng tăc geh di pơgăp 35 tấn, ờ uă rơlao mờ ală kàl lài: “Tài bơta trồ tiah ờ niam den tàng geh ờ uă suơn gơtìp ờ geh tơnhào, plai ờ niam pơn drờm mờ ală nam den tàng tăc mờ lơgar bơdìh nam do gơmù uă ngan den tàng priă kung gơtìp kal ke. Añ mờng tăc plai jơh di lah geh den bơh 40 rơbô tus 50 rơbô đong tàm 1 kĭ”.

Ờ mìng suơn hìu ồng Y Thơm, uă hìu làng bol tàm Krông Păc, krông Năng ha là Cư̆ Kuiñ kung ndrờm bal sơl. Di lah bè nam lài cau tus blơi tàm phà lơm nàng dan blơi lài, priă gơguh jăt ngai, den tŭ do drà kă bro gơmù loh làng ngan. Bơta niam plai gơmù lơh mpồl lơh sa kă bro pal kơlôi sơnơng nền. Ồng Lê Anh Trung, Củ tịc Tơrgùm ală Mpồl Sầu riêng càr Dăk Lăk mblàng: drà kă bro lơgar Lo, do là drà kă bro tờm kung neh lơh nền nòn broă blơi. Di lah lài do cau tus blơi gam ƀuơn tàm broă tơrgùm phan jăt gùng dềt den tŭ do, jơnau pal jăt bè màh sồ tiah tam, hìu dăp mờ jòi suơn tam den broă tus blơi pal geh lơh tàm bơta geh ai. Bal mờ hơ̆, Dà lơgar ai geh jơnau cau tus blơi pal cih măt dan kă bro mờ lơh jăt kơnòl dia tŭ blơi plai sầu riêng. Ồng Lê Anh Trung đơs nền: “Cau tus blơi kờñ blơi plai sầu riêng pal dan cih măt kă bro gah lơh broă geh tơl bơta geh ai. Di lah ờ, tŭ anih lơh broă dia ha là kwang àng gŏ rơ̆p lơh glài uă ngan. Bơh ngai 01 nhai 7, broă blơi tăc pal dờp dia 5%, khà lơh glài ai ală cau lơi tìs kung ờ tŭ lơi ờ uă. Den tàng geh adăt boh lam loh làng, drà kă bro nam do niam rơlao, ờ gam bơta tàm phà bè lài do tai”.

Mờ broă tam gơl bè adăt boh lam, drà kă bro mờ geh bal bơta geh tàm kàl pa, broă cau blơi ờ lơh jăt, tam phà blơi tàm kàl plai sầu riêng nam do neh gơmù. Làng bol lơh broă sa kung tam gơl nùs nhơm, git tàm broă kơlôi sơnơng tŭ tăc. Ồng Nguyễn Công Điềm, sàh Ea Knuêc, càr Dăk Lăk đơs bè do: “Ală nam lài priă tăc gơguh gơmù kal ke ngan, nam do kơnờm anih lơh broă atbồ mờ mpồl lơh sa kă bro Dà lơgar tus bal, drà kă bro ring niam rơlao uă ngan”.

Ồng Lê Đăng Minh, tàm sàh Quảng Phú, càr Dăk Lăk den pà git: “Nam do añ blơi kàl dơ̆ 5, khà kờp dŭ geh 20 tấn. Tus tŭ do kung neh geh jăt mờ jơnau kơ̆p kờñ, piang sầu riêng lơ-ŭt, priă tăc 70 rơbô đong tàm 1 kĭ”.

Tŭ do gùt càr Dăk Lăk geh di pơgăp 40 rơbô lồ ù tam tờm sầu riêng, rơlao 26 rơbô lồ neh ai tơnhào, khà geh tàm kàl nam 2025 kờp dŭ geh 392 rơbô tấn, geh bơh nhai 8 tus nhai 10. Nàng gàr niam khà geh ai tăc mờ lơgar bơdìh, Anih duh broă Làng bol càr neh ai jơnau Sồr bè broă lơh bal mờ tăc plai sầu riêng kàl lơh sa nam 2025, sồr ală tiah atbồ nền nòn màh tiah tam, hìu dăp, jăt sền kloh niam phan sa, kơrian broă rồn bơklơn khà priă tăc.

Ồng Nguyễn Minh Huấn, Kwang Lam bồ Sờh Broă lơh sa suơn sre mờ Tiah ơm kis càr Dăk Lăk đơs tờm: “Sờh pơgồp bal mờ Anih duh broă Làng bol ală sàh, sơnah ƀòn nàng tơnguh uă jơnau git wă tàm broă atbồ bơta niam, bơto sồr broă tam gơdờp mờ tam gơl trồ tiah; tơnguh broă sền gròi kloh niam phan sa, màh sồ tiah tam, hìu dăp plai sầu riêng tăc mờ lơgar bơdìh”.

Kàl tơnhào nam 2025 di gơlan lơh làng bol tam tờm sầu riêng tàm càr Dăk Lăk ờ hềt di nùs tài priă tăc gơmù. Mơya bè jŏ jòng, tŭ bơta niam phan geh lơh, lơh jăt nền nòn bơh drà kă bro dê den geh niam, rơ̆p dong kờl gah phan do bơtàu tơnguh kơl jăp, pleh mờ “gơguh priă ờ di pal” mờ wèt tus bơta kwơ mùl màl tàm drà kă bro ală lơgar dê.