VOV4.K’ho- Ngai 17/9 pa do, tàm kơnhoàl Krông Păk, càr Dăk Lăk pa do neh bơyai lơh yal tac hờ lơgar ndai khà sầu riêng sơn rờp jat Nghị địñ thư kĭ đah Ƀộ Nông nghiệp mờ Phát triển Nông thôn Việt Nam mờ Tổng kụk sền sơ wì tă dia phan blơi tac mờ lơgar ndai lơgar Lo. Broă do lơh gơlik tŭ niam dờng ngan ai gah lơh phan sầu riêng bơh Việt Nam dê in tac uă jat sră pơrgon tus drà kă bro blơi phan uă ngan rlau jơh dunia .

Ƀộ trưởng Lê Minh Hoan còp tiah tam sầu riêng geh lơh mã sồ tiah tam tàm kơnhoàl Krông Păk, càr Dăk Lăk

Dơ̆ pơndiang khà sầu riêng sơn rờp tac uă hờ lơgar ndai jat sră pơrgon jat Nghị địñ thư geh kĭ đah Ƀộ Nông nghiệp mờ Phát triển Nông thôn Việt Nam mờ Tổng kụk sền sơ wì tă dia phan blơi tac mờ lơgar ndai lơgar Lo là rlau 300 tấn geh lơh gơlik tàm càr Dăk Lăk. Do là càr geh bă ù tam sầu riêng uă dơ̆ 2 gùt lơgar (tơnơ̆ Tiền Giang) mờ mờr 15 rbô lồ, khà lơh geh nam 2022 kờp dŭ geh mờr 170 rbô tấn.

Ồng Y Giang Gry Niê Knơng, Phó Củ tịc Ủy ƀan Ñân zân càr Dăk Lăk chờ hờp pà git, tŭ do càr neh geh Tổng kụk sền sơ wì tă dia phan blơu tac mờ lơgar ndai lơgar Lo ring bal 4 mã anih ơn tàm kơldung sầu riêng mờ 23 mã sồ tiah tam (geh mờr nggùl mã sồ tiah tam gùt lơgar geh ring bal). Bal mờ ală broă lơh ngan bơh Ƀộ Nông nghiệp mờ Phát triển Nông thôn dê tàm cribơyai bal, den cồng nha do gam lơh tềl ală bơta pơn đơl dờng ngan bơh mpồl cau lơh broă sa, mpồl lơh sa kă bro tàm càr dê tai: “Nàng geh ală khà sầu riêng sơn rờp tac uă jat sră pơrgon geh yal tàm dơ̆ bơyai lơh ngai do den ală tiah tam, anih ơn tàm kơldung sầu riêng neh pal rơcang lài mờ lòt gan uă ngan bơnah broă sền sơ wì bơh anih lơh broă mờng chài 2 lơgar dê, lơh jat jơnau sồr bè gròi sền phan lơh aniai, ờdo ờdă phan sa, lơh jat di jơnau sồr bè ơn tàm kơldung mờ gàr niam jòi git anih lơh gơlik”.

Khà sầu riêng tac uă hờ lơgar ndai jat sră pơrgon sơn rờp bơh Việt Nam dê

Đơs tàm dơ̆ bơyai lơh, Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan đơs nền, Nghị địñ thư bè jơnau sồr gròi sền kòp phan tam geh kĭ tàm ngai 11/7/2022 đah Ƀộ Nông nghiệp mờ Phát triển Nông thôn Việt Nam mờ Tổng kụk sền sơ wì tă dia phan blơi tac mờ lơgar ndai lơgar Lo là cồng nha bơh bơta lơh ngan cribơyai tàm tơngai jŏ jòng bơh ală anih lơh broă mờng chài bơh 2 lơgar dê. Bal mờ hơ̆ là bơta lòt bal kơ̆ dơn ngan bơh mpồl ală cau tam mờ tac hờ lơgar ndai sầu riêng Việt Nam.

Ƀộ trưởng đơs sùm, broă tac uă hờ lơgar ndai jat sră pơrgon sầu riêng sơn rờp geh bơyai lơh là bơta chờ hờp bal bơh làng bol tiah đah jum mat tơngai mut dà lơgar, tiah đah jum mat tơngai lik dà lơgar mờ Tây Nguyên dê. Do là dùl broă geh kuơ dờng màng ngan tài bơh Lo là drà kă bro blơi sầu riêng uă ngan rlau jơh dunia. Bal mờ tŭ niam mut tàm drà kă bro dờng, dong mpồl lơh sa kă bro mờ cau lơh broă sa lơh geh priă cồng uă rlau bơh ală bơta plai chi bơkah do, tac uă hờ lơgar ndai jat sră pơrgon kung ai tơlik ală bơta lòng dờng ngan tài bơh ală tơngume bơh Nghị địñ thư dê mùl màl là ală jơnau sồr kỹ thuật sồr gah lơh gơlik, ơn tàm kơldung mờ tac hờ lơgar ndai pal lơh jat. Ƀộ trưởng Lê Minh Hoan đơs nền: “Tàm tŭ tơngai mut gơ rờm bal gùt plai ù mờ lơh sa tơlir, lơh sa tơrbŏ bal tŭ do, bồ tơngoh lòt bal mờ gơp là pal geh. Plai sầu riêng halà khat dùl bơta phan lơh gơs bơh suơn sre lơi ndai kờñ brồ guh, lơh gơlik drà kă bro kơ̆ kơljap, den tơl nă cau tàm ròt ală bơta kuơ phan lơh gơs bơh suơn sre pal pơgồp bal bơta pràn, dùl nùs bal, lơh broă bal nàng bơtàu tơnguh”.

Jat Kụk tam phan, kờp jơh bă ù tam sầu riêng lơgar he dê tŭ do geh mờr 90 rbô lồ mờ khà lơh geh pah nammờr 1 tơlak 300 rbô tấn plai, geh tam uă ngan tàm tiah đah jum mat tơngai lik dà lơgar, Tây Nguyên mờ tiah ring dà dờng Cửu Long. Plai sầu riêng Việt Nam dê geh đơs là geh bơta niam uă ngan. Broă geh tac uă hờ lơgar ndai jat sră pơrgon là tŭ niam kuơmàng ngan gơ wèt mờ plai sầu riêng ris mờ pơn jat tai hơ pơrgon cồng nha cribơyai niam ngan nàng pờ mpồng drà kă bro ai ală bơta phan lơh gơs bơh suơn sre ndai bơh Việt Nam dê tàm tơngai tus.

Cau mblàng K’Duẩn