VOV4.K’ho - Tàm ală nam do, uă hìu làng bol kòn cau Kơtu, kis tàm xã tiah kơh bơnơm Hoà Bắc, kơnhoàl Hoà Vang, ƀòn dờng Đà Nẵng bơcri priă tam brê, cèng geh uă ngan priă, dong kờl làng bol brồ guh klàs mờ rơƀah, wil tơl tàm rài kis. Mơya, làng bol mìng tam brê keo, den tàng broă di gơlan ù gơtìp dà cò pơrdô, ù tiah gơtìp aniai. Pa do, UɃÑZ ƀòn dờng Đà Nẵng neh tơlik broă dong kờl, lam sồr làng bol tam chi geh dơm chi dờng, cèng geh uă bơta kwơ rơlao, dong kờl làng bol geh tơnguh bơtàu lơh sa, mờ pơgồp bal tàm broă sền gàr tiah kis.

                                 Dơ̆ tơnhào brê pa do, hìu nhă lŏ Toả geh 350 tơlăk đong

Lài do, lŏ Hồ Thị Thanh Toả, kis tàm ƀòn Tà Lang, xã Hoà Bắc, kơnhoàl Hoà Vang dờp bă ù bơh Dà lơgar nàng tam 5 lồ brê. Kơnờm mờ broă git ngui broă lơh pa tàm broă tam, sền gàr den tàng chi keo hìu nhă lŏ neh hòn gơs niam. Kàl tơnhào nam do, hìu nhă lŏ Toả geh di pơgăp 350 tơlăk đong. Lŏ Toả pà git, kơnờm mờ tam brê, hìu nhă tŭ do neh wil tơl rơlao, geh priă nàng lơh hìu mờ blơi rơndeh Honda, ti vi, ală phan ngui geh kwơ tàm hìu. Tŭ do, lŏ Hồ Thị Thanh Toả gam lam sồr, bơto sồr làng bol tàm ƀòn kòn cau Kơtu tơnguh bơtàu lơh sa mờ brê. “Làng bol kòn cau Kơtu gơtìp kal ke ngan, geh rơndăp broă bơh Dà lơgar jào ù, jào brê ai làng bol tơnguh bơtàu lơh sa, tơnguh cồng nha, rơhời gơguh. Là cau kòn cau Kơtu lam sồr làng bol tam brê, ờ geh ală hìu rơƀah, hìu jơgloh. Tàm nam pa, hìu nhă tam gơl tam chi geh dơm dờng, chi jŏ nam”.

                    Tŭ neh geh priă, bi Nguyễn Văn Lâm tam tờm chi dơm dờng nàng ala tờm keo

Tŭ do, mờr 200 hìu làng bol kòn cau Kơtu tàm xã Hoà Bắc geh rài kis tơl ngui tơl sa kơnờm bơh broă tơnguh bơtàu tam brê. Kòn cau Kơtu kis tàm do ờ gam mus kơl brê lơh mìr, git lơh pas tàm bă ù ƀòn lơgar. Bi Nguyễn Văn Lâm, kis tàm xã Hoà Bắc pà git, tŭ neh geh priă wil tơl tàm rài kis, hìu nhă neh rơhời tam gơl bơh broă tam tờm keo ờ jŏ tơngai nàng tam chi brê geh dơm dờng. “Tŭ do, brê hòn gơs niam, geh ờ uă hìu neh tơnhào geh mờr 300 tơlăk đong, kung geh phan sa, phan ngui. Pa do, geh gùng dà lam sồr làng bol tam chi brê geh dơm chi dờng, ai geh bơta niam nàng làng bol tơnguh bơtàu kơl jăp rơlao mờ tam tờm keo. Tam chi geh dơm dờng, geh broă lơh sa uă rơlao”.

                 Ƀòn dờng Đà Nẵng tơlik uă sră nggal nàng lam sồr làng bol tam chi brê geh dơm dờng

Kơnhoàl Hoà Vang, ƀòn dờng Đà Nẵng geh rơlao 17 rơbô lồ ù brê lơh sa. Bơdìh mờ broă dong kờl bơh Dà lơgar gơwèt mờ làng bol, gơnoar atbồ ƀòn lơgar sùm ai tơl bơta niam mờ dong kờl niam ngan nàng làng bol geh tơl bơta niam tơnguh bơtàu lơh sa. Uă hìu làng bol geh càn priă sa priă cồng ờ uă nàng tơnguh bơtàu lơh sa hìu nhă, mờ neh geh bơcri priă tàm broă tam brê, rài kis làng bol neh tam gơl loh làng. Tơl kàl tơnhào tờm keo, geh hìu geh bơh 200 tus 400 tơlăk đong. Ồng Hồ Phú Thanh, Phó Củ tịc UɃÑZ xã Hoà Bắc, kơnhoàl Hoà Vang, ƀòn dờng Đà Nẵng pà git, bơh tŭ geh broă jào ù, jào brê bơh Dà lơgar, làng bol neh dờp ù, tus bal tàm broă tam brê: “Bơh broă làng bol tam gơl ù lơh mìr nàng tam tờm keo, tus tŭ do, uă hìu làng bol neh klàs mờ rơƀah, mờ kwơ màng geh ală hìu neh brồ guh lơh pas. Geh ờ uă làng bol neh tam gơl broă tam tờm keo nàng tam tờm chi dơm dờng, xã neh dong kờl làng bol nàng bơcri priă tơnguh bơtàu broă tam tờm chi dơm dờng”.

Pa do, UɃÑZ ƀòn dờng Đà Nẵng tơlik broă dong kờl, lam sồr làng bol tam brê geh dơm chi dờng. Tŭ do, neh geh 41 mpồl lơh broă, hìu làng bol dan cih măt tus bal tam brê geh dơm chi dờng mờ kờp jơh khà bă ù mờr 800 lồ. Ồng Trần Viết Phương, Phó kwang atbồ Sở Nông nghiệp mờ Phát triển Nông thôn ƀòn dờng Đà Nẵng pà git: Nàng broă tơnguh bơtàu tam brê geh dơm chi dờng tus mờ làng bol mờ gàr niam jơnau kờñ geh ai, Sở neh dan mờ UɃÑZ ƀòn dờng ring bal kĭ rơndăp broă dong kờl geh uă dơ̆. Jăt mờ hơ̆, dơ̆ sơnrờp do, ƀòn dờng ai rơlao 5 tơmàn đong priă dong kờl làng bol tam brê geh dơm chi dờng. “Lơh jăt Nghị quyết sồ 254 bơh UɃÑZ ƀòn dờng bè broă dong kờl tam brê geh dơm chi dờng tàm ƀòn dờng Đà Nẵng. Tàm dơ̆ do, lơh rơndăp broă nàng yal mờ UɃÑZ in kĭ dong kờl dơ̆ sơnrờp, tam pa 12 tơlăk tàm 1 lồ, tam gơl 8 tơlăk tàm 1 lồ. Lài do geh di pơgăp bơh 4 tus 5 nam tơnhào 1 dơ̆, tŭ do tam chi geh dơm dờng di pơgăp 10 nam hơ̆ sồng geh tơnhào dùl dơ̆, den broă lơh sa di gơlan geh gơguh uă rơlao nggùl dơ̆”.

Cau mblàng Ndong Brawl