VOV4.K’ho- Lơh jat jơnau sồr bơh Ủy ƀan Ñân zân càr Kon Tum dê bè broă dong kờl cau tam kơnuh sơnơm Ngọc Linh bơsong bơta hoàc huơr tài bơh phan tam gơtìp kòp aniai, Ngân hàng Cíñ sác xã hội càr Kon Tum gam lơh broă lơh sền gĭt khà hoàc huơr ngan ngồn bơh tơl hìu bơnhă nàng geh broă lơh dong kờl.

Dùl tơm kơnuh sơnơm Ngọc Linh gơtìp tu kòp aniai

Tŭ do tàm 2 kơnhoàl Tu Mơ Rông mờ Đăk Glei geh 953 hìu bơnhă làng bol càn priă dong kờl bơcri priă tam kơnuh sơnơm Ngọc Linh mờ kờp jơh priă jơng kah dồs rlau 62 tơmàn đong. Jat broă lòt sền bơh sơn rờp bơh Ngân hàng dê, tàm kơnhoàl Tu Mơ Rông khà hìu bơnhă geh kơnuh sơnơm Ngọc Linh gơtìp chơ̆t là 87 hìu bơnhă mờ kờp jơh khà priă jơng kah dồs là 6 tơmàn đong. Tàm kơnhoàl Đăk Glei khà hìu bơnhă geh kơnuh sơnơm Ngọc Linh gơtìp chơ̆t là 9 hìu bơnhă mờ priă jơngkah dồs là 380 tơlak đong. Ngân hàng Cíñ sác xã hội càr Kon Tum gam pơgồp bal mờ gơnoar atbồ 2 kơnhoàl sền gĭt khà hoàc huơr nàng geh broă lơh dong kờl ai ală hìu bơnhă làng bol in. Jat hơ̆, geh tơn jŏ tơngai tơm dồs dilah kờp jơh bơta hoàc huơr hơđơm 40%; tơn jŏ tơngai 3 nam mờ hìu bơnhă kờp jơh priă jền hoàc huơr bơh 40% tus 80%. Tơn jŏ tơngai tơm dồs 5 nam den kờp jơh priă jền hoàc huơr rlau 80%.

Cau mblàng K’Hạnh